Mukanda Utangu wa Samuele
15 Samuele yamba kuli Saulu ngwenyi: “Yami mwe Yehova atumine hanga ngukuwayise upwe mwanangana wa Izalele. Haliapwila panjika yize Yehova anambe. 2 Yehova-wa-Tujita kanambe ngwenyi: ‘Mungufwetesa A-Amaleke ha chize alimikine ni A-Izalele mu jila muze ayo te anakatuka ku Engitu. 3 Haliapwila, yako ushihe A-Amaleke ni kwanongesa hamuwika ni yuma yeswe yize ali nayo, kanda ufunga chuma nichimwe. Shiha malunga ni mapwo, twanuke ni ana-kemba, ngombe ni mapanga, tumelu ni yimbulu.’” 4 Saulu yasanyika maswalale, yaalula ku Telaime, kwapwile maswalale 200,000 ni 10,000 a malunga A-Yunda.
5 Saulu yaya ndo mu limbo lia A-Amaleke, yaswama mu mungulunga. 6 Saulu yamba kuli A-Kene ngwenyi: “Katukenu, tuhukenu mukachi ka A-Amaleke hanga nguchine kununongesa hamuwika ni ayo. Mumu yenu nwasolwele zango lize kulishi kuhwa kuli A-Izalele eswe muze akatukile mu Engitu.” Chocho, A-Kene yakatuka mukachi ka A-Amaleke. 7 Mba Saulu yashiha A-Amaleke chize ku Havila ndo ku Shure, chihunda chize chili hakamwihi ni Engitu. 8 Iye yakwata Agage mwanangana wa A-Amaleke ni mwono, alioze yanongesa atu eswe ni katana. 9 Alioze Saulu ni maswalale yafunga Agage ni mapanga, ni ngombe apema, anene-anene, ni mapanga a kuji ni yeswe yize yapwile yipema. Ayo te kazangile kuyinongesa. Alioze yanongesa yikumba yeswe yipi ni yize te kuyishi ulemu.
10 Yehova yamba kuli Samuele ngwenyi: 11 “Ngunevu chinyengo ha chize napwishile Saulu mwanangana, mumu iye kalituna kungukaula, chikwo nawa, keshi kwononokena maliji jami.” Samuele yevwa chinyengo chinji, yaliumba kuli Yehova ufuku weswe. 12 Muze Samuele akatukile chimenemene hanga aye ni kulitakana ni Saulu, yatambula lusango ngwo: “Saulu kaya ku Karmela, halitungila kaponya hanga atu apwe ni kumwiulukilako. Mba yaya ku Ngilingali.” 13 Muze Samuele haliwana nenyi, Saulu yamba kuli Samuele ngwenyi: “Yehova akuwahise. Yami nononokena liji lia Yehova.” 14 Alioze Samuele yamba ngwenyi: “Mba mumu liaka ngunevu zungo lia mapanga ni ngombe?” 15 Saulu yakumbulula ngwenyi: “Twatambula kuli A-Amaleke, mumu atu kafunga mapanga ni ngombe apema hanga aahane ngwe yitapo kuli Yehova Zambi ye. Alioze yeswe yize yasalangako, twayinongesanga.” 16 Chocho Samuele yamba kuli Saulu ngwenyi: “Kwahwa! Mana ngukulweze yuma yize Yehova angulwezanga ufuku.” Iye yamba ngwenyi: “Amba twivwe!”
17 Samuele yamba nawa ngwenyi: “Muze akusakwile hanga upwe mwata wa A-Izalele, muze Yehova akuwayishile hanga upwe mwanangana wa A-Izalele, walimwene ngwe kushi mulemu. 18 Kulutwe, Yehova yakutuma, yamba ngwenyi: ‘Yako unongese yivulumunyi wano A-Amaleke. Asa no jita ndo haze mwanongesena eswe.’ 19 Mba mumu liaka kuwononokenene liji lia Yehova? Shimbu wononoke, hiwasolola kuzo ha kwanda yikumba ni kulinga chize kuchalitele kumeso ja Yehova!”
20 Alioze Saulu yamba kuli Samuele ngwenyi: “Yami nononokena liji lia Yehova! Naya kuze Yehova angutumanga, naneha Agage, mwanangana wa A-Amaleke, nanongesa A-Amaleke eswe. 21 Alioze ha yuma yize te atamba kunongesa, atu katambula mapanga ni ngombe apema hanga aalambule kuli Yehova Zambi ye mu Ngilingali.”
22 Samuele yamba ngwenyi: “Yika yakuvwisa Yehova kuwaha? Shina milambu ni yitapo, nyi kwononokena maliji a Yehova? Nyingika ngwe, kwononoka chahiana mulambu, kupanjika chahiana maji a kuji-a-mapanga. 23 Mumu uhulia uli ngwe shili ya kutaha ngombo, kulisuta chapwa ngwe kupanda ni kukombelela mahamba. Amu walituna liji lia Yehova, neye kalituna yena, kuchi kupwa nawa mwanangana.”
24 Saulu yamba kuli Samuele ngwenyi: “Navulumuna, mumu chononokenene maliji a Yehova, ni kukaula usongwelo wenu mwene wami, mumu te ngunevu woma wa atu, chocho yingulinga yize ayo te anazange. 25 Haliapwila, lisesa, konekena kama upi wami, uhiluke ni yami hanga ngufulamane kumeso ja Yehova.” 26 Alioze Samuele yamba kuli Saulu ngwenyi: “Chichi kufuna ni yena, mumu walituna liji lia Yehova, Yehova kalituna yena, kuchi kupwa nawa mwanangana wa A-Izalele.” 27 Muze Samuele ateulukile hanga aye kwenyi, Saulu yamukwata ku songo lia chikuto chenyi cha moko ehi, chocho chikuto yichisuwika. 28 Samuele yamba kuli Saulu ngwenyi: “Musono, Yehova kakutambula wanangana wa Izalele, makauhana kuli mukwenu mukwo yoze unakuhiana. 29 Chikwo nawa, mwe Mulemu wa Izalele keshi kulionga chipwe kwalumuka, mumu Iye hi mutu ko hanga alumuke.”
30 Chocho Saulu yamba ngwenyi: “Navulumuna. Alioze lisesa, ngulemese kama kumeso ja makulwana ja atu jami ni kumeso ja A-Izalele. Hiluka ni yami hanga ngufulamane kumeso ja Yehova, Zambi ye.” 31 Mba Samuele yahiluka ni Saulu. Saulu yafulamana kumeso ja Yehova. 32 Samuele yamba ngwenyi: “Ngunehenenu Agage mwanangana wa A-Amaleke.” Chocho Agage yahetako ni woma ni kukakajana, mumu te kanambe mu mbunge yenyi ngwenyi: ‘Kwamba pundu, kechi kungushiha nawa.’ 33 Samuele yamba ngwenyi: “Ngwe chizechene katana ke ahichika mapwo anji keshi ana, ni noko neye masala keshi ana.” Mba Samuele yateta Agage mu yipinji-yipinji kumeso ja Yehova mu Ngilingali.
34 Chocho Samuele yaya ku Rama, Saulu yaya ku zuwo lienyi mu Ngibia ya Saulu. 35 Samuele kakamwene nawa Saulu ndo ha tangwa lia kufwa chenyi, mumu Samuele kanenganyanyine chinji ha yize Saulu alingile. Yehova yevwa chinyengo ha chize apwishile Saulu mwanangana wa Izalele.