Mukanda Utangu wa Mianangana
17 Eliya Ka-Tishibe wa ku Ngiliate yalweza Ahabe ngwenyi: “Ni mwono wa Yehova Zambi ya Izalele yoze nakuwayila, kukuchi kapwa mume chipwe vula ha mashimbu wano ndo muze yami mungukahana shimbi hanga kunoke vula!”
2 Yehova yalweza Eliya ngwenyi: 3 “Katuka ku chihela chino, yako ku chivumbuko hanga ukaswame ku chikulo cha Kerite chize chili ku chivumbuko cha Yordau. 4 Watamba kunwa meya a mu chitwetwe, mungutuma yikwakwalo hanga akutwalile kulia.” 5 Hazehene iye yaya, yalinga yize Yehova amulwezele; yatwama ku chikulo cha Kerite, ku chivumbuko cha Yordau. 6 Yikwakwalo te kakumutwalila mbolo ni yifwo chimene ni chingoloshi, iye te kakunwa meya a mu chitwetwe. 7 Alioze, hakupalika cha matangwa, chitwetwe yichuma, mumu mu chifuchi te kumushi kunoka vula.
8 Chocho Yehova yamulweza ngwenyi: 9 “Katuka, yako ku Zarafata mu chifuchi cha Sendone utwamemo. Mungutuma umwe tuliwa apwe ni kukwaha kulia.” 10 Iye yaya ku Zarafata. Muze ahetele ku chikolo cha mbonge, yamona umwe tuliwa kanatongona tete, yamusanyika, yamba ngwenyi: “Lisesa, ngwehe kama ndambu ya meya ngunwe.” 11 Muze te anayi ni kwanda meya yamusanyika, yamulweza ngwenyi: “Lisesa, ngunehene kama nawa lumbolo.” 12 Pwo yamukumbulula ngwenyi: “Ni mwono wa Yehova Zambi ye, mbolo chishi najo. Nguli wika ni ndambu ya unga mu chisoka ni ndambu ya maji a olevwe mu mulondo ukehe. Ngunatongona jimwe tete hanga nguteleke ndambu ya kulia, cha yami ni mwanami. Muze muchihwa, mutufwa kwetu.”
13 Eliya yamulweza ngwenyi: “Kanda wivwa woma. Yako ku zuwo, linga yize hiwamba. Alioze, chitangu ngulingile kalumbolo ni unga uze uli nawo hanga ungunehene. Mba mulinga kulia cha yena ni mwane. 14 Mumu Yehova Zambi ya Izalele kanambe ngwenyi: ‘Unga uze uli mu chisoka che chinene kuuchi kuhwa ni maji a olevwe waze ali mu mulondo we ukehe kechi kahwa ndo ha tangwa lize Yehova manokesa vula mu chifuchi.”’ 15 Chocho, iye yalinga yize Eliya amulwezele. Mba pwo, asoko jenyi ni profeta Eliya yapwa ni kulia cha matangwa anji. 16 Unga uze wapwile mu chisoka chinene kuwakahwile, chipwe maji a olevwe waze apwile mu mulondo ukehe kakahwile, kulita ni yize Yehova ambile kupalikila muli Eliya.
17 Kulutwe lia matangwa, mwana wa mwenya-zuwo yayiza, yikola yiyoka chinji, chocho yafwa. 18 Mba pwo yahula Eliya ngwenyi: “Mwene wami, mutu wa Zambi wamwenemwene, yika nakulinga kama? Weza kuno hanga ungwiulule shili yami ni kushiha mwanami nyi?” 19 Alioze, Eliya yamulweza ngwenyi: “Lisesa, achineha mwane.” Chocho yamusa mukondo, yamutwala ku chipatulo cha kwilu kuze te akupomba, yamupombesa ha muhela wenyi. 20 Iye yalemba kuli Yehova ngwenyi: “Yehova Zambi yami, mumu liaka waneha lamba kuli tuliwa yono wangutambula ku zuwo lienyi ha kushiha mwanenyi?” 21 Eliya yafulamana hali mwana katatu keswe, yalemba kuli Yehova ngwenyi: “Yehova Zambi yami, lisesa, hindwisa kama mwana yono.” 22 Yehova yapanjika kulemba cha Eliya, chocho mwana yahinduka. 23 Eliya yasunuka ni mwana, yamuhana kuli naye. Yamba ngwenyi: “Tala! Mwane hahinduka!” 24 Mba tuliwa yalweza Eliya ngwenyi: “Haliapwila hinanyingika ngwami, kumana uli lume mutu wa Zambi, maliji a Yehova waze wakuhanjika kali lume amwenemwene.”