Mukanda Utangu Kuli Timoteu

2 Chitangu, ngunanukolweza hanga nuliumbe, nulembe, nwite ni kusakwilila kuli Zambi hali atu eswe, 2 hali mianangana ni hali atu eswe waze ali ni wata, hanga tununge ni kutwama kanawa ni sambukila, ni kuwayila Zambi ni mbunge yeswe. 3 Chino chinawaha, chinapeme chikolo kumeso ja Zambi, Chilamwina chetu, 4 yoze unazange hanga atu a mutapu weswe alilamwine, apwe ni chinyingi cha umwenemwene. 5 Mumu kuli Zambi umuwika lume, ni chitakanyishi umuwika hakachi ka Zambi ni atu, mutu umuwika, iye Kristu Yesu, 6 yoze walihanyine ngwe ndando ya ukuule hali eswe. Atu makambujola yuma yino ha shimbu lialita. 7 Kangutongwele ngupwe mukwa-kwambujola ni postolo hanga nguhane uchela uno, hi mahuza ko, ngunambe umwenemwene, kangutongwele ngupwe longeshi wa akwa-mavungu hakutwala ku ufulielo ni umwenemwene.

8 Kashika, ngunazange ngwami, ku yihela yeswe, malunga anunge ni kulemba ni kuzundula moko ashishika, chakuhona ufwatulo ni kulihangujola. 9 Chizechene nawa, mapwo katamba kuzala mazalo waze analite, ni kulikehesa hamwe ni mana, hi ni kuyinda ko cha kambu cheka ni cheka, ni oru hanji tukanga ni mazalo a ndando yinji, 10 alioze alipemese mu jila yalita, ya mapwo waze akwamba ngwo kakuwayila Zambi, che kwamba, kupalikila mu yitanga yipema.

11 Pwo alilongese uholela ni kuzeya cheswe. 12 Chatayijile pwo kulongesa chipwe kuyula lunga, alioze ahole. 13 Mumu chitangu Zambi katangile Alama, mba yatanga Eva. 14 Chikwo nawa, Alama kakamwongele, alioze pwo mwe ongele chinji, chocho yavulumuna. 15 Chipwe chocho, pwo makamulamwina ha kusema ana, nyi manunga mu ufulielo, mu zango, mu usandu ni kupwa ni mana.