Mukanda Utangu wa Mianangana
3 Solomone yalinga usendo ni Falau mwanangana wa Engitu ha kumbata mwanenyi. Iye yamutwala mu Mbonge ya Ndawichi ndo muze ahwishile kutunga zuwo lienyi ni zuwo lia Yehova ni yipanga ya Yerusaleme. 2 Ha mashimbu jacho, atu te kakulambwila milambu ha yilumbilo, mumu Solomone te kanda achitunga zuwo lia Yehova. 3 Solomone yanunga ni kuzanga Yehova ni kukaula yiyulo ya tato Ndawichi, alioze te kakuhana yitapo ni milambu ha yilumbilo.
4 Mwanangana yaya ku Ngibeone hanga ahane yitapo, mumu kwenako kwapwile chilumbilo chinene. Solomone yalambula yimuna 1,000 ngwe mulambu wa kwocha ha chilumbilo chacho. 5 Kuzekwene ku Ngibeone, Yehova yasoloka kuli Solomone mu chilota, yamulweza ngwenyi: “Eta yize unazange hanga ngukwehe.” 6 Chocho Solomone yamba ngwenyi: “Yenu nwasolwele zango lize kulishi kuhwa kuli tata Ndawichi kavumbi kenu, mumu iye kendele kumeso jenu ni ushishiko, ululi ni mbunge yingunu. Nunanungu ni kumusolwela zango lize kulishi kuhwa ndo musono, ha kumwaha mwana hanga atwame ha ngunja yenyi. 7 Yehova Zambi yami, hiwapwisa yami kavumbi ke mwanangana mu chihela cha tata Ndawichi, chipwe ngwe nguchili mukweze, kanda nguchinyingika yuma yinji. 8 Kavumbi ke kali hakachi ka atu waze wasakwile, atu anji waze mutu niumwe kechi kuhasa kwalula chipwe kunyingika unji wo. 9 Kashika, ngwehe kama mbunge ya kwononoka hanga nguhase kupatwila atu wano ni kunyingika chipi ni chipema. Mumu atu je kali anji, iya mahasa kwayula?”
10 Yehova yazanga yuma yize Solomone echile. 11 Mba Zambi yamulweza ngwenyi: “Amu hiweta chuma chino, kuwechile hanga utwame miaka yinji, chipwe upite, chipwe kufwa cha akwa-kole je, alioze hiweta mana hanga usope kanawa milonga ya atu, 12 mungukwaha yize weta. Mungukwaha nawa mbunge ya mana ni chinyingi kuhiana mianangana waze aliangile ni waze makakusalakana. 13 Chikwo nawa, mungukwaha ni yize kuwechile, upite ni lufuma. Kukuchi kapwa nawa mwanangana mukwo makapwa ngwe yena ha mashimbu eswe a mwono we. 14 Nyi muwenda mu majila jami, mufunga shimbi ni yiyulo yami ngwe chize alingile tatenu Ndawichi, mutwama miaka yinji.”
15 Muze Solomone ahindukile, yanyingika ngwenyi kumana te kanalota. Chocho, yafuna ku Yerusaleme, yamana kulutwe lia Mushete wa Usendo wa Yehova, yahana milambu ya kwocha ni milambu ya sambukila. Yalingila tuvumbi twenyi eswe chiteleka.
16 Ha matangwa jacho, mapwo aali yikoi yaya kuli mwanangana, yamana kumeso jenyi. 17 Umwe wa kuli mapwo jacho yamba ngwenyi: “Mwene wami, yami ni pwo yono twatwama mu zuwo limuwika. Ha mashimbu waze nashitanga, neye kapwanga ku zuwo. 18 Hakupalika cha matangwa atatu, neye yashita. Mu zuwo twapwile wika atu aali, mwakapwile nawa mutu mukwo. 19 Ha ufuku, pwo yono yashachila mwanenyi, chocho mwana yafwa. 20 Mba ha muchima ufuku muze yami kavumbi kenu te nguli mu tulo, iye yahinduka, yanda mwanami yamusa sali lienyi, yanda mwanenyi yoze te hafwa, yamusa mu moko jami. 21 Muze nahindukile chimene hanga ngupapise mwanami, yingumona ngwami, mwana te hafwa. Mba muze namutalile kanawa, yingumona ngwami, kumana hi mwanami ko.” 22 Alioze, pwo mukwo yamba ngwenyi: “Mwana wa yami au uli ni mwono, wa yena au hafwa.” Pwo mutangu yamba ngwenyi: “Ka, wa yena au hafwa, wa yami au uli ni mwono.” Chocho yaputuka kulizwelesa kumeso ja mwanangana.
23 Mba mwanangana yamba ngwenyi: “Umwe kanambe ngwenyi: ‘Mwana wa yami au uli ni mwono, wa yena au hafwa.’ Mukwo ngwenyi: ‘Au hafwa wa yena, au uli ni mwono wa yami.’” 24 Mwanangana Solomone yamba nawa ngwenyi: “Ngunehenenu katana.” Chocho yamunehena katana. 25 Mwanangana yamba ngwenyi: “Andenu mwana yoze uli ni mwono numupatule mu yipinji yaali. Chipinji chimuwika munuchihana kuli pwo umwe, chikwo munuchihana kuli pwo mukwo.” 26 Hazehene, naye ya mwana yoze te uli ni mwono yevwila mwanenyi keke, yaliumba kuli mwanangana ngwenyi: “Lisesa mwene wami, muhanenu kwenu kuli iye. Kanda numushiha.” Alioze pwo mukwo yamba ngwenyi: “Munuhasa kumupatula mu yipinji yaali, iye kechi kupwa wa yami chipwe wa yena.” 27 Chocho mwanangana yamba ngwenyi: “Mwana au muhanenu kuli pwo mutangu, kanda numushiha. Iye mwe naye.”
28 Muze A-Izalele eswe anyingikine chize mwanangana asopele mulonga wacho, yaakomoka chinji. Mumu mana a Zambi kapwile hamwe ni Solomone hanga alinge yuma ya ululi.