Akwa-Kuyula
19 Ha matangwa waze, mu Izalele te kumushi mwanangana. Umwe Ka-Levi wa mu chifuchi cha kusuku cha ku milundu cha Eframe, yambata pwo, umwe konkubina wa ku Mbeteleme-Yunda. 2 Alioze konkubina wacho yalumbuka, yahichika mukwo-lunga, yaya ku zuwo lia tato ku Mbeteleme-Yunda, yatwamako tukweji awana. 3 Mba mukwo-lunga yaya ni kumusaka, yaya ni chikwashi wenyi ni yimbulu aali. Mukwo-pwo yamutambula ku zuwo lia tato. Muze tato-weno amumwene, yawahilila chinji. 4 Chocho tato-weno yamwita hanga atwameko matangwa atatu. Ayo yalia, yanwa, iye yapomba kuzekwene.
5 Ha tangwa liamuchiwana, muze ahindukile chimene hanga aye, tato-weno yamulweza ngwenyi: “Liako kama kamwe koma hanga upwe ni tachi, mba nuye.” 6 Chocho, iye ni tato-weno yalia, yanwa hamuwika. Mba tato-weno yamba kuli iye ngwenyi: “Lisesa, pomba nawa kuno ulivwise chiseke.” 7 Muze lunga akatukile hanga aye, tato-weno yamwita nawa hanga atwameko, chocho yapombako nawa.
8 Ha tangwa liamuchitano, muze ahindukile chimene hanga aye, tato-weno yamba kuli iye ngwenyi: “Lisesa, liako kama kamwe koma hanga upwe ni tachi.” Ayo yatwamako ndo chingoloshi, iye ni tato-weno yanunga ni kulia. 9 Muze lunga ni konkubina wenyi ni chikwashi wenyi akatukile hanga aye, tato-weno yamba kuli iye ngwenyi: “Ngunamono hikwatoka. Lisesa pomba nawa kuno, mumu kwilu hikwalaa. Pomba nawa kuno hanga uwahilile. Hamene chimene munuhasa kufuna ku zuwo lienu.” 10 Alioze, lunga katayijile kupombako nawa, chocho yaya ndo ku Yepushe, chekwamba, ku Yerusaleme. Iye kapwile ni yimbulu aali, konkubina wenyi ni chikwashi wenyi.
11 Muze ahetele hakamwihi ni Yepushe, kwilu te kunayi ni kutoka. Chocho, chikwashi wenyi yamuhula ngwenyi: “Shina mutuhasa kumana mu mbonge ya A-Yepushe hanga tupombelemo?” 12 Alioze, mwata wenyi yamukumbulula ngwenyi: “Kutwatambile kupomba mu mbonge ya yilambala, muze kumushi A-Izalele. Twatamba kununga ndo muze mutuheta ku Ngibia.” 13 Iye yamba nawa kuli chikwashi wenyi ngwenyi: “Tulikolwezenu hanga tuhete ku Ngibia hanji ku Rama, kwe mutukapombela.” 14 Kashika yanunga mu wenyi wo, tangwa yiliputuka kunjila muze ahetele hakamwihi ni Ngibia, mbonge ya Mbenjamine.
15 Chocho yaheta mu Ngibia, yanjila mu mbonge hanga apombelemo. Muze anjilile mu mbonge, yatwama mu chota cha mbonge, alioze niumwe kaasanyikine hanga apombele ku zuwo lio. 16 Muze te kunayi ni kutoka, yikwiza umwe lunga kashinakaji yoze te unakatuka ku munda. Kapwile wa mu chifuchi cha ku milundu cha Eframe, alioze te katwama mu Ngibia. Atu waze te atwama mu mbonge yacho kapwile A-Mbenjamine. 17 Muze lunga ahetwile meso yamona ngeji kanatwama mu chota cha mbonge, iye yaahula ngwenyi: “Kulihi nunakatuka?” 18 Iye yakumbulula ngwenyi: “Tunakatuka ku Mbeteleme-Yunda, tunayi ku chifuchi chisuku cha ku milundu cha Eframe, kwe twakatukile. Nayile ku Mbeteleme-Yunda, haliapwila ngunayi ku zuwo lia Yehova, alioze niumwe kangutambwile ku zuwo lienyi. 19 Kulia cha yimbulu tuli nacho, tuli nawa ni mbolo ni vinyu. Kutwahonene chuma nichimwe.” 20 Chocho, mukulwana wacho yamba ngwenyi: “Hwima mbunge! Mungukwaha yeswe yize mufupa. Alioze, kanda upomba mu chota.” 21 Iye yaya no ku zuwo lienyi, yahana kulia kuli yimbulu. Muze te hasana ku molu, yalia, yanwa.
22 Muze te anawahilila, amwe malunga amokomoko a mu mbonge, yajingilika zuwo, yaputuka kungongwela ku chikolo ni kwamba ngwo: “Fwambwisa lunga yoze weza ku zuwo lie hanga tulipombe nenyi.” 23 Chocho mwenya-zuwo yatuhuka yamba kuli ayo ngwenyi: “Ka mandumbu jami, kanda nulinga chuma cha mutapu au. Mutu yono kali ngeji ku zuwo liami. Kanda nulinga chuma chino cha sonyi. 24 Muno muli mwanami wa pwo yoze kanda achilimona ni lunga ni konkubina wa lunga yono. Munguhasa kwaneha haze hanga nwalinge yeswayo munuzanga. Alioze kanda nulinga chuma cha sonyi kuli lunga yono.”
25 Alioze, ayo kamupanjikile. Chocho Ka-Levi yakwata konkubina wenyi yamutwala haze. Ayo yalipomba nenyi ufuku weswe ndo ha mandemba, kamuhwimishine. Muze te kunayi ni kucha, yamwecha. 26 Ha chimenemene pwo yaheta, yalimbukila ku chikolo cha zuwo muze mwapwile mwata wenyi, yanunga hazehene ndo muze kwachile. 27 Muze mwata wenyi ahindukile chimene, yazulula chikolo hanga anunge mu wenyi, mba yamona pwo kali hashi ku chikolo cha zuwo, kanakwate ku kashilu. 28 Iye yamba ngwenyi: “Katuka hanga tuye.” Alioze pwo kamukumbulwile. Chocho, lunga yamuzundula yamusa ha chimbulu, yaya ku zuwo lienyi.
29 Muze ahetele ku zuwo lienyi, yanda poko, yapatula konkubina wenyi mu yipinji 12, yayituma ku minyachi yeswe ya Izalele. 30 Eswe waze achimwene yamba ngwo: “Kanda tuchimona kama chuma chino chize ha tangwa lize twakatukile mu chifuchi cha Engitu ndo musono. Kashika, nyongenu, hanjikenu ha chikuma chino ni kutulweza yize mutulinga.”