Mukanda Utangu wa Mianangana
16 Yehova yalweza Jehu mwana wa Hanani hakutwala kuli Mbasha ngwenyi: 2 “Nakuchijile mu fufuta hanga ngukupwise mwanangana wa atu jami A-Izalele, alioze yena unanungu ni kwimbulula yitanga ya Jeroboame. Wavulumwisa atu jami A-Izalele, ayo kangwihia ni yitanga yo yipi. 3 Kashika, mungunongesa Mbasha ni akwa-zuwo lienyi. Akwa-zuwo lienyi mungwalinga ngwe chize nalingile kuli akwa-zuwo lia Jeroboame mwana wa Nebate. 4 Akwa-zuwo lia Mbasha waze makafwila mu mbonge makaalia kuli tuwa; waze makafwila mu minda makaalia kuli tujila.”
5 Sango jikwo ja ku mwono wa Mbasha, yuma yize alingile ni yitanga yenyi ya kukomwesa yili ya kusoneka mu mukanda wa sango ja mianangana ja A-Izalele a ha mashimbu jacho. 6 Mba Mbasha yafwa, yamufunda hamwe ni tulamba twenyi mu Tiriza. Mwanenyi Ela yaputuka kuyula mu chihela chenyi. 7 Chikwo nawa, liji lia Yehova yiliza kuli profeta Jehu mwana wa Hanani, hakutwala kuli Mbasha ni akwa-zuwo lienyi, mumu lia upi weswe uze Mbasha alingile kumeso ja Yehova ni kumutuka ni milimo ya moko jenyi ni kusolola yitanga yipi ngwe ya akwa-zuwo lia Jeroboame ni kushiha nawa Nebate mwana wa Jeroboame.
8 Ha mwaka makumi aali ni wamuchisambano wa kuyula cha Asa Mwanangana wa mu Yunda, Ela mwana wa Mbasha yaputuka kuyula A-Izalele mu Tiriza. Iye kayulile miaka yiali. 9 Zimiri kavumbi ka mwanangana, yoze te wakusongwela chizavu chikwo cha maswalale, yatwama punga mwanangana muze te ananu ku Tiriza, ku zuwo lia Araza, mukwa-kufunga zuwo lia mwanangana mu Tiriza. 10 Zimiri yashiha mwanangana. Kamushihile ha mwaka makumi aali ni wamuchishimbiali wa kuyula cha Asa Mwanangana wa Yunda, mba iye yaputuka kuyula mu chihela chenyi. 11 Muze Zimiri aputukile kuyula, yashiha akwa-zuwo eswe ja Mbasha. Kakahichikile lunga niumwe ni mwono, chipwe asoko, chipwe masepa. 12 Chocho Zimiri yanongesa akwa-zuwo eswe ja Mbasha kulita ni yize Yehova ambile hakutwala kuli Mbasha kupalikila muli profeta wenyi Jehu. 13 Chino chalingiwile mumu lia shili yeswe yize Mbasha ni mwanenyi Ela alingile ha kuvulumwisa A-Izalele ni kutuka Yehova Zambi ya Izalele ni tuponya two amokomoko. 14 Sango jikwo ja ku mwono wa Ela ni yuma yeswe yize alingile, yili ya kusoneka mu mukanda wa sango ja mianangana a mu Izalele a ha mashimbu jacho.
15 Ha mwaka makumi aali ni wamuchishimbiali wa kuyula cha Asa Mwanangana wa mu Yunda, Zimiri yapwa mwanangana, yayula matangwa shimbiali mu Tiriza. Ha shimbu liacho maswalale te kanajikinyina Ngibetone, mbonge ya A-Filistea. 16 Maswalale jacho yevwa ngwo: “Zimiri kashiha mwanangana.” Ha tangwa liacho, A-Izalele eswe yakwata Omiri kapitau ka maswalale, yamupwisa mwanangana mu Izalele. 17 Mba Omiri ni A-Izalele eswe yakatuka ku mbonge ya Ngibetone, yaya ni kujingilika mbonge ya Tiriza. 18 Muze Zimiri amwene ngwenyi mbonge hayitambula, yanjila mu zuwo lia mwanangana, yaliochelamo. 19 Chino chalingiwile mumu lia shili yize alingile kumeso ja Yehova, ha kwimbulula yitanga yipi ya Jeroboame ni kuvulumwisa A-Izalele. 20 Sango jikwo ja ku mwono wa Zimiri ni punga yize atwamine mwanangana yili ya kusoneka mu mukanda wa sango ja mianangana a mu Izalele a ha mashimbu jacho.
21 Henaho A-Izalele alihandunwine mu yizavu yaali. Chizavu chimwe yichikwasa Tibani mwana wa Nginate ni kuzanga kumupwisa mwanangana. Chizavu chikwo yichikwasa Omiri. 22 Alioze, chizavu chize te chakukwasa Omiri yichikumba chizavu chize te chakukwasa Tibani mwana wa Nginate. Chocho Tibani yafwa, Omiri yamupwisa mwanangana.
23 Ha mwaka makumi atatu ni kashi wa kuyula cha Asa Mwanangana wa mu Yunda, Omiri yapwa mwanangana mu Izalele, yayula miaka kumi ni yaali. Mu Tiriza iye yayula miaka yisambano. 24 Yalanda kuli Shemere mulundu wa Samaria ni mbongo jaali ja prata. Ha mulundu wacho yatungaho mbonge yize alukile jina lia Samaria, mumu lia Shemere mwenya-mulundu. 25 Omiri te kakulinga yuma yipi chinji kumeso ja Yehova, kavulumwine chinji kuhiana eswe waze aliangile kuyula. 26 Iye kembulwile yitanga yeswe yipi ya Jeroboame mwana wa Nebate, yavulumwisa A-Izalele ni kutuka Yehova Zambi ya Izalele ni tuponya twenyi amokomoko. 27 Sango jikwo ja ku mwono wa Omiri ni yuma ya kukomwesa yize alingile, yili ya kusoneka mu mukanda wa sango ja mianangana a mu Izalele a ha mashimbu jacho. 28 Mba Omiri yafwa, yamufunda ni tulamba twenyi mu Samaria; mwanenyi Ahabe yaputuka kuyula mu chihela chenyi.
29 Ahabe mwana wa Omiri yapwa mwanangana wa A-Izalele ha mwaka makumi atatu ni wamuchinake wa kuyula cha Asa, Mwanangana wa mu Yunda. Ahabe mwana wa Omiri yayula A-Izalele mu Samaria miaka 22. 30 Ahabe mwana wa Omiri, kavulumwine chinji kumeso ja Yehova kuhiana mianangana waze ayulile chitangu. 31 Iye kakembulwile wika shili ya Jeroboame mwana wa Nebate, alioze yambata nawa Jezebele mwana wa Etabale mwanangana wa A-Sendone, yaputuka kuwayila Mbale ni kufulamana kumeso jenyi. 32 Yalingila nawa Mbale chilumbilo mu zuwo lize amutungilile mu Samaria. 33 Ahabe yalinga nawa manguji asandu.* Iye kalingile yuma yinji yipi hanga atuke Yehova Zambi ya Izalele kuhiana yize alingile mianangana eswe a mu Izalele, waze ayulile chitangu.
34 Ha matangwa ja Ahabe, henaho Hieli Ka-Mbetele, yatungulula mbonge ya Yeriku. Muze asele fundamentu ya mbonge yacho, yafwisa mwanenyi mutangu, Apirame. Mba muze asele yikolo ku mbonge, yafwisa mwanenyi wa kasula-songo, Segubu, ngwe chize Yehova ahanjikile kupalikila muli Yoshua mwana wa Nune.