Mukanda Utangu wa Samuele
26 Ha kupalika cha mashimbu, atu a mu Zife yaya ndo kuli Saulu mu Ngibia, yamba ngwo: “Ndawichi kanaswame ku mundundena wa Hachila, uze watwama kulutwe lia Njeshimone.” 2 Chocho Saulu yaya mu puya ya Zife ni kufupa Ndawichi, kapwile hamuwika ni maswalale 3,000 waze asakwile hakachi ka A-Izalele. 3 Saulu yasa chilombo chenyi ku mundundena wa Hachila, uze watwama kulutwe lia Njeshimone hakamwihi ni tapalo. Ndawichi te katwama mu puya, yevwa ngwo Saulu keza ni kumufupa mu puya. 4 Kashika, Ndawichi yatuma ngendeshi, hanga atale nyi chamwenemwene lume Saulu keza. 5 Kulutwe, Ndawichi yaya ku chihela kuze Saulu asele chilombo, yamona haze Saulu te anapombo, hamuwika ni Abenere, mwana wa Nere, mwata wa maswalale ja Saulu. Saulu te kanapombo mu chilombo, maswalale jenyi te kanamujingilika. 6 Chocho Ndawichi yahula kuli Ahimeleke, Ka-Hete, ni Abishai, mwana wa Zeluia, mwana-kwo ya Joabe, ngwenyi: “Iya maya ni yami mu chilombo muze Saulu ali?” Abishai yakumbulula ngwenyi: “Yami munguya ni yena.” 7 Chocho Ndawichi ni Abishai yanjila mu chilombo ufuku, yawana Saulu kanapombo ni kunga lienyi lia kujika hashi ku mutwe wenyi. Abenere ni maswalale te kanapombo, kanajingilika Saulu.
8 Abishai yamba kuli Saulu ngwenyi: “Musono Zambi kakunjika mukwa-kole we mu moko je, haliapwila ngweche ngumutuwe kunga kamuwika lume, chichi kumutuwa kaali.” 9 Alioze Ndawichi yamba kuli Abishai ngwenyi: “Kanda umulinga upi niumwe, mumu iya mahasa kusamba nyi molola kwoko lienyi hanga alimike ni yoze Yehova hanawayisa?” 10 Ndawichi yamba nawa ngwenyi: “Ni mwono wa Yehova lume, Yehova mwene makamushiha, hanji tangwa limwe mwene makalifwila, hanji nawa makaya mu jita kuzekwene makafwila. 11 Kumeso ja Yehova kuchichi kulita yami kwolola kwoko liami hanga ngushihe yoze Yehova hanawayisa! Alioze twande kunga ali ni mulondo wa meya yili ku mutwe wenyi tuye kwetu.” 12 Chocho Ndawichi yanda kunga ni mulondo yize te yili ku mutwe wa Saulu, yaya kwo. Niumwe kaevwile chipwe kwamona, chipwe lume kuhinduka. Eswe te kanapombo mumu Yehova kaehele tulo anji. 13 Mba Ndawichi yaya sali likwo, yamana helu lia mulundu, kusuku ni ayo.
14 Ndawichi yakololoka kuli maswalale ni kuli Abenere, mwana wa Nere ngwenyi: “Abenere, unangwivu?” Abenere yakumbulula ngwenyi: “Yena iya unasanyika mwanangana?” 15 Ndawichi yamba kuli Abenere ngwenyi: “Ngwami uli lunga nyi? Iya uli ngwe yena mu Izalele? Mba mumu liaka kuwafungile mwanangana we? Mumu umwe wa kuli maswalale kanjila mu chilombo hanga ashihe mwanangana we. 16 Yize walinga kuyapemene. Ni mwono wa Yehova, yenu eswe nwatela kufwa, mumu kunwafungile mwene wenu yoze Yehova hanawayisa. Haliapwila uchitalenu! Kunga lia mwanangana ni mulondo wa meya yize te yili ku mutwe wenyi kulihi yili?”
17 Mba Saulu yevwa ngwe Ndawichi unahanjika, chocho yahula ngwenyi: “Awo mwanami Ndawichi?” Ndawichi yakumbulula ngwenyi: “Ewa, yami, mwene wami mwanangana.” 18 Ndawichi yamba nawa ngwenyi: “Mumu liaka nunangukaujola yami kavumbi kenu? Yika nalinga? Upi uka nalinga? 19 Lisesa mwene wami mwanangana, panjika kama maliji a yami kavumbi kenu: Nyi Yehova mwe unakutumu hanga ulimike ni yami, iye atayize kama mulambu wami wa mbuto. Alioze nyi atu e anakutumu, ashingiwe kumeso ja Yehova, mumu hanguhuma, hanguhandununa ni atu ja Yehova, chili ngwe kanangwambe ngwo: ‘Yako ulingile tuzambi eka.’ 20 Haliapwila, kanda utayiza kama hanga manyinga jami amwanganyine hashi kusuku ni Yehova, mumu mwanangana wa Izalele haya ni kufupa sanya wamokomoko ngwe kanayi ni kushiha ngwali ku milundu.”
21 Chocho Saulu yamba ngwenyi: “Navulumuna. Funa mwanami Ndawichi, chichi kukulinga upi niumwe, mumu musono walemesa mwono wami. Nalinga yuma ngwe chihepuke, nalinga upi unene.” 22 Ndawichi yamba ngwenyi: “Kunga lia mwanangana ali, tumenu umwe eze ni kulisaka. 23 Yehova mwe makafweta mutu ni mutu kulita ni ululi wenyi ni ushishiko wenyi, mumu musono Yehova kakukunjika mu moko jami, alioze yami te chazangile kushiha yoze Yehova hanawayisa. 24 Ngwe chizechene yami nalemesa mwono wenu musono, Yehova neye alemese mwono wami, angupulwile ku lamba lieswe.” 25 Saulu yakumbulula Ndawichi ngwenyi: “Zambi akuwahise mwanami Ndawichi. Pundu lume, yena mulinga yuma yinene-yinene, chikwo nawa, yuma yeswe mulinga muyenda kanawa.” Chocho Ndawichi yaya kwenyi, Saulu neye yahiluka ku zuwo.