Mukanda Utangu wa Mianangana
19 Chocho Ahabe yalweza Jezebele yuma yeswe yize Eliya alingile ni chize ashihile aprofeta eswe ni katana. 2 Mba Jezebele yatuma mukeji kuli Eliya amulweze ngwenyi: “Tuzambi angumwese lamba, nyi hamene ha ola yino chakulingile yize walinga kuli aprofeta wano!” 3 Eliya yevwa woma, kashika yachina hanga alamwine mwono wenyi. Yaya ku Mbia-Shipa ya ku Yunda, yahichikako chikwashi wenyi. 4 Chocho yanjila mu puya, yenda tangwa lia muundu. Yawana chimwe chiputa, yatwama mushi lia chiputa chacho yeta hanga afwe, yamba ngwenyi: “Yehova, kwahwa, ngushihe kwami! Mumu yami chapemene kuhiana tulamba twami.”
5 Mba iye yapomba mushi lia chiputa, hazehene mungelo yamuhindwisa, yamba ngwenyi: “Katuka hanga ulie.” 6 Muze ahindukile, yamona sali lienyi kuli mbolo ha kahia ni mulondo wa meya. Iye yalia, yanwa mba yapomba cheka. 7 Hakupalika cha amwe mashimbu, mungelo wa Yehova yeza ha chisuho chamuchiali, yamuhindwisa, yamba ngwenyi: “Katuka hanga ulie, mumu wenyi unayi usuku.” 8 Chocho iye yakatuka, yalia, yanwa mba yapwa ni tachi. Yenda matangwa 40 ni ufuku 40 ndo muze ahetele ku Horepe, ku mulundu wa Zambi wamwenemwene.
9 Kwenako yanjila mu chivwenge, yapombamo. Susumuku yevwa liji lia Yehova ngwo: “Eliya, yika unalinga kuno?” 10 Iye yakumbulula ngwenyi: “Nalihanyine chinji mu mulimo wa Yehova Zambi ya tujita, haliapwila A-Izalele hehuka usendo we, hapuzula yilumbilo ye ni kushiha aprofeta je ni katana, yami wika nasalaho. Musono ayo kanazange kungushiha.” 11 Alioze Zambi yamba ngwenyi: “Tuhuka, mana ha mulundu kumeso ja Yehova.” Yehova te kanapalika, mba yikupwa fuji yinji yize yapulile milundu ni kupalula mawe kumeso ja Yehova, alioze Yehova te keshi mu fuji. Muze fuji yapalikile, yikupwa munyiko, alioze Yehova te keshi mu munyiko. 12 Muze munyiko wahwile, yikupwa kahia, alioze Yehova te keshi mu kahia. Muze kahia kajimine, yevwa liji mushi. 13 Muze Eliya evwile liji liacho, yafuka ku meso ni hina lienyi, yatuhuka, yamana ku unjililo wa chivwenge. Yevwa nawa liji ngwo: “Eliya, yika unalinga kuno?” 14 Iye yakumbulula ngwenyi: “Nalihanyine chinji mu mulimo wa Yehova Zambi ya tujita, haliapwila A-Izalele hehuka usendo we, hapuzula yilumbilo ye ni kushiha aprofeta je ni katana, yami wika nasalaho. Musono ayo kanazange kungushiha.”
15 Yehova yamulweza ngwenyi: “Yako mu puya ya Ndamaseku. Muze muhetako, watamba kuwayisa Hazaele hanga apwe mwanangana wa Seria. 16 Watamba nawa kuwayisa Jehu, mujikulu wa Nimishi hanga apwe mwanangana wa mu Izalele. Wayisa nawa Elisha mwana wa Sefate wa ku Abelemehola hanga apwe profeta yoze makakusalakana. 17 Mutu yoze malilamwina ku katana wa Hazaele, Jehu mamushiha. Yoze malilamwina ku katana wa Jehu, Elisha mamushiha. 18 Chikwo nawa, mu Izalele muchili atu 7,000 waze kawayile Mbale chipwe kumumbejala.”
19 Chocho Eliya yaya, yaliwana ni Elisha mwana wa Sefate, te kanalimi. Kulutwe lienyi kwapwile ngombe 24 akukasa aali aali. Elisha te kanalimi ni ngombe aali akasula. Mba Eliya yakundama kuli iye, yamujika chikuto chenyi. 20 Hohene, Elisha yahichika ngombe, yakaula Eliya, yamulweza ngwenyi: “Lisesa, ngweche kama hanga nguye ngulishike ni yisemi jami, mba mungukukaula.” Iye yamukumbulula ngwenyi: “Muhasa kuya, kushi mulonga.” 21 Chocho iye yahiluka, yanda ngombe aali yaalambula ngwe chitapo. Yanda mapaya a kanga yateleka no yifwo, yayihana kuli atu, ayo yalia. Mba iye yakaula Eliya, yaputuka kumulingila.