Akwa-Kuyula

4 Muze Ehude afwile, A-Izalele yaputuka nawa kulinga yuma yipi kumeso ja Yehova. 2 Chocho, Yehova yaakunjika ku moko ja Jabini, mwanangana wa A-Kanana, yoze te wakuyula mu Hazore. Mwata wa maswalale jenyi kapwile Sisera, iye te katwama mu Harosete-Hagoimi. 3 A-Izalele yateta kuli Yehova, mumu Jabini kapwile ni matemba a jita 900 waze te ali ni makunga a utale. Iye te hamwesa lamba A-Izalele ha miaka 20.

4 Debola, profeta wa pwo, pwo lia Lapidoto, mwe te unayula A-Izalele ha mashimbu jacho. 5 Iye te kakutwama mushi lia mungaji wenyi* hakachi ka Rama ni Mbetele ku chifuchi cha milundu cha Eframe. A-Izalele te kakuyaya kuli iye hanga aasopese. 6 Iye yatuma kusanyika Mbarake mwana wa Abinoame, wa ku Kendeshe mu Napatali, yamulweza ngwenyi: “Yehova, Zambi ya A-Izalele kangutuma hanga ngukulweze ngwami: ‘Yako ku Mulundu wa Tabore hamwe ni malunga 10,000 a minyachi ya Napatali ni Zapulone. 7 Ami mungukakoka Sisera, mwata wa maswalale ja Jabini ku lwiji Kishone hamwe ni matemba jenyi a jita ni maswalale jenyi. Mungukamukunjika ku moko je.’”

8 Chocho Mbarake yamba ngwenyi: “Nyi yena muuya ni yami munguya, alioze nyi kuwayile, ni yami chichi kuya.” 9 Debola yakumbulula ngwenyi: “Munguya ni yena. Alioze kechi kakuchichimieka ha kwasa jita yino, mumu Yehova makunjika Sisera mu moko ja umwe pwo.” Chocho Debola yaya ni Mbarake ku Kendeshe. 10 Mbarake yasanyika A-Zapulone ni A-Napatali hanga aye ku Kendeshe, mba malunga 10,000 yamukaula. Debola neye yaya hamwe nenyi.

11 Ha shimbu liacho, Hepere Ka-Kene te halihandununa ni A-Kene a ku munyachi wa Hobabe, tato-weno ya Mose. Mbalaka yenyi yapwile hakamwihi ni mutondo unene ku Zananime, uze wapwile hakamwihi ni Kendeshe.

12 Mba lusango yaheta kuli Sisera ngwo, Mbarake mwana wa Abinoame haya ku Mulundu wa Tabore. 13 Sisera kawashi-washi yakunga matemba jenyi eswe a jita, 900 a matemba waze apwile ni makunga a utale ni maswalale jenyi eswe, yakatuka ku Harosete-Hagoimi yaya ndo ku lwiji Kishone. 14 Debola yalweza Mbarake ngwenyi: “Yako, mumu musono Yehova makunjika Sisera mu moko je. Ngwami Yehova mwe makutetekela?” Chocho Mbarake yapalumuka ku Mulundu wa Tabore hamwe ni malunga 10,000. 15 Mba Yehova yalumbanganyisa Sisera ni matemba jenyi eswe a jita hamuwika ni maswalale jenyi kumeso ja Mbarake. Chocho, Sisera yasunuka mu temba lienyi yachina. 16 Mbarake yazombwesa tujita waze te anendesa matemba a jita ni maswalale akwo ndo ku Harosete-Hagoimi. Mba maswalale eswe a Sisera yaashiha ni katana, kukwakasalile mutu niumwe.

17 Alioze, Sisera yachinyina mu mbalaka ya Jaele pwo lia Hepere, Ka-Kene. Mumu Jabini mwanangana wa Hazore te kakulivwashana ni akwa-zuwo lia Hepere Ka-Kene. 18 Jaele yafwambuka, yalweza Sisera ngwenyi: “Tweya mwene wami, njila muno, kanda wivwa woma.” Chocho, iye yanjila mu mbalaka, mba Jaele yamufuka mukombo. 19 Sisera yamba ngwenyi: “Lisesa, ngwehe kama ndambu ya meya, pwila ngunevu.” Chocho, iye yazulula tuku ya yamwa, yamwaha hanga anwe mba yamufuka cheka. 20 Iye yalweza Jaele ngwenyi: “Mana ku chikolo cha mbalaka. Nyi kweza umwe makuhula ngwenyi: ‘Kuno kweza umwe lunga?’ Amba ngwe: Ka!”’

21 Alioze Jaele pwo lia Hepere, yanda lumbambo wa mbalaka ni mweto. Hakehe-hakehe yakundama kuli iye muze te anapombo, mumu te hahonga chinji, yamuhata lumbambo mu mbalangwe ndusu ndo mu mavu. Hazehene yafwa.

22 Muze Mbarake ayileko ni kufupa Sisera, Jaele yatuhuka yaya ni kumupatwiza, yamulweza ngwenyi: “Tweya hanga ngukulweze lunga yoze unafupu.” Iye yaya, yamona Sisera hafwa ni lumbambo wenyi mu mbalangwe.

23 Chocho ha tangwa liacho, Zambi yakumba Jabini mwanangana wa A-Kanana kumeso ja A-Izalele. 24 A-Izalele yalimika chikolo ni Jabini mwanangana wa A-Kanana ndo muze amunongesene.