Kuli A-Hepreu

13 Nungenu ni kusolola zango lienu lia undumbu. 2 Kanda nuvulama kuzumbula ngeji, mumu atu amwe ha kuchilinga, yazumbula angelo chakuhona kunyingika. 3 Iwulukenu waze ali mu mazuwo a ususu, ngwe nuli no hamuwika mu zuwo lia ususu, ni waze anahungumiona, mumu ni yenu nawa nuli atu.* 4 Ulo aulemese kuli atu eswe, muhela wa ulo kanda ausa mu luchisa, mumu Zambi makasopesa atu waze akulinga utanji* ni akwa-kulinga upangala. 5 Ku mwono wenu, kanda nuzanga mbongo, wahililenu ni yuma yize nuli nayo. Mumu iye kanambe ngwenyi: “Chichi kakwehuka, chichi kakumbila.” 6 Mba tuhase kwamba ni hamu lieswe ngwetu: “Yehova* iye chikwashi chami, chichi kwivwa woma. Yika mutu mahasa kungulinga?”

7 Iwulukenu waze akunusongwela, waze ahanjikile liji lia Zambi kuli yenu, mba ha kumona yuma yipema yize yakwiza ku yitanga yo, imbululenu ufulielo wo.

8 Yesu Kristu yomwene, zau, musono ni ku miaka yeswe.

9 Kanda nupianguka ni malongeso eka ni eka ni waze kunwanyingikine, mumu chili chipema kukolesa mbunge ni chawana cha keke, kuhiana ni yuma ya kulia,* yize kuyishi kuyukisa waze akuyifupa chinji.

10 Yetu tuli ni chilumbilo, chize atu akulinga mulimo usandu mu mbalaka keshi ni ulite wa kulilaho. 11 Mumu mijimba ya tushitu akuchiza manyinga waze akutwala muma musandu kuli mwata wa asasendote a lutwe ngwe mulambu ha shili, kakuyochela haze lia chihunda. 12 Kashika, Yesu neye kamwene lamba haze lia mbonge hanga apwise atu asandu ni manyinga jenyi mwene. 13 Hachino, tuyenu ni kulitakana nenyi haze lia chihunda, tumbate luchoko yoze iye ambachile, 14 mumu hano, kutushi ni mbonge yize muyinunga miaka ni miaka, alioze twakufupa ni mbunge yeswe mbonge yize muyizako. 15 Kupalikila muli iye, tuhanenu chawana cha uhaliso kuli Zambi mashimbu eswe, che kwamba, muhuko wa mivumbo yetu, yize yakwambujola jina lienyi ha mbunga. 16 Chikwo nawa, kanda nuvulama kulinga yuma yipema, ni kulitetela* ni akwenu yize nuli nayo, mumu Zambi kakuwahilila ni yitapo ngwe yino.

17 Onononekenenu waze akunusongwela, azeyelenu, hanga achilinge ni uwahililo, hi ni kutwa mikuma ko, nyi ka muchinunehena lamba, mumu ayo kakufunga mwono wenu, chikwo nawa makaasopesa kuli Zambi kulita ni yitanga yo.

18 Nungenu ni kutulembela, mumu tuli ni shindakenyo ngwetu, tuli ni mbunge yitoma, tunazange kupwa akwa-ululi mu yuma yeswe. 19 Alioze ngunanwichi ni mbunge yeswe ngwami, lembenu hanga anguhilwise kuli yenu ni kawashi.

20 Haliapwila, Zambi ya sambukila, yoze wahindwishile kafunga munene wa mapanga hakachi ka afu, Mwene wetu Yesu, ni manyinga a usendo wa mutolo, 21 anwehe yuma yeswe yipema hanga nulinge upale wenyi, alinge muli yetu kupalikila muli Yesu Kristu yuma yize yakupemena kumeso jenyi, uhaliso ukapwe kuli iye ndo ku miaka ya mutolo. Amene.

22 Ngunaliumbu kuli yenu mandumbu, hanga nwivwe ni uhomboloji weswe maliji wano a utakamiso, mumu maliji waze nanusonekena kali akehe. 23 Ngunafupu kunulweza ngwami, ndumbwetu Timoteu kamutusula mu zuwo lia ususu. Nyi meza ni kawashi, mungwiza hamwe nenyi ni kunutala.

24 Nguhanyinenu mwoyo kuli waze eswe akunusongwela, ni kuli asandu eswe. Mandumbu a mu Italia kananumeneka.

25 Chawana cha keke ya Zambi chipwe hamwe ni yenu.