Akwa-Kuyula

8 Chocho malunga A-Eframe yamuhula ngwo: “Yuma walinga yika yinalumbunuka? Mumu liaka kuwatusanyikine muze wayanga ni kwasa jita ni A-Mindiane?” Ayo yamuzwelesa chinji. 2 Alioze, iye yakumbulula ngwenyi: “Yika yami nalinga nyi twayitesa ni yize yenu nwalingile? Shina uva yize A-Eframe akuhichika mu minda kuyahianyine uva yize A-Abieza akuhela? 3 Zambi kakunjikile mu moko jenu Orepe ni Zepe, mianangana ja A-Mindiane. Yika yami nalinga yinahiane yize yenu nwalingile?” Muze ayo evwile chocho, yalihumikiza.

4 Chocho Ngideone ni malunga 300 waze apwile hamwe nenyi yazauka Yordau, ayo te hahonga, chipwe chocho yanunga ni kuhanga akwa-kole jo. 5 Kashika iye yalweza malunga a ku Sukote ngwenyi: “Lisesa, hanenu kama kulia kuli malunga wano, hahonga, mumu tunahange Zeba ni Zalumuna, mianangana ja A-Mindiane.” 6 Alioze, akwa-kuyula a mu Sukote yamukumbulula ngwo: “Shina hiwakwata Zeba ni Zalumuna mba tuhane kulia kuli maswalale je?” 7 Ngideone yaalweza ngwenyi: “Mumu lia chino, muze Yehova makunjika Zeba ni Zalumuna mu moko jami, mungunusuta yitete ya mbimbo ni mikalale ya mu puya.” 8 Mba yaya ku Penwele, yeta yuma yizeyene, alioze malunga a ku Penwele yamukumbulula ngwe chize amukumbulwile kuli malunga a ku Sukote. 9 Kashika, yalweza nawa malunga a mu Penwele ngwenyi: “Muze jita muyihwa, mungupuzula kaposhi yono.”

10 Zeba ni Zalumuna te kali ku Kakore hamwe ni maswalale jo 15,000. Maswalale jacho a ku chivumbuko e asalileho, mumu maswalale 120,000 kaashihile. 11 Ngideone yanunga ni kukanduka, yapalikila mu jila ya waze te atwama mu mbalaka ku chivumbuko cha Noba ni Jogabeha, yaheta mu chilombo cha akwa-kole, yachipupa, mumu maswalale te kanda achililulieka. 12 Muze Zeba ni Zalumuna achinyine, iye yaakaula, yakwata mianangana jacho. Chocho maswalale eswe mu chilombo yevwa woma.

13 Ngideone mwana wa Njoashe, yahiluka, yapalikila mu jila yinakandukila ku Here. 14 Muze te ali mu jila, yakwata umwe mukweze wa ku Sukote, yaputuka kumuhula, mba mukweze wacho yasoneka majina ja akwa-kuyula ni makulwana a mu Sukote, eswe kapwile malunga 77. 15 Chocho iye yaya kuli malunga a ku Sukote, yamba ngwenyi: “Nanunehena Zeba ni Zalumuna, waze nwangwihilanga ha kwamba ngwenu: ‘Shina hiwakwata Zeba ni Zalumuna mba tuhane kulia kuli maswalale je waze hahonga?’” 16 Iye yakwata makulwana a mu mbonge, yaasuta yitete ya mbimbo ni mikalale ya mu puya, yafumba malunga a ku Sukote. 17 Yapuzula nawa kaposhi wa Penwele, yashiha malunga a mu mbonge.

18 Ngideone yahula Zeba ni Zalumuna ngwenyi: “Malunga waze nwashihile ku Tabore te kuchi apwa?” Ayo yamukumbulula ngwo: “Ayo kapwile ngwe yena. Kapwile ngwe ana ja mianangana.” 19 Chocho iye yaalweza ngwenyi: “Ayo kapwile ana ja mama. Ngunalishinga mu jina lia Yehova Zambi ya mwono ngwami, nyi te nwahichikile ni mwono, kachi te chichi kunushiha.” 20 Iye yalweza Jetere mwanenyi mutangu ngwenyi: “Ashihe!” Alioze iye kakatomwene katana, woma te anevu, mumu te uchili mukweze. 21 Mba Zeba ni Zalumuna yamulweza ngwenyi: “Tushihe yena mwene, mumu lunga kakumumwena ha tachi jenyi.” Chocho, Ngideone yashiha Zeba ni Zalumuna, mba yanda yijingo ya oru yize yapwile mu kota ya tumelu jo.

22 Chocho malunga A-Izalele yalweza Ngideone ngwo: “Tuyule, yena ni mwane ni mujikulu we, mumu hiwatulamwina ku moko ja A-Mindiane.” 23 Alioze Ngideone yaalweza ngwenyi: “Yami chichi kunuyula, chipwe mwanami kechi kunuyula. Yehova mwe manuyula.” 24 Ngideone yaalweza nawa ngwenyi: “Ngunazange kunwita yimwe: Mutu ni mutu wa kuli yenu angwehe yingeliengelie ya oru ya ku mazulu yize atambula mu jita.” (Mumu A-Ishemali kapwile ni kusa yingeliengelie ya oru ku mazulu.) 25 Ayo yamba ngwo: “Kushi mulonga, mutukwahayo.” Chocho, yala hina mba mutu ni mutu yasaho yingeliengelie ya ku mazulu yize atambwile mu jita. 26 Yingeliengelie ya ku mazulu yize Ngideone atambwile, yapwile ni kulema shekele 1,700 ya oru, kuchingaho yipenya, malenge ni mazalo apema a mianangana a Mindiane ni yijingo ya mu kota ja tumelu.

27 Ngideone yalinga efode ni oru yacho, yayitwala mu mbonge yenyi ku Ofra, mba A-Izalele yaputuka kuwayila efode yacho, chocho yiyipwa muheto kuli Ngideone ni akwa-zuwo lienyi.

28 A-Mindiane yaakumba kuli A-Izalele, ayo kakapinjishile nawa A-Izalele, kashika ha matangwa ja Ngideone, chifuchi yichipwa ni uhwimino ha miaka 40.

29 Njerubale mwana wa Njoashe yahiluka ku zuwo lienyi.

30 Ngideone yapwa ni ana 70, mumu kapwile ni mapwo anji. 31 Konkubina yoze apwile nenyi mu Shekeme, yasema nenyi mwana umuwika wa lunga, yamuluka jina ngwo, Apimeleke. 32 Ngideone mwana wa Njoashe yafwa muze te hawahilila ni miaka yinji ku mwono wenyi, yamufunda mu fuka lia tato Njoashe, ku Ofra ya Abieza.

33 Muze Ngideone te hafwa, A-Izalele yaputuka kuwayila Ambale, ayo yatenga Mbale-Mberete ngwe kazambi ko. 34 A-Izalele kakewulukile Yehova Zambi yo yoze walamwinyine ku moko ja akwa-kole jo eswe waze te alisulangana no, 35 chipwe kusolola zango kuli akwa-zuwo lia Njerubale, chekwamba, Ngideone, ha yuma yeswe yipema yize alingile hali A-Izalele.