Mukanda Wamuchiali wa Samuele
6 Ndawichi yakungulula nawa maswalale eswe a tachi 30,000. 2 Chocho, Ndawichi ni malunga eswe waze apwile hamwe nenyi, yaya ku Mbale-Yunda ni kusaka Mushete wa Zambi wamwenemwene. Kulutwe lia Mushete wacho kwe atu akutambikila jina lia Yehova wa tujita yoze unatwama ha ngunja yenyi helu lia akerupimi. 3 Ayo yasa Mushete wa Zambi wamwenemwene ha temba liaha hanga autwale ku zuwo lia Abinadambe lize te liatwama ha mundundena. Uza ni Ahio ana ja Abinadambe e te anendesa temba.
4 Chocho ayo yatwala Mushete wa Zambi wamwenemwene ku zuwo lia Abinadambe lize liatwama ha mundundena. Ahio mwe te uli kulutwe lia Mushete. 5 Ndawichi ni A-Izalele eswe te kanahangana kumeso ja Yehova ni kwimba yisaji yeka ni yeka, yakulinga ni mutondo wa junipero, ni tulialia, yisaji ya kusa, tumikupiela, njalamina ni sembalu. 6 Alioze, muze ahetele ku chizungwilo cha Nakone, Uza yazoza kwoko lienyi, yakwata ku Mushete wa Zambi wamwenemwene, mumu ngombe kambile kuuholola. 7 Yize Uza alingile kuyakasolwele vumbi, chocho Yehova yamuvwila uli unji, Zambi wamwenemwene yamushiha hazehene, yafwila sali lia Mushete wa Zambi wamwenemwene. 8 Alioze, Ndawichi yevwa kupiha,* mumu Yehova kevwile uli unji ni kushiha Uza. Chihela chacho kakuchivuluka ngwo, Pereze-Uza* ndo musono. 9 Ha tangwa lize, Ndawichi yevwila Yehova woma unji, yamba ngwenyi: “Kuchi munguhasa kutwala Mushete wa Yehova mu mbonge yami?” 10 Ndawichi katayijile nawa kutwala Mushete wa Yehova mu mbonge yize apwile, Mbonge ya Ndawichi. Alioze, Ndawichi yatuma kuutwala ku zuwo lia Obede-Endome Ka-Ngata.
11 Mushete wa Yehova yiutwama tukweji atatu ku zuwo lia Obede-Endome Ka-Ngata. Yehova yawahisa Obede-Endome ni akwa-zuwo lienyi eswe. 12 Yalweza Ndawichi ngwo: “Yehova hawahisa zuwo lia Obede-Endome ni yuma yenyi yeswe mumu lia Mushete wa Zambi wamwenemwene.” Chocho Ndawichi yaya ni uwahililo ku zuwo lia Obede-Endome hanga asake Mushete wa Zambi wamwenemwene ni kuutwala ku Mbonge ya Ndawichi. 13 Muze akwa-kumbata Mushete wa Yehova endele shimbo jisambano, Ndawichi yalambula ngombe wa kuji ni mwana-ngombe wa maji.
14 Ndawichi te kanahangana chinji kumeso ja Yehova, te kanazala efode ya linyu. 15 Ndawichi ni A-Izalele eswe te kanakaula Mushete wa Yehova ni kutwa ngunda ni kwimba chitavwi. 16 Muze Mushete wa Yehova wahetele mu Mbonge ya Ndawichi, Mikale mwana wa Saulu, yatala ha kapenda, yamona Mwanangana Ndawichi kanatumbwoka ni kuhangana kumeso ja Yehova. Chocho Mikale yaputuka kulelesa Ndawichi mu mbunge. 17 Yatwala Mushete wa Yehova mu mbalaka yize Ndawichi atungilile Mushete wacho, yausa ha chihela chawo. Mba Ndawichi yahana milambu ya kulumba ni milambu ya sambukila kumeso ja Yehova. 18 Muze Ndawichi ahwishile kuhana milambu ya kulumba ni milambu ya sambukila, yawahisa atu mu jina lia Yehova wa tujita. 19 Iye yahana kuli atu eswe, che kwamba, kuli mbunga yeswe ya Izalele, kuli lunga mweswe ni kuli pwo mweswe, mbolo yimuwika ya kujingulula ngwe kazeya, mbolo yimuwika ya kulinga ni mihuko ya tamara, ni mbolo yimuwika ya kulinga ni uva yumu. Mba atu eswe yaya kwo, mutu ni mutu ku zuwo lienyi.
20 Muze Ndawichi ahilukile hanga awahise akwa-zuwo lienyi, Mikale mwana wa Saulu yaya ni kumupatwiza. Yamba ngwenyi: “Musono mwanangana wa Izalele kalihalisa chikolo, kazula mazalo kumeso ja ndungo a mapwo ja tuvumbi twenyi ngwe chize akulinga chihepuke!” 21 Chocho Ndawichi yamba kuli Mikale ngwenyi: “Yami te ngunawahilila kumeso ja Yehova yoze wangusakula yami, shimbu asakule tatenu ni akwa-zuwo lienyi eswe. Kangupwisa kasongo ka A-Izalele, atu ja Yehova. Kashika munguwahilila kumeso ja Yehova, 22 yami mungulipalumwisa nawa chinji kuhiana, mungulinga yuma yize muyisoloka chipwe lume kumeso jami ngwo, nguli mutu wamokomoko. Alioze ngamba a mapwo waze watongola e manguhalisa.” 23 Kashika, Mikale mwana wa Saulu kakasemene ndo ku kufwa chenyi.