Mukanda Utangu wa Samuele
24 Muze Saulu afunyine kuze ayile ni kwasa jita ni A-Filistea, yamulweza ngwo: “Ndawichi kali mu puya ya Engedi.”
2 Saulu yakungulula malunga 3,000 waze asakwile hakachi ka A-Izalele, yaya ni kufupa Ndawichi ni atu jenyi ku mawe kuze kwatwama tupaji.* 3 Saulu yaheta ku malimba a mawe a mapanga waze atwama ku sesa lia jila kuze kwatwama chivwenge, yanjilamo hanga atwame* hashi. Kumana Ndawichi ni atu jenyi te kanaswame mwe muchima lia chivwenge. 4 Atu ja Ndawichi yamulweza ngwo: “Lino lie tangwa Yehova anakulweze ngwenyi: ‘Ngunakunjika mukwa-kole we mu moko je, muhasa kumulinga cheswacho muzanga.’” Chocho Ndawichi yaya hakehe-hakehe, yateta songo lia chikuto cha Saulu cha moko ehi. 5 Alioze, muze Ndawichi halinga chocho, mbunge yenyi yiyiputuka kumuhisa mumu lia kuteta songo lia chikuto cha Saulu. 6 Iye yamba kuli atu jenyi ngwenyi: “Kuchichi kulita kumeso ja Yehova nyi nalinga chuma cha mutapu au kuli mwene wami, yoze awayishile kuli Yehova. Chatambile kwolola kwoko liami ngumulinge upi, mumu kali mutu yoze Yehova awayishile.” 7 Chocho Ndawichi yakwika atu jenyi, katayijile hanga ashihe Saulu. Mba Saulu yatuhuka mu chivwenge, yaya kwenyi.
8 Mba Ndawichi yatuhuka mu chivwenge, yakololoka kuli Saulu ngwenyi: “Mwene wami mwanangana!” Muze Saulu ateulukile, Ndawichi yafulamana hashi. 9 Ndawichi yamba kuli Saulu ngwenyi: “Mumu liaka mwene wami nwakupanjika atu waze akwamba ngwo, ngunazange kunulinga upi? 10 Musono nwalimwena ni meso jenu chize Yehova anukunjika mu moko jami, muze te nuli mu chivwenge. Muze umwe angulweza hanga ngunushihe, yami yingunuvwila keke mwene wami, yingwamba ngwami: ‘Chichi kushiha mwene wami, mumu iye kali mutu wakuwayisa kuli Yehova.’ 11 Tata talenu, talenu songo lia chikuto chenu mu moko jami. Muze napatulanga chikuto chenu, chanushihile. Haliapwila nwamona ngwenu, chishi ni nyonga lia kunulinga upi chipwe lia kulimika ni yenu. Chavulumwine kuli yenu mwene wami, chipwe ngwe nunangukaujola hanga nungushihe. 12 Yehova apwe ngaji hakachi ketu, Yehova angukale ha upi uze nwangulinga, alioze yami chichi kunushiha mwene wami. 13 Ngwe chize chishima chimwe chakwamba ngwo: ‘Kuli atu api kwe kwakwiza upi,’ alioze yami chichi kunushiha mwene wami. 14 Iya mwanangana wa Izalele anakaujola? Iya yoze mwene wami anendejela? Shina kawa yoze hafwa kulu? Sanya* wamokomoko? 15 Yehova apwe ngaji, atupatwile hakachi ka yena ni yami; iye mahengwola mulonga, mangukalila, mapatula ni ululi ni kungupulula mu moko jenu.”
16 Muze Ndawichi ahwishile kuhanjika maliji wano, Saulu yahula ngwenyi: “Yena mwanami Ndawichi nyi?” Chocho Saulu yaputuka kulila ni kukololoka. 17 Yamba kuli Ndawichi ngwenyi: “Yena uli mukwa-ululi kuhiana yami, wangulinga chuma chipema, alioze yami nakufweta ni upi. 18 Musono wangulweza chuma chipema chize wangulinga, kuwangushihile muze Yehova angukunjika mu moko je. 19 Mumu mutu muka yoze mawana mukwa-kole wenyi mamwecha aye kwenyi chakuhona kumulinga upi niumwe? Yehova makakufweta ha chuma chipema chize wangulinga musono. 20 Haliapwila hinapwa ni shindakenyo ngwami mukapwa mwanangana, chikwo nawa, wanangana wa Izalele, muununga ni kukola mu moko je. 21 Kashika, lishinge mu jina lia Yehova ngwe, kuchi kwonwona munyachi wami, chipwe kujimuna jina liami ku zuwo lia tata.” 22 Chocho Ndawichi yalishinga kuli Saulu. Mba Saulu yafuna ku zuwo. Alioze Ndawichi ni atu jenyi, yaya ku chihela chize chikalu kuhetako.