Mukanda Wamuchiali wa Samuele
3 Jita hakachi ka akwa-zuwo lia Saulu ni akwa-zuwo lia Ndawichi yiyinunga ha amwe mashimbu. Muze tachi ja Ndawichi te jinayi ni kuliwezela, tachi ja ku zuwo lia Saulu te jinayi ni kukeketela.
2 Ha shimbu liacho, Ndawichi yasema ana mu Heprone. Mwana mutangu jina lienyi Amnone, mwana wa Ahinoame Ka-Yezerele. 3 Mwana wamuchiali Chiliabe, mwana wa Abigale yoze wapwile pwo lia Nabale wa ku Karmela. Wamuchitatu Absalome, mwana wa Maka, mwana wa Talamai mwanangana wa Ngeshure. 4 Mwana wamuchiwana Adonija, mwana wa Hagita. Wamuchitano Shefatia, mwana wa Abitale. 5 Mwana wamuchisambano Itarime, mwana wa Egala pwo lia Ndawichi. Wano e ana waze Ndawichi asemene mu Heprone.
6 Muze jita te muyichinunga hakachi ka akwa-zuwo lia Saulu ni akwa-zuwo lia Ndawichi, Abenere yapwa ni tachi jinji mukachi ka akwa-zuwo lia Saulu. 7 Saulu kapwile ni pwo mukwo jina lienyi Rizipa, mwana wa Aya. Tangwa limwe, Isheboshete yamba kuli Abenere ngwenyi: “Mumu liaka walisumbakenya ni pwo lia tata?” 8 Abenere yevwa uli unji ha maliji waze Isheboshete ambile. Kashika iye yamba ngwenyi: “Shina yami nguli kawa mu Yunda? Ndo musono, nasolola zango lize kulishi kuhwa kuli akwa-zuwo lia tatenu Saulu, kuli mandumbu jenyi ni kuli masepa jenyi. Chipwe yena chakukunjikile ku moko ja Ndawichi. Haliapwila unangusanyika hanga ungwalwile upi uze nalinga mumu lia pwo yono. 9 Zambi angumwese lamba linji nyi yami chakwashile Ndawichi ngwe chize Yehova alishingile kuli iye, 10 hanji ngwetu, mumu kalishingile kuchiza wanangana ku zuwo lia Saulu ni kukolesa ngunja ya Ndawichi hali A-Izalele ni hali A-Yunda, chize ku Ndane ndo ku Mbia-shipa.” 11 Isheboshete kakumbulwile nawa Abenere liji nilimwe mumu te woma anamuvwila.
12 Abenere yatuma mikeji fuji ni matambu kuli Ndawichi hanga amulweze ngwo: “Chifuchi chino chaya?” Yamba nawa ngwenyi: “Linga usendo ni yami, yami mungulinga cheswacho munguhasa hanga ngunehe A-Izalele eswe sali lie.” 13 Ndawichi yamukumbulula ngwenyi: “Kushi mulonga! Mungulinga usendo ni yena. Alioze chuma mungukwita chino: Muze muwiza, kanda usoloka kuli yami chakuhona Mikale, mwana wa Saulu.” 14 Mba Ndawichi yatuma mikeji kuli Isheboshete mwana wa Saulu ngwenyi: “Ngwehe pwo liami Mikale, yoze nambishile ni lukama wa misosha* ya A-Filistea.” 15 Chocho Isheboshete yatambula Mikale kuli lunga lienyi Paltiele mwana wa Laishe. 16 Alioze lunga lienyi yamukaula ni kulila ndo ku Mbahurime. Chocho Abenere yamba kuli iye ngwenyi: “Hiluka ku zuwo lie!” Mba iye yahiluka.
17 Ha shimbu liacho, Abenere yatuma sango kuli makulwana ja A-Izalele ngwenyi: “Nwakuzanga hanga Ndawichi apwe mwanangana wenu. 18 Haliapwila lingenu yize nwazangile. Mumu Yehova kambile kuli Ndawichi ngwenyi: ‘Mungukalamwina atu jami A-Izalele ku moko ja A-Filistea ni ku moko ja akwa-kole jo eswe kupalikila muli kavumbi kami Ndawichi.’” 19 Mwapwa muze, Abenere yahanjika ni A-Mbenjamine. Abenere yaya nawa ku Heprone hanga ahanjike ni Ndawichi kwa ukawo ni kumulweza yize A-Izalele ni A-Mbenjamine alitesele kulinga.
20 Muze Abenere ni malunga 20 waze apwile nenyi ahetele mu Heprone, Ndawichi yalingila Abenere chiteleka ni atu waze apwile hamwe nenyi. 21 Abenere yalweza Ndawichi ngwenyi: “Mwene wami mwanangana, ngutayizenu hanga nguye ngukungulule A-Izalele eswe hanga alinge usendo ni yenu, yenu munupwa mwanangana ha yuma yeswe yize munuzanga.” Chocho Ndawichi yecha Abenere, yaya kwenyi ni sambukila.
22 Ha mashimbu jacho, Joabe ni atu ja Ndawichi te kanakatuka ku jita kuze ayile fuji-fuji, yeza ni upite unji. Abenere te keshi nawa ni Ndawichi mu Heprone, mumu Ndawichi kamwechele aye ni sambukila. 23 Muze Joabe ahetele ni maswalale eswe, yamulweza ngwo: “Abenere mwana wa Nere, kezanga kuli mwanangana, alioze mwanangana kamwecha, kaya ni sambukila.” 24 Kashika Joabe yaya kuli mwanangana, yamulweza ngwenyi: “Mumu liaka nwalinga chuma cha mutapu au? Kuchi Abenere ezanga ni kuhanjika ni yenu, yenu yinumwecha aye ni sambukila? 25 Mwene, nunanyingika kanawa chize apwa Abenere mwana wa Nere! Iye kezanga hanga anwonge, anyingike kuze munwendela, ni yeswe yize nunazange kulinga.”
26 Chocho Joabe yakatuka kumeso ja Ndawichi, yatuma mikeji hanga akaule Abenere. Ayo yamuwana ku shima lia meya lia Sira, yeza nenyi, alioze Ndawichi te kachinyingikine. 27 Muze Abenere afunyine mu Heprone, Joabe yaya nenyi kwa ukawenyi hakamwihi ni chikolo cha mbonge hanga ahanjike nenyi. Kuzekwene, Joabe yamutuwa katana mu jimo, iye yafwa. Kalingile chocho mumu Abenere kashihile mwana-kwo Asahele. 28 Kulutwe, muze Ndawichi evwile yize yalingiwile, yamba ngwenyi: “Yami ni wanangana wami tunasambe kumeso ja Yehova ku miaka yeswe, hakutwala ku manyinga ja Abenere mwana wa Nere. 29 Mulonga wa manyinga ushate hali Joabe ni akwa-zuwo lieswe lia tato. Ku zuwo lia Joabe kukuchi kahona lunga yoze unahita, hanji mukwa-mbumba, hanji umwe lunga chitonji,* hanji mutu yoze mafwa ku katana, hanji mutu yoze mafwa ni zala!” 30 Chocho Joabe ni yayo Abishai yashiha Abenere mumu iye kashihile mwana-kwo Asahele ku jita mu Ngibeone.
31 Ndawichi yamba kuli Joabe ni kuli atu eswe waze apwile nenyi ngwenyi: “Suwenu mazalo jenu, zalenu yikeleyi, lilenu Abenere.” Mwanangana Ndawichi mwene, te kanakaula mu nyima lia atu waze te anambata chipoya. 32 Abenere yamufunda mu Heprone, mwanangana yalila chinji ku fuka lia Abenere. Atu eswe no yalila. 33 Mwanangana yembila Abenere mwaso wa malilo ngwenyi:
“Kuchi Abenere mafwa chize ngwe chihepuke?
34 Moko je te keshi akukasa,
Molu je te keshi akukasa ni malenge.
Wafwa ngwe mutu yoze ashiha kuli yilianyi.”
Chocho atu eswe yaputuka kumulila nawa.
35 Mwapwa muze, atu yaneha mbolo ni kulembejeka Ndawichi hanga alie shimbu te kanda kuchitoka. Alioze iye yalishinga ngwenyi: “Zambi angumwese lamba linji nyi nalia mbolo hanji kulia cheswacho shimbu kanda kuchitoka.” 36 Atu eswe yachimona, yawahilila. Atu yawahilila ha chino ngwe chize te akuwahilila ha yuma yeswe mwanangana apwile ni kulinga. 37 Chocho, atu ja Ndawichi eswe ni A-Izalele eswe yanyingika ha tangwa lize ngwo, hi mwanangana ko washihishile Abenere, mwana wa Nere. 38 Chocho mwanangana yalweza atu jenyi ngwenyi: “Nyingikenu ngwenu, musono mu Izalele mwafwa chilolo, mutu mulemu. 39 Musono ngunazeye chipwe ngwe nguli mwanangana yoze hanawayisa. Kuli yami, malunga wano, ana ja Zeluia kali chinji yilianyi. Yehova afwete mukwa-yitanga yipi kulita ni upi wenyi.”