Shimbi Yamuchiali
4 “Haliapwila yenu A-Izalele, panjikenu shimbi ni yiyulo ni upatwilo ngunanulongesa kwononokena hanga nutwame ni mwono ni kunjila mu chifuchi chize Yehova, Zambi ya tulamba jenu manwaha ni kutwamamo. 2 Kanda nuchiza chipwe kuwezela maliji ha shimbi jize ngunanwehe, kaulenu shimbi ja Yehova Zambi yenu, jize ngunanwehe.
3 “Meso jenu kamwene yize Yehova alingile ha chikuma cha Mbale-Peore. Yehova Zambi yenu, kanongesene malunga eswe anakawayila Mbale-Peore. 4 Alioze, yenu nuchili ni mwono ndo musono mumu nwakujikijila kuli Yehova Zambi yenu. 5 Talenu, nanulongesa shimbi, yiyulo ni upatwilo ngwe chize Yehova Zambi yami angutumine hanga nuyikaule mu chifuchi chize munuhinga. 6 Nwatamba kuyikaula kanawa, mumu nyi nwachilinga, munusolola mana ni chinyingi kuli atu waze makevwa hakutwala ku shimbi jacho. Ayo makamba ngwo: ‘Vungu lino likwete mana ni chinyingi.’ 7 Mumu vungu lika likwete tuzambi jo hakamwihi ngwe chize Yehova Zambi yetu ali hakamwihi ni yetu shimbu lieswe lize mutumusanyika? 8 Shina kuli vungu linene lize lili ni shimbi jingunu ni yiyulo ni upatwilo, ngwe Shimbi jeswe jize ngunanwehe musono?
9 “Alioze, kanyamenu ni kupanjika kanawa nuhone kuvulama yuma yize meso jenu amwene hanga yichine kukatuka ku mbunge jenu matangwa eswe a mwono wenu. Chikwo nawa, yilwezenu ana jenu ni ajikulu jenu. 10 Ha tangwa lize nwamanyine kumeso ja Yehova Zambi yenu, ku Horepe, Yehova yangulweza ngwenyi: ‘Kungulula atu kumeso jami hanga apanjike maliji jami mba alilongese kungulemesa matangwa eswe matwama mu chifuchi ni kulongesa ana jo.’
11 “Chocho yenu yinukundama, yinumana ku sesa lia mulundu, mba mulundu wakwachile kahia, kahia kaze kahetele mwilu, kwapwile milima, malelwa ni milima yinji. 12 Mba Yehova yaputuka kuhanjika mukachi ka kahia. Yenu nwevwile wika maliji, kunwamwene chuma nichimwe, nwevwile wika maliji. 13 Iye yanulumbunwina usendo wenyi, chekwamba, Kumi lia Shimbi ni kunulweza hanga nujononokene. Iye yajisoneka ha mawe aali. 14 Ha shimbu liacho, Yehova yangulweza hanga ngunulongese shimbi ni yiyulo ni upatwilo uze nwatamba kukaula muze mununjila mu chifuchi chize munukahinga.
15 “Alioze, amu yenu nwakamwene chuma nichimwe ha tangwa lize Yehova ahanjikile ni yenu ku Horepe kupalikila mu kahia, haliapwila panjikenu kanawa 16 hanga nuchine kupianguka ha kulinga kaponya wa kwola yoze unalifu ni mujimba weswawo wa lunga hanji wa pwo, 17 hanji unalifu ni kashitu mweswawo watwama hano hashi, yoze unalifu ni kajila mweswawo wakuhumuka mu malilu, 18 chipwe unalifu ni kashitu mweswawo yoze wakukalala hashi hanji unalifu ni yishi mweswawo yoze uli mu meya. 19 Muze mutala mu malilu ni kumona tangwa, kakweji, tutongonoshi ni yuma yeswe yize yatwama mu malilu, kanda yinupiangula chipwe kufulamana kumeso ja yuma yacho chipwe kuyiwayila. Mumu Yehova Zambi yenu, hanahane yuma yeswayi kuli atu waze atwama hano hashi. 20 Alioze, yenu e Yehova achijile ku Engitu, kwe ku lutengo wa utale hanga nupwe atu jenyi ni chihinga chenyi ngwe chize nuli musono.
21 “Yehova yanguvwila uli mumu lia yenu, kashika alishingile ngwenyi, kechi kungwecha hanga nguzauke Yordau chipwe kunjila mu chifuchi chipema chize Yehova Zambi yenu manwaha ngwe chihinga. 22 Yami mungufwila mu chifuchi chino, chichi kazauka Yordau, yenu munukazauka Yordau ni kuhinga chifuchi chipema. 23 Nwatamba kukanyama hanga nuchine kuvulama usendo uze Yehova Zambi yenu alinga ni yenu, kanda nulinga kaponya niumwe wa kwola yoze unalifu ni chuma chize Yehova Zambi yenu anukanjisa. 24 Mumu Yehova Zambi yenu, kali ngwe kahia kaze kakwocha, kali Zambi yoze wakuzanga hanga amuwayile wika iye.
25 “Nyi yenu munupwa ni ana ni ajikulu, mba munutwama mu chifuchi ha mashimbu anji, alioze munulinga yuma yipi ha kulinga kaponya wa kwola wa chuma cheswacho ni kulinga yuma yipi kumeso ja Yehova Zambi yenu ni kumuhona vumbi, 26 musono ngunase chuma cheswe mu malilu ni hano hashi hanga chipwe chela kuli yenu ngwami, yenu munukakuwa kawashi mu chifuchi chize munukahinga ha kuzauka Yordau. Kunuchi katwamamo mashimbu anji, munukakuwa eswe. 27 Yehova makanumwanga hakachi ka atu, alioze amwe a kuli yenu wika e makalilamwina hakachi ka mavungu kuze Yehova makanumwangina. 28 Kwe kuze yenu munukawayila tuzambi a mapaya ni a mawe akulinga kuli atu, tuzambi waze keshi kumona, keshi kwivwa, keshi kulia chipwe kwivwa vumba.
29 “Kuzekwene, nyi munufupa Yehova Zambi yenu ni mbunge yenu yeswe ni mwono wenu weswe, pundu lume, kumunukamuwana. 30 Ha shimbu liacho, muze munupwa ni kapinda munji ni kumona ngwenu yuma yeswe ayi yinalingiwa kuli yenu, chocho munukafuna kuli Yehova Zambi yenu ni kupanjika liji lienyi. 31 Mumu Yehova Zambi yenu, kali Zambi wa keke. Iye kechi kanuhichika chipwe kununongesa, chipwe kuvulama usendo uze alishingile kuli tulamba jenu.
32 “Haliapwila, hulenu hakutwala ku matangwa akunyima muze te kanda nuchisemuka, chize ha tangwa lize Zambi atangile mutu. Talenu ku songo limwe lia malilu ndo ku songo likwo. Shina hikunalingiwa kama chuma chinene ngwe chino? Shina hinunevu kama chuma ngwe chino? 33 Shina atu akwo hanevu Zambi mahanjika mukachi ka kahia ngwe chize yenu nwevwile, alioze yinununga ni mwono? 34 Nyi shina Zambi haneseka kusakula vungu mukachi ka vungu likwo ni upatwilo ni yilayi ni yikomokeso ni jita ni kwoko lia ndundo ni kwoko lia kwolola ni yitanga yinene ya kukolesa woma ngwe chize Yehova Zambi yenu alingile ni yenu ku Engitu kumeso jenu? 35 Yuma yino kanakayisolola wika kuli yenu hanga te nunyingike ngwenu, Yehova kali Zambi wamwenemwene, kuchizako iye, kukushi nawa Zambi mukwo. 36 Iye yanwecha nwivwe liji lienyi kukatuka mu malilu hanga anufumbe, mba hano hashi iye yecha hanga numone kahia kenyi kanene, chocho yenu yinwivwa liji lienyi mukachi ka kahia.
37 “Amu iye azangile chinji tulamba jenu ni kusakula munyachi wo, yanuchiza mu Engitu kupalikila mu ndundo jenyi jinene. 38 Iye kahumine kumeso jenu mavungu anene-anene a tachi jinji kuhiana yenu hanga anunjise mu yifuchi yo ni kunwahayo ngwe chihinga, ngwe chize nunamono musono. 39 Kashika chize musono nyingikenu ngwenu, Yehova mwe Zambi wamwenemwene mu malilu ni hano hashi. Kukushi Zambi mukwo. 40 Fungenu yiyulo ni shimbi jenyi jize ngunanwehe musono hanga yuma yeswe yende kanawa ku mwono wenu ni ku mwono wa ana jenu mba nukatwame miaka yinji mu chifuchi chize Yehova Zambi yenu manwaha.”
41 Ha mashimbu jacho, Mose yahandununa mambonge atatu ku chivumbuko cha Lwiji Yordau. 42 Nyi mutu mashiha mukwo chakuhona kumuhalila chipwe kumuvwila kole, iye katamba kuchinyina ku yimwe ya ku mambonge jacho hanga anunge ni mwono. 43 Mambonge jacho kali wano: Mbezere yili mu puya mu chana kuli A-Rupene, Ramote mu Ngiliate kuli A-Ngate, Ngolane mu Mbashane kuli A-Manase.
44 Yino ye Shimbi yize Mose ahanyine kuli A-Izalele. 45 Yino ye iwulwiso, shimbi, yiyulo ni upatwilo yize Mose ahanyine kuli A-Izalele muze akatukile ku Engitu, 46 mu sali lia Yordau, mu chikulo hakamwihi ni Mbete-Peore mu chifuchi cha Sahone, Mwanangana wa A-Amore te watwama mu Heshebone yoze Mose ni A-Izalele akumbile muze akatukile ku Engitu. 47 Yatambula chifuchi chenyi ni chifuchi cha Oge, Mwanangana wa Mbashane, mianangana aali a A-Amore waze te atwama mu chifuchi cha ku chivumbuko cha Yordau, 48 chize ku Aroere yize yapwile hakamwihi ni chikulo cha Arnone ndo ku Mulundu wa Zaione, uze avuluka nawa ngwo, Hermone, 49 ni Arapa yeswe ku chifuchi cha ku chivumbuko cha Yordau ndo ku Kalunga-Lwiji wa Arapa ku ukandukilo wa Pisiga.