Akwa-Kuyula
12 Chocho yaasanyika malunga a ku Eframe, ayo yazauka Zafone, yamba kuli Jefeta ngwo: “Mumu liaka kuwakatusanyikine muze wayile ni kwasa jita ni A-Amone? Mutukwochela mu zuwo lie.” 2 Jefeta yaakumbulula ngwenyi: “Yami ni atu jami te tunalimika chinji ni A-Amone. Alioze muze twanusanyikine hanga nutulamwine ku moko jo, yenu kunwakejile. 3 Mba muze namwene ngwami, kunuchi kutulamwina, yinguya ni kulimika ni A-Amone, chocho Yehova yaakunjika mu moko jami. Mba mumu liaka musono nuneza ni kwasa jita ni yami?”
4 Chocho Jefeta yakungulula malunga eswe a Ngiliate, yasa jita ni A-Eframe, mba malunga a Ngiliate yakumba A-Eframe waze ambile ngwo: “Chipwe ngwe yenu A-Ngiliate nwatwama mu njiza ya A-Eframe ni A-Manase, nihindu nuli akwa-kuchina ja A-Eframe.” 5 A-Ngiliate yajikinyina A-Eframe ha yau ya lwiji Yordau hanga ahone kuchina. Muze ayo te akumona umwe lunga Ka-Eframe kaneseka kuchina ni kwamba ngwenyi: “Ngwechenu kama ngupalike.” A-Ngiliate te kakumuhula ngwo: “Yena uli Ka-Eframe?” Muze makumbulula ngwenyi: “Ka,” 6 ayo mamwamba ngwo: “Lisesa, achamba ngwo, shibolete.” Alioze, iye mamba ngwenyi, “sibolete,” mumu te keshi kuhasa kuvuluka kanawa liji liacho. Chocho ayo mamukwata ni kumushihila hakamwihi ni yau ya lwiji Yordau. Ha shimbu liacho, A-Ngiliate yashiha 42,000 A-Eframe.
7 Jefeta kayulile A-Izalele ha miaka yisambano, mba yafwa. Chocho yamufunjila mu mbonge yenyi, mu Ngiliate.
8 Ibizane, Ka-Mbeteleme yamusalakana, yaputuka kuyula A-Izalele. 9 Iye kapwile ni ana a malunga 30, a mapwo 30. Yahangisa ana jenyi a mapwo kuli malunga a ku munyachi weka, yaneha mapwo 30 hanga alimbate ni ana jenyi a malunga. Yayula A-Izalele ha miaka shimbiali. 10 Chocho, Ibizane yafwa, yamufunjila mu Mbeteleme.
11 Elone Ka-Zapulone yamusalakana, yaputuka kuyula A-Izalele. Yayula A-Izalele ha miaka kumi. 12 Chocho, Elone Ka-Zapulone yafwa, yamufunjila mu Ajalone mu chifuchi cha Zapulone.
13 Abadone mwana wa Hilele, Ka-Piratone yamusalakana, yaputuka kuyula A-Izalele. 14 Iye kapwile ni ana 40 ni ajikulu 30 waze te akwendela ha yimbulu 70. Iye yayula A-Izalele ha miaka nake. 15 Mba Abadone mwana wa Hilele Ka-Piratone, yafwa. Yamufunjila mu Piratone mu chifuchi cha Eframe, ku mulundu wa A-Amaleke.