Mukanda Utangu wa Mianangana
4 Mwanangana Solomone te kakuyula mu chifuchi cheswe cha Izalele. 2 Wano e apwile yilolo jenyi: Azaria mwana wa Zadoke kapwile sasendote, 3 Elihorepe ni Ahija ana ja Shisha, kapwile akwa-kusoneka, Yehosofate mwana wa Ahilude kapwile mukwa-kufunga sango ja mwanangana. 4 Benaia mwana wa Jehoiada kapwile mwata wa maswalale, Zadoke ni Abiatare kapwile asasendote. 5 Azaria mwana wa Natane kapwile mwata wa manguvulu a mambonge, Zabude mwana wa Natane kapwile sasendote, sepa lia mwanangana. 6 Ahishare kapwile kasongo wa ku zuwo lia mwanangana, Adonirama mwana wa Abada, kapwile kasongo wa akwa-kulinga mulimo wa upinji.
7 Solomone kapwile ni manguvulu 12 mu chifuchi cheswe cha Izalele. Ayo e te akutwala kulia ku zuwo lia mwanangana ni kuli akwa-zuwo lienyi. Nguvulu ni nguvulu kapwile ni chiteli cha kuhana kulia ha kakweji umuwika ha mwaka. 8 Wano e apwile manguvulu a mu mambonge: Mwana wa Ben-Hure te kakuyula chifuchi cha ku milundu cha Eframe. 9 Mwana wa Ben-Dekere te kakuyula mu chifuchi cha Makaji, Shaalabimi, Mbete-Shemeshe ni mu Elone-Mbete-Hanane. 10 Mwana wa Ben-Hesede te kakuyula mu Aruboto (iye te kakusongwela mbonge ya Soko ni chifuchi cheswe cha Hefere); 11 Mwana wa Ben-Abinadambe te kakuyula chifuchi cheswe cha Ndole. (Iye mwe wambachile Tafate, mwana wa Solomone); 12 Bana mwana wa Ahilude te kakuyula mu Tanaka, Megidu ni mu chifuchi cheswe cha Mbete-Shiane (chize chapwile mu njiza ya Zaretane, ku mwanda wa Yezerele), chize ku Mbete-Shiane ni Abelemehola ndo mu chifuchi cha Jokemeame. 13 Mwana wa Ben-Gebere te kakuyula mu Ramote-Ngiliate, (iye te kakusongwela yihunda ya mbalaka ya Njaire mwana wa Manase, yize yapwile mu Ngiliate. Kapwile nawa ni kusongwela chifuchi cha Argobe chize chapwile ku Mbashane. Chifuchi chacho, chapwile ni mambonge 60 anene-anene waze apwile ni yipanga ni yikungo ya unengu yize apwile ni kuyika nayo yajilo); 14 Ahinadambe mwana wa Ido te kakuyula mbonge ya Mahaneme. 15 Ahimaze te kakuyula mu njiza ya munyachi wa Napatali (iye mwe wambachile Mbasamate mwana wa Solomone). 16 Bana mwana wa Hushai te kakuyula mu njiza ya munyachi wa Ashe ni Alote. 17 Yehosofate mwana wa Parua te kakuyula mu njiza ya munyachi wa Yisaka. 18 Shimei mwana wa Ela te kakuyula mu njiza ya munyachi wa Mbenjamine. 19 Gebere mwana wa Uri te kakuyula chifuchi cha Ngiliate, chifuchi chize chapwile cha Sahone mwanangana wa A-Amore ni Oge mwanangana wa Mbashane. Kwapwile nawa nguvulu mukwo yoze te wakusongwela manguvulu eswe a mu chifuchi.
20 Atu a mu Yunda ni a mu Izalele kapwile anji ngwe masekeseke a ku sesa lia kalunga-lwiji. Ayo te kakulia, kakunwa ni kuwahilila.
21 Solomone te kakuyula mianangana eswe, chize ku Lwiji Ufrateze ndo ku chifuchi cha A-Filistea ni mu njiza ya Engitu. Mianangana wano te kakufweta lijimu kuli Solomone, ayo kamukalakalile ku mwono wenyi weswe.
22 Kulia chize Solomone apwile ni kutambula ha tangwa, chapwile cha 30 a kore* ya unga wa fufunuka ni 60 a kore ya unga uze kuushi wa kusalula, 23 ngombe a maji 10, ngombe a mu chililo 20, mapanga 100, tupaji, kai, songe ni mikuku. 24 Iye kapwile ni kuyula sali lieswe lia Lwiji Ufrateze, chize ku Tifesahe ndo ku Ngaza, ni mawanangana eswe a mu sali lia lwiji. Iye te kakulivwashana ni yifuchi yeswe yize te alisulangana nayo. 25 Ha matangwa a kuyula cha mwanangana Solomone, mu Yunda ni mu Izalele mwapwile sambukila. Mutu ni mutu kapwile ni kutwama mushi lia mutondo wenyi wa uva ni mutondo wenyi wa mukuyu, chize ku Ndane ndo ku Mbia-Shipa.
26 Solomone kapwile ni matanga 4,000 a tuvwalu waze te akukoka matemba jenyi a jita ni akwa-kwendesa tuvwalu 12,000.
27 Manguvulu a mu mambonge e te akuhana kulia kuli Mwanangana Solomone ni kuli eswe waze te akulia ku mesa yenyi. Nguvulu ni nguvulu te kakupwa ni chiteli cha kuhana kulia ha kakweji umuwika ni kusa shindakenyo ngwenyi, kukuchi kuhona chuma nichimwe. 28 Ayo te kakutwala nawa sevada ni mwambu wa kulisa nawo tuvwalu ni wa kulisa nawo tuvwalu akwo waze te akukoka matemba.
29 Zambi yahana mana kuli mwanangana Solomone. Yamwaha nawa malinjekela ni yinyingi yinji ngwe masekeseke a ku sesa lia kalunga-lwiji. 30 Mwanangana Solomone kapwile ni mana anji kuhiana akwa-chivumbuko eswe ni A-Engitu eswe. 31 Iye kapwile ni mana anji kuhiana atu eswe, kuhiana Etane Ka-Ezera, Hemane, Kalukole ni Ndalata mwana wa Mahole. Lufuma wenyi kahetele ku mavungu eswe waze te alisulangana no. 32 Solomone katele yishima 3,000 ni kwimba miaso 1,005. 33 Iye te kakuhanjika hakutwala ku mitondo, yiputa, mitondo ya sedru ya ku Lebano ni yiputa yize te yakusoka ku mambango a zuwo. Kapwile ni kuhanjika nawa hakutwala ku tushitu, tujila, tushitu akukalala hashi ni yishi. 34 Atu a ku mavungu eswe ni mianangana a hashi heswe waze evwile hakutwala ku mana a Solomone, kapwile ni kwiza hanga amupanjike.