Mukanda Utangu wa Mianangana
21 Hakupalika cha mashimbu, yikusoloka chikuma chinatale ha munda wa uva wa Nabote Ka-Yezerele. Munda wacho wapwile mu Yezerele hakamwihi ni zuwo lia Ahabe, mwanangana wa Samaria. 2 Chocho Ahabe yalweza Nabote ngwenyi: “Ngwehe munda we wa uva hanga ngulimemo yilima-lima, mumu uli hakamwihi ni zuwo liami. Mungukwaha munda weka upema unahiana uno. Nyi muzanga mungukwaha mbongo jize mujifwika munda wacho.” 3 Alioze, Nabote yakumbulula Ahabe ngwenyi: “Yami chatambile kukwaha chihinga cha tulamba twami. Mumu nakulemesa chinji Yehova.” 4 Chocho, Ahabe yanenganyana chinji, yanjila mu zuwo lienyi, mumu Nabote Ka-Yezerele hamwamba ngwenyi: “Chatambile kukwaha chihinga cha tulamba twami.” Kashika, iye yaya yapomba ha muhela wenyi; yatala kweka; yalituna kulia.
5 Alioze mukwo-pwo Jezebele yaya ni kuhanjika nenyi, yamuhula ngwenyi: “Lunga liami, mumu liaka unanenganyana chichize chipwe kulia kuwazangile kulia?” 6 Iye yamukumbulula ngwenyi: “Nalweza Nabote Ka-Yezerele ngwami: ‘Ngulanjise munda we wa uva, nyi muzanga mungukwaha munda weka upema kuhiana uno.’ Alioze, iye kangukumbulula ngwenyi: ‘Chichi kukwaha munda wami.’” 7 Mukwo-pwo Jezebele yamwamba ngwenyi: “Ngwami yena uli mwanangana mu Izalele? Hinduka ulie kamwe koma hanga mbunge ye yiwahilile. Yami mungukwaha munda wa uva wa Nabote, Ka-Yezerele.” 8 Chocho, Jezebele yasoneka mikanda mu jina lia Ahabe, yayijika ni chijikilo chenyi, yayituma kuli makulwana ni alemu waze te atwama mu mbonge ya Nabote. 9 Ha mikanda yacho yasonekaho ngwenyi: “Sakulenu tangwa lize munulitwamina kulia hanga nutwamise Nabote kumeso ja atu eswe. 10 Sakulenu malunga aali amokomoko hanga amuliongele ngwo: ‘Yena washililika Zambi ni mwanangana.’ Mba munumutwala haze lia mbonge numwase mawe ndo muze mafwa.”
11 Chocho, malunga a mu mbonge ya Nabote, makulwana ni alemu waze te atwama mu mbonge yacho, yalinga yize Jezebele anakaasonekena. 12 Yasakula tangwa lia kulitwamina kulia, ayo yatwamisa Nabote kulutwe lia atu eswe. 13 Mba malunga aali amokomoko yeza, yatwama kulutwe lia Nabote ni kumuliongela kumeso ja atu ngwo: “Nabote kashililika Zambi ni mwanangana.” Chocho, yamutwala haze lia mbonge, yamwasa mawe, yafwa. 14 Mba yatuma kulweza Jezebele ngwo: “Nabote hamwasa mawe, hafwa.”
15 Muze Jezebele anyingikine ngwenyi, Nabote hafwa. Iye yalweza Ahabe ngwenyi: “Katuka, yako uzuke munda wa uva uze Nabote Ka-Yezerele alitunanga kukulanjisa, mumu Nabote hafwa.” 16 Muze Ahabe evwile ngwenyi Nabote hafwa, hazehene yapalumuka mu munda wa uva wa Nabote Ka-Yezerele hanga auzuke, upwe niwenyi.
17 Alioze Yehova yalweza Eliya, Ka-Tishibe ngwenyi: 18 “Yako kawashi-washi uliwane ni Ahabe mwanangana wa Izalele, uli mu Samaria. Iye kali mu munda wa uva wa Nabote, kayamo hanga auzuke. 19 Mulweze ngwe: ‘Yehova kanambe ngwenyi: “Hiwashiha mutu, haliapwila unazange kutambula nawa chihinga chenyi?”’ Mulweze nawa ngwe: ‘Yehova kanambe ngwenyi: “Mu chihela muze tuwa alesela manyinga ja Nabote, mwenamo nawa tuwa makalesela manyinga je.”’”
20 Ahabe yamba kuli Eliya ngwenyi: “Ena mukwa-kole wami, hiwanguwana nyi?” Iye yakumbulula ngwenyi: “Ewa, hinakuwana. Zambi kanambe ngwenyi: ‘Yena hiwatesa kulinga yuma yipi kumeso ja Yehova, 21 kashika nyingika ngwe, mungukumwesa lamba, mungukunongesa; mungunongesa mu Izalele malunga eswe a ku zuwo lia Ahabe, apwe mwana-shiwa chipwe mulelu. 22 Munyachi we munguulinga ngwe chize nalingile ku munyachi wa Jeroboame, mwana wa Nebate ni munyachi wa Mbasha mwana wa Ahija, mumu wakasumuna utenu wami ni kuvulumwisa A-Izalele.’ 23 Yehova yamba nawa hakutwala kuli Jezebele ngwenyi: ‘Tuwa makalia Jezebele mu chihela cha ku Yezerele. 24 Akwa-zuwo lia Ahabe waze mafwila mu mbonge, makaalia kuli tuwa, waze mafwila mu yambu, makaalia kuli tujila. 25 Kwamba pundu, kanda kuchipwa kama mutu yoze walingile yuma yipi chinji kumeso ja Yehova kuhiana Ahabe, yoze apwile ni kusupwila kuli mukwo-pwo Jezebele. 26 Iye kalingile yuma yipi chinji ha kuwayila tuponya a chizelwokeso ngwe chize alingile A-Amore eswe waze Yehova ahumine kumeso ja A-Izalele.’”
27 Muze Ahabe evwile maliji wano, yasuwa mazalo jenyi, yazala chikeleyi, yalitwamina kulia, yapomba ha chikeleyi ni kunenganyana chinji. 28 Chocho, Yehova yalweza Eliya, Ka-Tishibe ngwenyi: 29 “Wamona chize Ahabe alikehesa kuli yami? Mumu lia kulikehesa kumeso jami, chichi kuneha luyinda muze achili ni mwono. Alioze, luyinda wacho mungukamuneha kuli akwa-zuwo lienyi ha matangwa ja mwanenyi.”