Mukanda Utangu wa Mianangana

6 Muze A-Izalele akumbanyishine miaka 480, chize haze akatukile mu chifuchi cha Engitu, ha mwaka wamuchiwana wa kuyula cha Solomone mu Izalele, ha kakweji wa Zivi,* (chekwamba, ha kakweji wamuchiali), Solomone yaputuka kutunga zuwo lia Yehova. 2 Zuwo lia Yehova lize Mwanangana Solomone atungile liapwile ni mbandu 60 ha usuhwe, 20 a mbandu ha utohwe ni mbandu 30 ha chizundamo. 3 Unjililo wa tembele wapwile ni utohwe uzewene wa zuwo, 20 a mbandu. Unjililo wapwile nawa ni 10 lia mbandu ya usuhwe wa zuwo.

4 Ku zuwo yasako tupenda akukangala ni kusepekenya. 5 Chikwo nawa, iye yatunga yipatulo ku yikalakala ya zuwo, yipatulo yacho yiyijingilika yiize ya tembele ni chipatulo cha mukachi. Yatunga nawa yipatulo ku mambango eswe a zuwo. 6 Chipatulo cha kwishi chapwile cha mbandu jitano ja utohwe, cha hakachi chapwile cha mbandu jisambano ja utohwe, cha kwilu chapwile cha mbandu shimbiali ja utohwe. Haze lia zuwo yahichikaho milumba ya mawe ngwe ndalo hanga mikambo achine kuyijika ku yikalakala ya zuwo.

7 Zuwo kalitungile ni mawe akululieka kanawa. Kashika muze te analitungu kukwakapwile zungo lia mweto,* njimbu chipwe zungo lia yikungo yikwo. 8 Chikolo cha chipatulo cha kwishi chapwile ku uto ya zuwo. Kwapwile nawa ndalo yize te yakukwasa kunyina ku chipatulo cha mukachi ni ku chipatulo cha kwilu. 9 Iye yanunga ni kutunga zuwo ndo muze alihwishile. Yasaho mikambo ni mapaya a sedru. 10 Yatunga yipatulo ku mambango eswe a zuwo, chipatulo ni chipatulo chapwile ni mbandu jitano ja chizundamo. Yipatulo yacho kayikunjikile ku chikalakala cha zuwo ni mapaya a mitondo ya sedru.

11 Ha shimbu liacho, Yehova yalweza Solomone ngwenyi: 12 “Hakutwala ku zuwo lino unatungu, nyi muwenda mu majila jami, mutayiza yiyulo ni upatwilo wami ni kwononokena shimbi jeswe ni kujikaula, mungumanununa chilakenyo chize nalingile kuli tatenu Ndawichi hali yena, 13 mungukapwa hamwe ni A-Izalele, chichi kehuka atu jami.”

14 Solomone yanunga ni kutunga zuwo lia Zambi hanga alihwise. 15 Iye kafukile yikalakala ya muchima lia zuwo ni mapaya a sedru. Yikalakala ya muchima yayifuka ni mapaya chize kwishi ndo helu. Hashi yafukaho mapaya a mutondo wa kupresu. 16 Ku chikalakala cha kunyima lia zuwo, yatungako chipatulo cha 20 a mbandu, chipatulo chacho chapwile cha mapaya a sedru chize kwishi ndo kwilu. Muchima lia zuwo yatungamo chipatulo cha Muma Musandu Mwahiana. 17 Sali lia kulutwe lia tembele liapwile ni mbandu 40. 18 Ha mapaya a sedru waze asele ku yikalakala ya zuwo, kafunjikileho yizulie ya swaha ni yitemo. Yikalakala yeswe kayifukile ni mapaya a sedru, mawe te keshi kusoloka.

19 Muchima lia zuwo yatungamo chipatulo hanga asemo Mushete wa Usendo wa Yehova. 20 Chipatulo cha muchima chapwile ni 20 a mbandu ha usuhwe, 20 a mbandu ha utohwe ni 20 a mbandu ha chizundamo. Iye yafuka yikalakala ni oru yipema, chilumbilo yachifuka ni mapaya a sedru. 21 Ku yikalakala ya muchima lia zuwo, Solomone yafukako ni oru yipema, yasa malenge a oru kulutwe lia chipatulo cha muchima chize afukile ni oru. 22 Zuwo lieswe yalifuka ni oru. Chikwo nawa, yafuka ni oru chilumbilo cheswe chize chapwile kulutwe lia chipatulo cha muchima.

23 Mu chipatulo cha muchima yasamo akerupimi aali a kusonga ni mapaya a mutondo wa pinyu. Akerupimi jacho kapwile ni kumi lia mbandu ha chizundamo. 24 Pulwa limuwika lia kerupimi liapwile lia mbandu jitano, pulwa likwo liapwile lia mbandu jitano. Chize ku songo lia pulwa limwe ndo ku songo lia pulwa likwo hapwile kumi lia mbandu. 25 Kerupimi mukwo neye kapwile ni kumi lia mbandu. Akerupimi eswe aali kapwile ni utohwe umuwika ni cheseko chimuwika. 26 Kerupimi umuwika kapwile ni chizundamo cha kumi lia mbandu, kerupimi mukwo neye che apwile. 27 Iye yasa akerupimi Muma Musandu Mwahiana. Mapulwa ja akerupimi kapwile a kwolola, pulwa lia kerupimi umuwika te liakuheta ku chikalakala, pulwa lia kerupimi mukwo te liakuheta sali likwo lia chikalakala, mapulwa akwo te kakulizaza mukachi ka zuwo. 28 Solomone yafuka akerupimi jacho ni oru yipema.

29 Ku yikalakala yeswe ya zuwo, haze ni muchima yafunjekako yizulie ya akerupimi, mingaji ni yitemo. 30 Hashi lia muchima lia zuwo ni haze, yafukaho ni oru. 31 Ku chikolo yasako yajilo ya mapaya a mutondo wa pinyu. Chino chapwile chihanda chamuchitano. 32 Ku yajilo yaali ya mapaya a mutondo wa pinyu, yafunjekako yizulie ya akerupimi, mingaji ni yitemo. Akerupimi ni yizulie ya mingaji yayifuka ni oru ya kutatula. 33 Ku unjililo wa tembele, iye yasako tushilu a mutondo wa pinyu. Chino che chapwile chihanda chamuchiwana cha cheseko cha chipatulo. 34 Iye yalinga yajilo yaali ya mapaya a mutondo wa pinyu. Chajilo chimuwika te chikwete yihanda yaali yize yakulikoneka, chajilo chikwo necho che chapwile. 35 Ha yajilo yacho yafunjekaho yizulie ya akerupimi, mingaji ni yitemo. Ha yizulie yacho yazujilaho oru.

36 Solomone yatunga chipanga cha milongo yitatu ya mawe a kusonga ni mulongo umuwika wa mapaya a mutondo wa sedru hanga ajingilike yiize.

37 Ha mwaka wamuchiwana, ha kakweji wa Zivi,* mulimo wa kutunga zuwo lia Yehova yiuputuka. 38 Ha mwaka kumi ni kashi, ha kakweji wa Bulu* (chekwamba, ha kakweji wamuchinake) yahwisa kutunga zuwo kulita ni chize alifunjikile. Zuwo liacho liambachile miaka shimbiali, mba yahwisa kulitunga.