Akwa-Kuyula
2 Mungelo wa Yehova yakatuka ku Ngilingali yaya ku Mbokimi, yamba kuli A-Izalele ngwenyi: “Nanuchijile ku Engitu ni kununeha mu chifuchi chize nalakenyene kuli tulamba jenu. Yingwamba nawa ngwami: ‘Chichi kavulama usendo uze nalingile ni yenu. 2 Kashika, yenu kunwatambile kulinga usendo ni atu a mu chifuchi chino, nwatamba kupuzula yilumbilo yo.’ Alioze yenu kunwapanjikile liji liami. Mumu liaka nwalinga chuma chino? 3 Kashika nambile ngwami: ‘Chichi kaahuma kumeso jenu, ayo kumakapwa muheto kuli yenu, tuzambi jo makanupiangula.’”
4 Muze mungelo wa Yehova ambile maliji wano, A-Izalele eswe yaputuka kulila. 5 Kashika alukile chihela chacho jina ngwo, Mbokimi.* Hazehene yahana yitapo kuli Yehova.
6 Muze Yoshua echele A-Izalele hanga aye kwo, ayo yaya hanga atambule chihinga cho. 7 Atu yanunga ni kuwayila Yehova ha matangwa eswe a Yoshua ni ha matangwa eswe a makulwana waze te achili ni mwono muze Yoshua afwile. Makulwana jacho kamwene yikomokeso yinene-yinene yize Yehova alingile hali A-Izalele. 8 Kulutwe lia yuma yino, Yoshua mwana wa Nune, kavumbi ka Yehova yafwa muze te ali ni miaka 110. 9 Chocho yamufunjila mu njiza ya chihinga chenyi, ku Timna-Here, mu chifuchi cha milundu cha Eframe, ku sango lia Mulundu wa Ngasha. 10 Chisemuko chacho cheswe yichifwa, mba yikwiza chisemuko chikwo chize te chanyingikine Yehova chipwe yize alingile hali A-Izalele.
11 Chocho A-Izalele yalinga yuma yipi kumeso ja Yehova, yawayila Ambale. 12 Ayo yehuka Yehova, Zambi wa yisemi jo, yoze wachijile mu chifuchi cha Engitu. Yakaula tuzambi akwo, tuzambi ja atu waze alisulangana no, yafulamana kumeso jo, ayo yatuka Yehova. 13 Yahichika Yehova, yawayila Mbale ni tuponya a Asatarote. 14 Chocho, ufwatulo wa Yehova yiwiza hali A-Izalele, yaahana kuli akwa-kole jo hanga aapinjise ni kwanda upite wo. Iye yaakunjika ku moko ja akwa-kole waze te alisulangana no, kakahashile kulikalila kuli akwa-kole jo. 15 Kweswako kuze te akuya, Yehova te kakulimika no ni kwanehena lamba ngwe chize Yehova ambile ni chize Yehova alishingile, ayo te kakupinda chinji. 16 Chocho, Yehova yaaha akwa-kuyula waze te akwalamwina ku moko ja akwa-kole jo.
17 Alioze, ayo kakapanjikile akwa-kuyula, yalinga ukoi ni tuzambi akwo ni kufulamana kumeso jo. Yapianguka kawashi-washi mu jila ya tulamba jo waze te akwononokena shimbi ja Yehova. Kakakawile chilweza cho. 18 Muze Yehova te akwaha mukwa-kuyula, Yehova te kakukwasa mukwa-kuyula hanga aalamwine ku moko ja akwa-kole jo ha matangwa eswe a mukwa-kuyula wacho. Yehova te kakwevwila keke mumu lia kulinyenga cho hamukunda wa lamba lize akwa-kole jo te akwamwesa.
19 Alioze, muze mukwa-kuyula te akufwa, ayo te kakulinga yuma yipi chinji kuhiana yisemi jo ha kukaula tuzambi akwo ni kwawayila. Ayo te keshi kwecha yitanga yo yipi chipwe uhulia wo. 20 Chocho ufwatulo wa Yehova yiwiza hali A-Izalele, iye yamba ngwenyi: “Vungu lino liehuka usendo wami uze nalingile ni tulamba jo, chipwe liji liami kalikawile, 21 kashika, chichi kahuma kumeso jo mavungu waze Yoshua ahichikile muze afwile. 22 Mungulinga chino hanga ngumone nyi A-Izalele menda mu jila ya Yehova ngwe chize tulamba jo alingile.” 23 Kashika Yehova echele hanga mavungu jacho anunge. Iye kakaahumine kawashi-washi chipwe kwakunjika ku moko ja Yoshua.