Mukanda Wamuchiali wa Samuele
5 Ha kupalika cha mashimbu, minyachi yeswe ya A-Izalele yiyiya kuli Ndawichi ku Heprone, yamulweza ngwo: “Tuli ana a mutu umuwika. 2 Ku mashimbu a kunyima, muze Saulu apwile mwanangana wetu, yenu e nwapwile ni kusongwela A-Izalele ku jita. Yehova yakulweza ngwenyi: ‘Yena mukafunga atu jami A-Izalele, mukapwa mwata wo.’” 3 Makulwana eswe a mu Izalele yaya kuli Mwanangana Ndawichi mu Heprone, Ndawichi yalinga no usendo kumeso ja Yehova mu Heprone. Ayo yawayisa Ndawichi, yapwa mwanangana wa Izalele.
4 Muze Ndawichi apwile mwanangana, te kali ni miaka 30. Yayula ha miaka 40. 5 Iye yayula A-Yunda mu Heprone ha miaka 7 ni tukweji 6. Yayula A-Izalele ni A-Yunda eswe mu Yerusaleme ha miaka 33. 6 Mwanangana ni atu jenyi yaya ku Yerusaleme hanga ase jita ni A-Yepushe waze te atwama mu chifuchi chacho. Ayo yakekuna Ndawichi ngwo: “Yena kuchi kuhasa kunjila muno! Chipwe tupuputa ni yilema makuhuma.” Ayo te kakunyonga ngwo: ‘Ndawichi kechi kuhasa kunjila muno.’ 7 Alioze, Ndawichi yatambula mbonge ya Zaione, yize musono avuluka ngwo, Mbonge* ya Ndawichi. 8 Ha tangwa liacho Ndawichi yamba ngwenyi: “Waze malukukila A-Yepushe, katamba kupalikila mu kapila wa meya hanga ashihe ‘tupuputa ni yilema’ wano waze Ndawichi keshi kuzanga.” Kashika akwamba ngwo: “Tupuputa ni yilema kechi kanjila mu zuwo lino.” 9 Chocho, Ndawichi yatwama mu mbonge ya Zaione yize alukile jina ngwo, Mbonge ya Ndawichi. Ndawichi yaputuka kutunga yipanga ni mazuwo ku Milundu ni ku yihela yeka mu mbonge. 10 Chocho, ndundo ja Ndawichi yijinunga ni kuliweza, Yehova, Zambi wa tujita kapwile hamwe nenyi.
11 Hirame, mwanangana wa Teru, yatuma mikeji kuli Ndawichi. Yatuma nawa mitondo ya sedru, akwa-kusonga mapaya ni akwa-kutunga hanga atunge yipanga. Ayo yatunga nawa zuwo lia Ndawichi. 12 Ndawichi yanyingika ngwenyi, Yehova hakolesa wanangana wenyi mu Izalele, chikwo nawa, hanangamisa wanangana wenyi mumu lia atu jenyi A-Izalele.
13 Muze Ndawichi akatukile mu Heprone, yambata mapwo mu Yerusaleme ni mapwo akwo nawa. Ndawichi yasema nawa ana akwo, a mapwo ni a malunga. 14 Wano e majina ja ana jenyi waze asemukinyine mu Yerusaleme: Shamua, Shobabe, Natane, Solomone, 15 Ibare, Elishua, Nefwe, Yafia, 16 Elisama, Eliada ni Elifelete.
17 Muze A-Filistea anyingikine ngwo Ndawichi hamuwayisa hanga apwe mwanangana wa A-Izalele, ayo eswe yaya ni kumufupa. Muze Ndawichi achinyingikine, yachinyina ku chivwenge. 18 Chocho, A-Filistea yeza yalimwanga mu mungulunga wa Refane. 19 Ndawichi yahula Yehova ngwenyi: “Shina natamba kulimika ni A-Filistea? Shina mwakunjika mu moko jami?” Yehova yakumbulula Ndawichi ngwenyi: “Yako, mumu pundu lume mungwakunjika mu moko je.” 20 Chocho, Ndawichi yaya ku Mbale-Perazime, yashihilako A-Filistea. Kashika Ndawichi yamba ngwenyi: “Yehova hamwanga mikana* ya akwa-kole jami kumeso jami ngwe chize meya akulipulila ene jila.” Kashika avulukile chihela chacho ngwo, Mbale-Perazime.* 21 A-Filistea yahichikako tuzambi two, Ndawichi ni atu jenyi yambata tuzambi twacho.
22 Ha kupalika cha mashimbu, A-Filistea yeza nawa yalimwanga mu mungulunga wa Refane. 23 Ndawichi yahula Yehova, ha chisuho chino iye yamukumbulula ngwenyi: “Kanda walukukila kulutwe. Ajingile kunyima hanga walukukile kulutwe lia yiputa ya amora. 24 Muze muwivwa zungo ngwe zungo lia atu waze anendela ku masongo ja yiputa ya amora, tambuka, mumu Yehova hakutetekela hanga ashihe maswalale ja A-Filistea.” 25 Chocho, Ndawichi yalinga ngwe chize Yehova amulwezele, yashiha A-Filistea chize ku Ngeba ndo ku Ngezere.