Mukanda Wamuchiali wa Samuele
24 Ufwatulo wa Yehova yiukasumuka nawa hali A-Izalele, muze umwe mutu alwezele Ndawichi hanga ambe ngwo: “Yako walule A-Izalele ni A-Yunda.” 2 Chocho, mwanangana yamba kuli Joabe mwata wa tujita yoze te ali nenyi hakamwihi ngwenyi: “Endangana mu minyachi yeswe ya A-Izalele chize ku Ndane ndo ku Mbia-shipa, walule atu hanga ngunyingike unji wo.” 3 Alioze Joabe yamba kuli mwanangana ngwenyi: “Yehova, Zambi yenu, okese atu yisuho 100, ni yenu mwene wami mwanangana nuchimone ni meso jenu. Mba mumu liaka nunazange kwalula atu mwene wami mwanangana?”
4 Nihindu, liji lia mwanangana yilipwa ni tachi kuhiana lia Joabe ni lia miata ja maswalale. Chocho, Joabe ni miata ja maswalale yakatuka kumeso ja mwanangana, yaya hanga alule A-Izalele. 5 Yazauka Yordau, yasa chilombo ku Aroere, sali lia utata lia mbonge yize yatwama mukachi ka mungulunga, yatalikisa kuli A-Ngate mba yaya ku Yazere. 6 Mwapwa muze, yaya ku Ngiliate ku chifuchi cha Tatimi-Hodishi. Mwakatuka kuze, yaya ku Ndanejane ni ku Sendone. 7 Yaya ku mbonge ya Teru yize yapwile yakutunga ni yipanga yikolo, ni ku mambonge eswe ja A-Hevwe, ni ja A-Kanana, mba yaheta ku Mbia-shipa yize yatwama ku Nengeve ya Yunda. 8 Chocho, yendangana mu chifuchi cheswe, yafuna ku Yerusaleme ha kupalika cha tukweji livwa ni matangwa 20. 9 Chocho, Joabe yahana kuli mwanangana unji wa atu waze alwile. Mu Izalele mwapwile tujita 800,000 waze apwile ni tutana, mu Yunda mwapwile atu 500,000.
10 Alioze muze Ndawichi halula atu, mbunge yenyi yiyimuhisa. Ndawichi yamba kuli Yehova ngwenyi: “Yehova navulumuna chinji ha kwalula atu. Ngukonekenenu kama yami kavumbi kenu, mumu nalinga yuma ni uhepuke.” 11 Muze Ndawichi ahindukile chimene, profeta Ngate mukwa-kumona usolwelo, yoze wapwile ni kuhana yiyulo kuli Ndawichi, yatambula sango jino kuli Yehova ngwo: 12 “Yako ulweze Ndawichi ngwe: ‘Yehova kanambe ngwenyi: “Ngunakwehe yuma yitatu, sakula lamba lize unazange ngukumwese.”’” 13 Mba Ngate yaya kuli Ndawichi, yamuhula ngwenyi: “Shina unazange hanga mu chifuchi che mupwe zala ha miaka shimbiali? Nyi unazange kuchina akwa-kole jenu waze manukaujola ha tukweji atatu? Nyi hanji unazange matangwa atatu a yilungo mu chifuchi chenu? Haliapwila nyonga kanawa ungwehe kumbululo lize mungukahana kuli Yoze wangutuma.” 14 Mba Ndawichi yamba kuli Ngate ngwenyi: “Chuma chino chili chikalu chinji kuli yami. Muchiwaha Yehova atushihe mumu kakwete keke yinji, alioze atu kanda atushiha.”
15 Yehova yatuma chilungo mu Izalele, chize chimene ndo ha shimbu lize atesele. Chocho yikufwa atu 70,000 chize ku Ndane ndo ku Mbia-shipa. 16 Muze mungelo olwele kwoko hanga anongese Yerusaleme, Yehova yevwa chinyengo mumu lia lamba. Yamba kuli mungelo yoze te unanongesa atu ngwenyi: “Kwahwa! Palumwisa kwoko.” Mungelo wa Yehova te kali hakamwihi ni chizungwilo cha Arauna Ka-Yepushe.
17 Muze Ndawichi amwene mungelo yoze te unashihi atu, yamba kuli Yehova ngwenyi: “Yami mwe navulumwine, yami mwe nalingile shili. Mba yika mapanga wano alinga? Lisesa, ngumwesenu yami lamba ni akwa-zuwo lia tata.”
18 Ngate yaya kuli Ndawichi ha tangwa lize, yamulweza ngwenyi: “Kanduka ku chizungwilo cha Arauna Ka-Yepushe, utungileko Yehova chilumbilo.” 19 Chocho, Ndawichi yaya kulita ni liji lize Yehova alwezele Ngate. 20 Muze Arauna amwene mwanangana ni tuvumbi twenyi kaneza kuli iye, hazehene Arauna yaya ni kulitakana ni mwanangana, yafulamana kumeso jenyi. 21 Arauna yamuhula ngwenyi: “Mumu liaka mwene wami mwanangana nweza kuli yami kavumbi kenu?” Ndawichi yakumbulula ngwenyi: “Neza ungulanjise chizungwilo, ngutungilemo Yehova chilumbilo hanga ahwise kama chilungo chize aneha hali atu.” 22 Alioze, Arauna yalweza Ndawichi ngwenyi: “Ngunanwehecho mwene wami mwanangana. Lambulenu yeswayo munuzanga. Wenu nawa ngombe wano hanga nwahane ngwe mulambu wa kulumba, ni yuma ya kuzungula nayo ni makanga a ngombe hanga nuyitenge kunyi. 23 Mwanangana, yino yeswe ngunanweheyo.” Arauna yamba nawa kuli mwanangana ngwenyi: “Yehova, Zambi yenu anuvwile kama keke.”
24 Alioze, mwanangana yamba kuli Arauna ngwenyi: “Chino kuchichi kulingiwa, mungulanda chizungwilo. Chichi kuhana kuli Yehova Zambi yami milambu ya kulumba yize kuyangufwikile nichimwe.” Chocho Ndawichi yalanda chizungwilo ni ngombe ni 50 a shekele* ya prata. 25 Ndawichi yatungilamo Yehova chilumbilo, yahana milambu ya kulumba ni milambu ya sambukila. Mba Yehova yevwa kulemba cho hakutwala ku chifuchi, chilungo yichihwa mu Izalele.