Mukanda Utangu wa Mianangana

7 Solomone kalingile miaka 13 mba yahwisa kutunga zuwo lienyi.

2 Iye yatunga nawa Zuwo lize avulukile ngwo, Zuwo lia Usaki wa Lebano. Zuwo liacho liapwile ni mbandu 100 ha usuhwe, mbandu 50 ha utohwe ni mbandu 30 ha chizundamo. Zuwo liacho yalitungila helu lia milongo yiwana ya manguji a sedru waze apwile ni mikambo ya sedru helu. 3 Helu lia mikambo yacho yafukaho mapaya a sedru. Hapwile mapaya 45, mulongo ni mulongo wapwile ni mapaya 15. 4 Zuwo liapwile ni milongo yitatu ya tupenda, milongo yacho yapwile kwishi ni helu. Tupenda te kakulitala umwe ni mukwo. 5 Yikolo yeswe yapwile ni mbango jiwana, ngwe chizechene alongele tupenda a mbango jiwana mu milongo yitatu.

6 Iye yatunga Chihela cha Kunangina cha Manguji, chapwile ni mbandu 50 a usuhwe ni 30 a mbandu a utohwe; kulutwe lia chihela chacho yatungako mbalanda ya manguji.

7 Solomone yatunga nawa Chota cha Usopelo, mwenamo iye te akusopela milonga. Ku yikalakala ya Zuwo liacho, yafukako mapaya a sedru chize kwishi ndo kwilu.

8 Zuwo lize iye mwene te matwama, yalitungila sali likwo lia yiize, kusuku ni Chota cha usopelo. Yalitunga ngwe chize atungile mazuwo akwo. Solomone yatunga nawa zuwo lialifwa ni Chota cha usopelo, yalihana kuli mwana wa Falau yoze iye ambachile.

9 Mazuwo eswe waze atungile chize kwishi ndo ku mikambo, chize ku yikalakala ya haze ndo mu yiize yinene, kaatungile ni mawe a ndando yinji, a kululieka kulita ni chize esekele. 10 Chishina cha zuwo kachitungile ni mawe anene-anene a ndando yinji. Mawe akwo kapwile ni kumi lia mbandu, akwo kapwile ni mbandu nake. 11 Helu lia mawe jacho, hapwile nawa mawe akwo a ndando yinji, akululieka kulita ni cheseko ni mikambo ya sedru. 12 Mu yiize yinene mwapwile chikalakala cha milongo yitatu ya mawe akululieka kanawa ni mulongo umuwika wa mapaya a mutondo wa sedru. Chikalakala chacho te chalifwa ni chize chapwile mu yiize ya mukachi ka zuwo lia Yehova ni ku senge lia zuwo.

13 Mwanangana Solomone yatuma kusanyika Hirame yoze wapwile ku Teru. 14 Iye kapwile mwana wa pwo tuliwa wa ku munyachi wa A-Napatali, alioze tato te wa ku Teru, kapwile mukwa-kufula unengu. Hirame kapwile ni mana anji ni malinjekela, te kananyingika kukalakala kanawa ni unengu. Chocho yaya kuli Mwanangana Solomone, yalinga milimo yeswe yize amuhele.

15 Hirame yalinga manguji aali a unengu. Manguji jacho kapwile ni chizundamo cha mbandu 18, utohwe wa manguji jacho wapwile wa mbandu 12. 16 Iye yalinga nawa yipangula yaali ya unengu wa kuzuzulula, yayisa helu lia manguji. Yipangula yacho yapwile ni yizundamo ya mbandu jitano. 17 Yipangula yayisa helu lia manguji, yayikasa ni malenge shimbiali akusepekenya ngwe wanda. 18 Yalongaho milongo yaali ya maundu a romana hanga afuke nayo yipangula yize yapwile helu lia manguji; chino che alingile nawa ni yipangula yeswe yaali. 19 Yipangula ya helu lia manguji a mbalanda, yapwile ngwe yitemo ya mbandu jiwana ha usuhwe. 20 Yipangula yacho yapwile helu lia manguji aali, yayifuka ni wanda; chipangula ni chipangula yachijingilika ni milongo ya maundu 200 a romana.

21 Iye yajika manguji a mbalanda ya tembele. Nguji lize ajikile sali lia utata, yaliluka jina ngwo, Jakini,* lize ajikile sali lia umama, yaliluka jina ngwo, Mboaze.* 22 Masongo a manguji jacho kapwile ngwe yitemo. Chocho yahwisa mulimo weswe wa kujika manguji.

23 Iye yalinga Mbashila yinene ya unengu yize yapwile ni chijinguluko cha mbandu 10. Usuhwe wa mbashila yacho wapwile wa mbandu 5. Mba ayijingilike yeswe te katamba kwanda lwoji musuku wa mbandu 30 mba akumbane. 24 Kwishi lia mukomo wa Mbashila kwapwile yizulie ya swaha ya mbandu kumi, yakujingilika ku Mbashila yeswe. Mbashila yeswe yapwile yakujingilika ni milongo yaali ya yizulie ya swaha. 25 Mbashila yinene yapwile helu lia ngombe 12 a kuzuzulula, ngombe 3 yatala ku sango, 3 yatala ku chitokelo, 3 yatala ku uto, 3 yatala ku chivumbuko; Mbashila yapwile helu lia ngombe jacho. Ayo eswe yomba nyima Mbashila. 26 Mbashila yapwile ni utohwe wa mbanda-kwoko, mukomo wa mbashila yacho kaulingile ngwe mukomo wa musenge te walifwa ni chitemo. Mu Mbashila yacho te mwakunjila 2,000 a mbate.*

27 Iye yalinga matemba kumi a unengu. Matemba jacho kapwile ni mbandu jiwana ja usuhwe, mbandu jiwana ha utohwe ni mbandu jitatu ha chizundamo. 28 Chino che alingile matemba jacho: Kapwile ni mambango a unengu a kusokeka mu tushilu. 29 Ku mambango ja matemba jacho, yafunjekako yizulie ya ndumba, ngombe ni akerupimi. Helu ni mushi lia yizulie ya ndumba ni ngombe yafunjekaho yizulie ya yitemo. 30 Temba ni temba liapwile ni maroda awana a unengu ni yikungo yiwana ya unengu. Maroda jacho kapwile a kusokeka ku tushilu awana. Kwishi lia mbashila kwapwile mikambo yize yapwile ya kufunjeka yizulie ya yitemo ku mambango. 31 Kanwa lia temba liapwile mukachi ka chipangula, liapwile ni usuhwe wa mbandu yimuwika; kanwa lia temba hamwe ni mikambo, yapwile ya jinguluka, mikambo yacho yapwile ni mbandu yimuwika ni chipinji ha usuhwe, ha chipangula hapwile yizulie ya kufunjeka. Matemba jacho hakachi kapwile ni mambango awana. 32 Maroda awana kapwile kwishi lia mambango a matemba, kapwile ni mbandu yimuwika ni chipinji ya usuhwe, mikambo ya maroda yapwile ya kusokeka ku temba. 33 Maroda jacho, kapwile ngwe maroda ja matemba a jita. Mikambo yako, yikungo, tufumbo ni sambu, yeswe yapwile ya unengu wa kuzuzulula. 34 Temba ni temba liapwile ni manguji awana kwishi lia mambango. Manguji jacho kapwile chihanda cha temba. 35 Helu lia temba hapwile chipenya cha jinguluka cha chipinji cha mbandu ha usuhwe. Yizulie ni mambango a kuzuzulula, yeswe yapwile chihanda cha temba. 36 Helu lia matemba jacho ni ku mambango yafunjekako yizulie ya akerupimi, ndumba ni mingaji. Kulita ni utohwe wa helu liacho ni mambango jacho, yafunjekaho nawa yitemo. 37 Chenacho alingile matemba eswe kumi. Matemba eswe kapwile a kuzuzulula mu mulali umuwika, mu cheseko chimuwika ni utohwe umuwika.

38 Iye yalinga nawa mbashila kumi ja unengu, mu mambashila jacho te mwakunjila 40 a mbate. Mbashila ni mbashila yapwile ni mbandu jiwana. Mambashila jacho yajisa helu lia matemba kumi. 39 Yasa matemba atano sali lia utata, akwo atano sali lia umama. Mbashila yinene yayisa sali lia utata lia zuwo, ku uto.

40 Hirame yalinga nawa mambashila, yikasu ni malonga.

Hirame yahwisa kulinga milimo yeswe ya mu zuwo lia Yehova yize Mwanangana Solomone amutumine kulinga: 41 Manguji aali ni yipangula yalifwa ngwe malonga yize yapwile helu lia manguji, ni wanda wa kufuka nawo yipangula yaali yalifwa ni malonga yapwile helu lia manguji; 42 yalinga 400 ja maundu a romana hanga aase ha wanda, yalonga milongo yaali ya maundu a romana ha wanda wacho afuke yipangula yaali yize yalifwa ni longa yapwile ha manguji aali; 43 yalinga matemba kumi ni mbashila kumi ja kusa helu lia temba; 44 yalinga Mbashila yinene ni ngombe 12 waze asele kwishi lia Mbashila yinene; 45 yikashi, yikasu, malonga ni yikwata yeswe yize Hirame alingilile Mwanangana Solomone ya mu zuwo lia Yehova. 46 Mwanangana kazuzulwile yikwata yacho mu yikombola ya uma mu chikulo cha Yordau, hakachi ka Sukote ni Zaretane.

47 Mwanangana Solomone kakalwile kulema cha yikwata yacho, mumu yapwile yinji chinji. Kulema cha unengu kakahashile kuchalula. 48 Solomone yalinga yikwata ni yuma yeswe ya mu zuwo lia Yehova: Chilumbilo cha oru, mesa ya oru yakusa mbolo ja kutumbieka; 49 yikwachilo ya ndeya ya oru yipema, yitano yayisa sali lia utata, yikwo yitano yayisa sali lia umama mu chipatulo cha muchima. Yalinga nawa yitemo, ndeya, yijimino ya oru, 50 mbashila, yifuko ya kujima nayo kahia, malonga, misenge, yikwachilo ya kahia ya oru yipema ni tushilu a oru a ku yikolo ya mu chipatulo cha mukachi, mwe Muma Musandu Mwahiana, ni tushilu a ku yikolo ya tembele.

51 Chocho Solomone yahwisa kulinga milimo yeswe yize azangile kulinga mu zuwo lia Yehova. Yasa mu zuwo lia Zambi yuma yize tato Ndawichi apwishile yisandu. Prata, oru ni yikwachilo, yayisa mu mushete wa upite wa mu zuwo lia Yehova.