Kuli A-Ngalashia
5 Kristu hanatutusula hanga tuwahilile ni utuswilo wacho. Kashika, manenu nguu, kanda nulinjisa cheka nawa ku kanga ya undungo.
2 Talenu! Yami Paulu, ngunambe kuli yenu ngwami, nyi manupwisa ngalami, yize Kristu alingile kuyichi kanuyukisa. 3 Ngunashindakenya cheka nawa ngwami, mutu mweswe yoze malipwisa ngalami, chamutamba kumanununa Shimbi jeswe. 4 Yenu waze nwakufupa kupwa akwa-ululi kupalikila mu shimbi, hinwalihandununa ni Kristu, hinwalichiza ku chawana chenyi cha keke. 5 Mba hakutwala kuli yetu, kupalikila mu spiritu, tunashimbwila ni mbunge yeswe ululi uze wakwiza mumu lia ufulielo. 6 Mumu, kuli tumbaji a Kristu Yesu, chipwe ungalami, chipwe ulima, kuyishi ni ulemu niumwe. Alioze, chuma chilemu chili ufulielo uze wakwiza mumu lia zango.
7 Yenu nwapwile ni kuzomboka kanawa. Mba iya wanukwikile kununga ni kwononokena umwenemwene? 8 Malongeso a waze anukwikile kakatukile kuli yoze unanutambika. 9 Futunwiso yikepe, yakufutunwisa mwaha weswe. 10 Ngunafuliela ngwami, yenu waze nunalinungu ni Mwene, kunuchi kupwa ni manyonga eka. Alioze, yoze wakunupinjisa, chipwe ngwe kali mutu mweswawo, makapwa ni upatwilo uze wamutela. 11 Kashika mandumbu, hakutwala kuli yami, nyi te ngunachinungu ni kwambujola hakutwala ku ungalami, kachi kanguhungumionene. Chipwe malongeso jami hakutwala ku kufwa cha Yesu ha mutondo* wa lamba, kachi kalemekene nawa atu. 12 Ngunazange hanga atu waze ananulweze ngwo, katamba kunupwisa ngalami, alipwise* ene kuhiana.
13 Mandumbu, yenu anutambikile ku utuswilo. Kashika, kanda numona utuswilo wacho ngwe jila ya kulingilamo usolo wa ku musunya. Alioze, mumu lia zango, kalakalenu ngwe ndungo umwe kuli mukwo. 14 Mumu Shimbi jeswe jinamanunuka mu Shimbi yimuwika, ngwo: “Zanga mwenyembo we ngwe chize wakulizanga yena mwene.” 15 Alioze, nyi yenu munununga ni kulilemeka ku mbunge, ni kulimika umwe ni mukwo, kanyamenu. Mumu nyi ka, munulinongesa yenu ene.
16 Kashika, ngunambe ngwami: Nungenu ni kwenda mu spiritu, mba kunuchi kumanununa usolo wa musunya. 17 Mumu musunya ni usolo wawo kuwakulimika ni spiritu, ni spiritu neyo yakulimika ni musunya. Yino yuma yiali kuyakulimika chimwe ni chikwo. Kashika yenu kunushi kulinga yuma yize nwakuzanga kulinga. 18 Chikwo nawa, nyi spiritu muyinusongwela, kunushi mushi lia shimbi.
19 Yitanga ya musunya yakusoloka zwalala. Yitanga yacho yili: Utanji,* luchisa, yitanga ya sonyi, 20 kukombelela mahamba, kupanda,* kole, vunda, ukwa, ufwatulo, kulitachika, kulihandununa, kukaula malongeso ja atu, 21 chipululu, kuzengewa, yiwanyino ya chimbangwinya, ni yuma yikwo ngwe yino. Ngunanutoweza hakutwala ku yuma yino ngwe chize naliangile kunutoweza ngwami, waze akulinga yuma yino, kechi kahinga Wanangana wa Zambi.
22 Alioze muhuko wa spiritu uli uno: Zango, uwahililo, sambukila, kulihumikiza,* utu, upeme, ufulielo, 23 kushimbika ni kusuula. Kukushi shimbi niyimwe yize yakulimika ni yitanga yacho. 24 Chikwo nawa, tumbaji twa Kristu Yesu, hanahachila ha mutondo mijimba yo ya shili ni usolo wo upi.
25 Nyi mututwama kulita ni spiritu, tunungenu nawa ni kwenda kulita ni spiritu. 26 Kanda tupwa akwa-kuzo, kanda tulitesa umwe ni mukwo, chipwe kulivwila chipululu umwe ni mukwo.