Shimbi Yamuchiali
19 “Muze Yehova Zambi yenu, manongesa mavungu a mu chifuchi chize Yehova Zambi yenu manwaha, munuchitambula ni kutwama mu mambonge ni mu mazuwo jo, 2 nwatamba kusakula mambonge atatu mu chifuchi chize Yehova Zambi yenu manwaha ngwe chihinga. 3 Nwatamba kuteta mu yihanda yitatu chifuchi chize Yehova Zambi yenu manwaha ngwe chihinga ni kululieka matapalo jamo hanga mutu yoze mashiha mukwo ahase kuchinyina mu yimwe ya ku mambonge jacho.
4 “Yino ye nwatamba kulinga kuli mutu yoze mashiha mukwo mba machinyinamo hanga anunge ni mwono: Muze iye mashiha mwenyembo wenyi chakuhona kumuhalila hanji kumuvwila kole, 5 ngwe chilweza, nyi iye maya mu yambu ni mwenyembo wenyi ni kuchaha kunyi, mba ha kuzundula njimbu hanga apatule mutondo njimbu muyisokoka ku muhinyi muyilamba mwenyembo wenyi ni kumushiha, mutu wacho katamba kuchinyina mu yimwe ya ku mbonge yacho hanga anunge ni mwono. 6 Alioze, nyi mbonge muyipwa kusuku chinji, mukwa-kukala manyinga mahasa kumukaula hanga amushihe, mumu mbonge yili kusuku chinji. Chipwe chocho, iye katambile kufwa, mumu te keshi kuvwila kole mwenyembo wenyi. 7 Kashika ngunanulweze ngwami: ‘Sakulenu mambonge atatu.’
8 “Nyi Yehova Zambi yenu matohwesa njiza yenu ngwe chize alakenyene kuli tulamba jenu ni kunwaha chifuchi cheswe alakenyene kuhana kuli tulamba jenu, 9 iye machilinga wika nyi munukaula shimbi jeswe jize ngunanulweze musono ni kuzanga Yehova Zambi yenu ni kwenda mu majila jenyi ku miaka yeswe. Muze njiza yenu mayitohwesa, munusakula nawa mambonge akwo atatu a uchinyino. 10 Chino muchikwasa hanga ahone kumwanga manyinga ja mukwa-kusamba mu chifuchi chize Yehova Zambi yenu manwaha ngwe chihinga, chocho yenu kunuchi kupwa ni mulonga wa manyinga.
11 “Alioze, nyi lunga yoze wakuvwila mwenyembo wenyi kole, mamushimbwila mu jila hanga amulambe mba mamushiha, chocho lunga wacho machinyina mu yimwe ya ku mbonge jacho, 12 makulwana a mu mbonge yenyi katamba kutuma hanga amusake amuhane ku moko ja mukwa-kukala manyinga, lunga wacho katamba kufwa. 13 Kanda numuvwila keke, fwetesenu manyinga ja mukwa-kusamba mukachi ka Izalele hanga yuma yeswe yende kanawa ku mwono wenu.
14 “Muze munutambula chihinga mu chifuchi chize Yehova Zambi yenu manwaha, kunwatambile kututulula njiza ya mwenyembo wenu mu chihela chize tulamba jenu ayijikile.
15 “Kunwatambile kuhisa mutu yoze mahengesa hanji yoze malinga shili mumu lia chela umuwika. Nwatamba kupatwila mutu wacho kulita ni yize yela aali hanji atatu mamba. 16 Nyi mutu maliongela mukwo yuma ya saki ni kumusuma mulonga uze kalingile, 17 malunga aali waze analihangujola akamane kumeso ja Yehova ni ja asasendote ni kumeso ja ngaji waze anakalakala ha matangwa jacho. 18 Ngaji mahengwola kanawa chikuma chacho, mba nyi mamona ngwo lunga wacho kanambe yuma ya mahuza, kasuma ndumbwenyi mulonga uze kalingile, 19 nwatamba kulinga kuli iye chizechene anazange kulinga kuli ndumbwenyi. Nyi nwachilinga, munuchiza upi mukachi kenu. 20 Atu akwo muze mevwa lusango yono, mevwa woma, kechi keza kalinga nawa chuma cha mutapu au mukachi kenu. 21 Kunwatambile kwivwa keke: Munufwetesa mwono ni mwono, liso ni liso, lizo ni lizo, kwoko ni kwoko ni kulu ni kulu.