Mukanda Wamuchiali wa Samuele
17 Ahitofele yalweza Absalome ngwenyi: “Lisesa, ngweche ngusakule malunga 12,000 hanga musono ufuku tukaule Ndawichi. 2 Yami mungumulukukila muze iye hahonga, mungumuvwisa woma, eswe waze ali nenyi machina, mungushiha wika mwanangana. 3 Mungufunyisa atu eswe kuli yena. Nyi nashiha mutu yoze unafupa-fupa, atu eswe mahiluka kuli yena, chocho eswe matwama ni sambukila.” 4 Absalome ni makulwana eswe a mu Izalele, yazanga nyonga lia Ahitofele.
5 Alioze Absalome yamba ngwenyi: “Tusanyikenu nawa Hushai, Ka-Arke, hanga twivwe yize mamba.” 6 Chocho, Hushai yaya kuli Absalome. Mba Absalome yamulweza ngwenyi: “Lino lie nyonga lia Ahitofele. Twatamba kukaula nyonga lienyi nyi ka? Nyi ka, tulweze yize twatamba kulinga.” 7 Hushai yamba kuli Absalome ngwenyi: “Chiyulo chize Ahitofele ahana chisuho chino kuchapemene.”
8 Hushai yamba nawa ngwenyi: “Yena unanyingika kanawa ngwe, tatenu ni atu waze ali nenyi kali yitakame, kali ni uli unji ngwe ursu yoze watokesa ana jenyi mu yambu. Chikwo nawa, tatenu kali kajita, kechi kupomba hamuwika ni atu. 9 Ha mashimbu wano kota kanaswame mu chivwenge hanji mu chihela chikwo cheswacho. Nyi iye malianga kutulukukila, waze machivwa mamba ngwo: ‘Atu waze ali sali lia Absalome kaakumba!’ 10 Chipwe lunga yoze ukwete hamu, ukwete mbunge ngwe ya ndumba, makachikima ni woma, mumu A-Izalele eswe kananyingika ngwo, tatenu kali kajita wa ndundo, kananyingika nawa ngwo atu waze ali nenyi kali akwa-hamu. 11 Chiyulo chami chili chino: Kungulula A-Izalele eswe, chize ku Ndane ndo ku Mbia-Shipa apwe ni yena, apwe ngwe masekeseke a ku sesa lia kalunga-lwiji, yena mwe watamba kwasongwela ku jita. 12 Yetu mutumulukukila kweswako kuze mutumuwana, mutumulukukila ngwe chize mume wakusotokela hashi, mutumunongesa hamuwika ni atu jenyi eswe, niumwe hakachi ko mamona mwono wakuhi. 13 Nyi iye maswama mu yimwe mbonge, A-Izalele eswe makayamo ni ngoji, mutumbulumuna mbonge yacho ndo mu mungulunga, chipwe kaliwe kamuwika kukechi kusalamo.”
14 Chocho, Absalome ni A-Izalele eswe yamba ngwo: “Chiyulo cha Hushai Ka-Arke, chinapeme kuhiana chiyulo cha Ahitofele!” Mumu Yehova te hatesa kulumbanganyisa chiyulo chipema cha Ahitofele. Yehova kalingile chino hanga anehe lamba hali Absalome.
15 Kulutwe, Hushai yamba kuli asasendote Zadoke ni Abiatare ngwenyi: “Chenacho Ahitofele alweza Absalome ni makulwana a mu Izalele, alioze ni yami namwaha chiyulo. 16 Haliapwila, tuma lusango yono ni kawashi kuli Ndawichi ngwe: ‘Kanda nupombela ha chau chize chatwama hakamwihi ni puya, alioze tambwisenuko nuzauke lwiji, nyi ka, manunongesa yenu mwanangana ni atu jenu eswe.’”
17 Jonata ni Ahimaze te kanashimbwila mu Ene-Rogele. Mumu te kasolo kusa mwono wo mu ponde ha kunjila mu mbonge. Umwe kavumbi wa pwo yaatwalila lusango, ayo yaya hanga alweze Ndawichi. 18 Alioze umwe mukweze yaamona, chocho yatoweza Absalome. Kashika, Jonata ni Ahimaze yakatuka kawashi-washi, yaheta ku zuwo lia umwe lunga yoze te ukwete shima lia meya mu yiize ya zuwo lienyi ku Mbahurime. Ayo yaswama mu shima liacho, 19 mba pwo lia lunga wacho yafuka ku kanwa lia shima, helu yasaho mbuto ja kutwa kulu. Niumwe kachinyingikine. 20 Tuvumbi twa Absalome yaheta ku zuwo lia pwo wacho, yamuhula ngwo: “Ahimaze ni Jonata kulihi ali?” Pwo yakumbulula ngwenyi: “Ayo katalikisa ku lwiji.” Atu jacho yafupa Ahimaze ni Jonata, alioze kaamwene. Chocho yafuna ku Yerusaleme.
21 Muze atu jacho te haya kwo, Ahimaze ni Jonata yatuhuka mu shima lia meya, yatwala lusango kuli Mwanangana Ndawichi. Ayo yamulweza ngwo: “Zaukenu lwiji ni kawashi, mumu Ahitofele kahana chiyulo chichi ni chichi cha kulimika ni yenu.” 22 Hazehene, Ndawichi ni atu eswe waze apwile nenyi, yaputuka kuzauka lwiji Yordau. Muze kwachile, atu eswe te hahwisa kuzauka lwiji Yordau.
23 Muze Ahitofele amwene ngwenyi chiyulo chenyi kachikawile, yanyina ha chimbulu chenyi, yaya ku zuwo lienyi mu mbonge yo. Yahana usongwelo kuli akwa-zuwo lienyi, yalisukika. Yafwa, yaya ni kumufunda ku fuka lia tulamba twenyi.
24 Ha shimbu liacho, Ndawichi yaya ku Mahaneme, Absalome yazauka lwiji Yordau hamwe ni maswalale eswe ja Izalele. 25 Absalome yasalakanyisa Amasa ha chihela cha Joabe hanga asongwele chizavu cha tujita. Amasa te mwana wa umwe Ka-Izalele avuluka ngwo, Itara, yoze walisumbakenyene ni Abigale mwana wa Nahashi, mwana-kwo ya Zeluia, naye ya Joabe. 26 Absalome ni malunga a mu Izalele, yasa chilombo ku Ngiliate.
27 Muze Ndawichi ahetele ku Mahaneme, Shobi, mwana wa Nahashi wa ku Raba, wa ku vungu lia A-Amone, ni Makire mwana wa Amiele wa ku Lo-Debare, ni Bazilai Ka-Ngiliate, wa ku Rogelime, 28 yaneha mihela, mbashila, mandoho a uma, tiliku, sevada, unga, mbuto ja kukanga, makunde, landa ni mbuto yumu. 29 Yaneha nawa uchi, mantega, mapanga ni keju. Yuma yino yeswe, yayineha kuli Ndawichi, ni kuli atu waze te ali nenyi hanga alie, yamba ngwo: “Atu kanafu ni zala, pwila, ni kuhonga mu puya.”