Mukanda Utangu wa Samuele
25 Ha kupalika cha mashimbu Samuele yafwa. A-Izalele eswe yalikungulula hanga amulile, yamufunda hakamwihi ni zuwo lienyi ku Rama. Chocho, Ndawichi yaya mu puya ya Parane.
2 Mu Mayone mwapwile umwe lunga yoze wapwile ni kukalakala ku Karmela.* Iye kapwile pichi munene, kapwile ni mapanga 3,000 ni pembe 1,000, te kanateula mapanga jenyi ku Karmela. 3 Lunga wacho jina lienyi te Nabale, mukwo-pwo Abigale. Abigale kapwile mukwa-mana, chileza, alioze lunga lienyi wa ku munyachi wa Kalemba, kapwile chitenu, mutu mupi. 4 Muze Ndawichi te ali mu puya, yevwa ngwo Nabale kanateula mapanga jenyi. 5 Kashika, Ndawichi yatuma malunga kumi kuli Nabale, yamba kuli ayo ngwenyi: “Yeenu ku Karmela, muze munuwana Nabale, nunguhulileye chize ali. 6 Nwambe kuli iye ngwenu: ‘Kula utome mwene wetu, sambukila yipwe hamwe ni yenu hamwe ni akwa-zuwo lienu ni ha yuma yeswe yize nukwete. 7 Nevwa ngwo mwene wami kanateula mapanga. Muze tufunga twe apwile hamwe ni yetu, kutwakalingile upi niumwe, ayo kakatokesele nichimwe chuma ha mashimbu eswe apwile ku Karmela. 8 Hulenu atu jenu, ayo manulweza chikuma chino. Lisesa vwilenu kama keke atu jami, mumu tweza ha mashimbu a chiseke.* Lisesa, hanenu kama keswako koma nuli nako, kuli tuvumbi twenu, ni kuli mwanenu Ndawichi.’”
9 Chocho, atu ja Ndawichi yaya, yalweza Nabale maliji eswe a Ndawichi. Muze ahwishile kuhanjika, 10 Nabale yamba kuli tuvumbi a Ndawichi ngwenyi: “Mwe Ndawichi wacho iya? Mwana wa Yese iya? Musono kuli tuvumbi anji akuchina miata jo. 11 Mumu liaka mungwanda mbolo yami, meya ni yifwo yize nashihila akwa-kuteula mapanga, hanga nguyihane kuli atu waze chanyingikine kuze anakatuka?”
12 Chocho, atu ja Ndawichi yahiluka, yamulweza yuma yeswe yize Nabale ambile. 13 Hazehene, Ndawichi yamba kuli atu jenyi ngwenyi: “Mutu ni mutu alipakate katana kenyi mu zalilo!” Chocho eswe yasa tutana two mu zalilo ni Ndawichi neye yasa katana kenyi mu zalilo. Malunga 400 yaya hamuwika ni Ndawichi, alioze malunga akwo 200 yasala ni kufunga yikwata.
14 Ha shimbu liacho, umwe wa kuli tuvumbi twa Nabale, yalweza Abigale pwo lia Nabale ngwenyi: “Ndawichi katumanga mikeji kukatuka mu puya hanga ameneke mwene wetu, alioze iye yaatuka. 15 Malunga wano, katulingilile yuma yipema. Kakatulingile upi niumwe, kutwakatokesele chuma nichimwe mashimbu eswe twapwile no hamuwika mu yambu. 16 Ayo kapwile ngwe yipanga yetu ufuku ni mwalwa ha mashimbu eswe waze te twakufunga mapanga. 17 Haliapwila, nyonga chize mulinga, mumu pundu lume, chino muchikokela mwene wetu lamba ni akwa-zuwo lienyi eswe. Mwene wetu kali mutu wamokomoko, niumwe wakuhasa kuhanjika nenyi wakuhi.”
18 Hazehene, Abigale yanda kawashi-washi kama jaali ja mbolo, milondo yaali yinene-yinene ya vinyu, mapanga atano akuhangula kulu ni kilu jitano ja mbuto ya kukanga, kulakaji ya yichakata ya uva ni kulakaji aali a yandanda ya makuyu, yeswe yayisa helu lia chimbulu. 19 Chocho, yamba kuli tuvumbi twenyi ngwenyi: “Tetekelenu, yami mungunukaula.” Alioze kalwezele nichimwe kuli lunga lienyi Nabale.
20 Muze te anapalumuka ha chimbulu, mu jila yimwe yahenga ku milundu, yalitakana ni Ndawichi ni atu jenyi. 21 Ndawichi kambile ngwenyi: “Kumana nafungile yuma yeswe ya lunga yono mu puya chamokomoko. Nichimwe chize atokesele chakuhi, chipwe chocho, kanangufwete upi ha upeme uze nalingile. 22 Nyi ndo hamene chimene munguhichika ni mwono chipwe mutu umuwika ku zuwo lia Nabale, Zambi amwese lamba akwa-kole ja Ndawichi.”
23 Muze Abigale amwene Ndawichi, yasunuka ni kawashi ha chimbulu, yafulamana hashi kumeso ja Ndawichi. 24 Yafulamana ku molu jenyi, yamba ngwenyi: “Mulonga ungushate yami mwene wami. Ngwechenu kama yami kavumbi kenu nguhanjike mwene wami, ngupanjikenu kama. 25 Lisesa mwene wami, kanda upala lunga yono Nabale mutu wamokomoko, mumu iye kakulinga yuma kulita ni jina lienyi. Jina lienyi Nabale,* iye keshi mana, alioze yami kavumbi kenu chamwene malunga waze nwatumanga mwene wami. 26 Haliapwila mwene wami, ni mwono wa Yehova, ni mwono wa yenu mwene wami, Yehova mwe wangutuma hanga ngunukinde kumwanga manyinga ni kulikalila milonga yenwene. Akwa-kole jenu ni waze anazange kulinga upi kuli mwene wami, apwe ngwe Nabale. 27 Haliapwila, chawana* chino yami kavumbi kenu nanunehena chihanenu kama kuli atu waze nunende no. 28 Lisesa, konekenenu kama uhenge wa yami kavumbi kenu, mumu pundu lume, Yehova makakolesa zuwo lia mwene wami ku miaka yeswe, mumu mwene wami nunase jita ya Yehova, chikwo nawa, kunwalingile upi ku mwono wenu weswe. 29 Muze umwe mutu mazanga kunushiha, Yehova Zambi yenu makafunga mwono* wenu kanawa, ngwe chize mutu akuvunga-vunga kanawa yuma yilemu mu tuku hanga ayifunge, alioze mwono wa akwa-kole jenu, makaukonga kusuku ngwe chize akwasa liwe ni chikapa. 30 Mba muze Yehova mamanununa yuma yeswe yipema yize alakenyene kuli yenu mwene wami, ni kunutongola ngwe kasongo ka Izalele, 31 mwene wami kuchi kevwa chinyengo mu mbunge, chipwe kulihisa mumu lia kumwanga manyinga chakuhona chitela hanji kulikalila milonga yena mwene. Muze Yehova manulingila yuma yipema, nukangwiuluka kama yami kavumbi kenu.”
32 Ndawichi yamba kuli Abigale ngwenyi: “Yehova, Zambi ya Izalele afumane, yoze wakutuma musono hanga ulitakane ni yami! 33 Zambi awahise mana je! Ni yena akuwahise ha kungukwika ha tangwa lino hanga nguchine kupwa ni mulonga wa manyinga ni kuchina kulikalila mulonga yami mwene. 34 Pundu lume, ni mwono wa Yehova, Zambi ya Izalele, yoze wangukwika kukulinga upi, nyi te kuwejile ni kulitakana ni yami fuji ni matambu, kachi hamene chimene te chichi kuhichika lunga niumwe ni mwono ku zuwo lia Nabale.” 35 Chocho, Ndawichi yatayiza yawana yize Abigale anehene. Yamba kuli iye ngwenyi: “Hiluka ku zuwo lie ni sambukila, yize wangwita nayivwa, munguyilinga.”
36 Kulutwe, muze Abigale ahilukile kuli Nabale, yamuwana kanali ni kunwa mu zuwo lienyi ngwe mwanangana. Nabale* te kanawahilila chinji, chikwo nawa, te hazengewa. Abigale kamulwezele chuma nichimwe ndo muze kwachile. 37 Chimene, muze Nabale walwa te hiwamupatwoka, mukwo-pwo yamulweza yuma yeswe. Nabale yapwa ngwe mutu yoze hafwa kulu, yakala mbee ngwe liwe. 38 Muze kwapalikile matangwa kumi, Yehova yashiha Nabale.
39 Muze Ndawichi evwile ngwo Nabale hafwa, yamba ngwenyi: “Yehova afumane, yoze wangukalila, wanguchiza sonyi jize Nabale anakangukolesa ni kungukinda hanga nguchine kulinga upi. Yehova hahilwisa upi wa Nabale hali iye mwene!” Chocho, Ndawichi yatuma maliji kuli Abigale ni kumwita hanga amumbate. 40 Muze tuvumbi twa Ndawichi ahetele kuli Abigale ku Karmela, yamulweza ngwo: “Ndawichi katutuma twize ni kukusaka hanga upwe pwo lienyi.” 41 Hazehene, iye yafulamana hashi, yamba ngwenyi: “Ndungo yenu kanatayiza kupwa kavumbi kenu hanga apwe ni kusanyisa molu ja tuvumbi twenu.” 42 Chocho, Abigale yalilulieka kawashi-washi, yanyina ha chimbulu, yaya hamuwika ni ngamba jenyi atano a mapwo hamwe ni mikeji ja Ndawichi, yapwa pwo lia Ndawichi.
43 Ndawichi yambata nawa Ahinoame, Ka-Yezerele, mba eswe aali yapwa mapwo jenyi.
44 Alioze Saulu kahanyine mwanenyi Mikale, pwo lia Ndawichi, kuli Palti mwana wa Laishe, wa ku Ngalimi.