Mukanda Utangu wa Mianangana
8 Ha matangwa jacho, Solomone yakunga makulwana eswe a mu Izalele, akwa-lutwe eswe a minyachi ni miata akwo a mu Izalele. Ayo yaya ndo kuli Mwanangana Solomone ku Yerusaleme hanga atwale Mushete wa Usendo wa Yehova ku Mbonge ya Ndawichi, ku Zaione. 2 Malunga eswe a mu Izalele yalikungulula kumeso ja Mwanangana Solomone ha chiwanyino* ha kakweji wa Etanime, chekwamba, kakweji wamuchishimbiali. 3 Chocho makulwana eswe a mu Izalele yeza, asasendote yazundula Mushete. 4 Ayo ni A-Levi yakanduka ni Mushete wa Yehova, mbalaka ya kulikungulwila ni yikashi yeswe yisandu yize yapwile mu mbalaka. 5 Mwanangana Solomone ni A-Izalele eswe waze asanyikine hanga alikungulule no, yaamana kulutwe lia Mushete, yaalambula mapanga ni ngombe anji waze kakahashile kwalula.
6 Asasendote yatwala mushete wa usendo wa Yehova mu chihela chawo, yausa mu chipatulo cha muchima lia zuwo, chekwamba, Muma Musandu Mwahiana, yausa mushi lia mapulwa ja akerupimi.
7 Mapulwa ja akerupimi kapwile ni kulizaza mu chihela muze mwapwile Mushete, kashika akerupimi kapwile ni kufuka Mushete ni mikambo. 8 Mikambo yacho, yapwile yisuku chinji, te kakuyimona kuli mutu yoze uli Muma Musandu, kulutwe lia chipatulo cha muchima, alioze mutu yoze uli haze te kechi kuhasa kuyimona. Mikambo yacho yichiliko ndo musono. 9 Mu Mushete mwapwile wika mawe aali waze Mose aselemo ku Horepe, muze Yehova alingile usendo ni A-Izalele muze akatukile ku Engitu.
10 Muze asasendote akatukile muma musandu, lelwa yilifuka zuwo lia Yehova. 11 Asasendote kakahashile kutwamamo hanga alinge milimo yo mumu lia lelwa, uhenya wa Yehova wazalishile zuwo lia Yehova. 12 Mba Solomone yamba ngwenyi: “Yehova kambile ngwenyi matwama mukachi ka malelwa. 13 Nahasa kukutungila chihela chipema chinji, chihela chize mutwama ku miaka yeswe.”
14 Chocho mwanangana yateuluka, yatala kuze te kunamana chikungulwila cheswe cha Izalele, yachiwahisa. 15 Iye yamba ngwenyi: “Yehova Zambi ya Izalele afumane, mumu kalinga yize alakenyene kuli tata Ndawichi ha kwamba ngwenyi: 16 ‘Chize ha tangwa lize nachijile atu jami A-Izalele ku Engitu, chasakwile mbonge niyimwe hakachi ka munyachi wa Izalele hanga atungemo zuwo lize mulimbata jina liami, alioze yingusakula Ndawichi hanga ayule atu jami A-Izalele.’ 17 Nyonga lia tata Ndawichi, liapwile kutunga zuwo lize mulimbata jina lia Yehova, Zambi ya Izalele. 18 Alioze Yehova yamba kuli tata Ndawichi ngwenyi: ‘Nyonga lie lia kutunga zuwo lize mulimbata jina liami lili lipema, chili chipema kununga ni nyonga liacho. 19 Alioze, mwane yoze musema mwe makatunga zuwo lize mulimbata jina liami.’ 20 Yehova kamanununa chilakenyo chenyi, nasalakana tata Ndawichi mumu natwama ha ngunja ya Izalele ngwe chize Yehova alakenyene. Natunga nawa zuwo lize linambata jina lia Yehova Zambi ya Izalele, 21 natunga chihela cha kusa Mushete muze muli usendo uze Yehova alingile ni tulamba twetu muze aachijile mu chifuchi cha Engitu.”
22 Chocho Solomone yamana kulutwe lia chilumbilo cha Yehova, kulutwe lia chikungulwila cheswe cha Izalele, yolola moko mwilu 23 yamba ngwenyi: “Yehova Zambi ya Izalele, kukushi Zambi mukwo walifwa ni yena mwilu ni hano hashi, wakufunga usendo ni kusolola zango lize kulishi kuhwa kuli tuvumbi twe waze akushishika kuli yena. 24 Wamanununa chilakenyo chize walingile kuli tata Ndawichi. Yuma yize walakenyene, musono hiwayimanununa. 25 Haliapwila, Yehova Zambi ya Izalele, manununa kama chilakenyo chize walingile kuli kavumbi ke tata Ndawichi, muze wambile ngwe: ‘Ana je e makanunga ni kutwama ha ngunja ya Izalele nyi manunga ni kupanjika shimbi jami ni kwenda mu majila jami ngwe chize yena wendele ni yami.’ 26 Zambi ya Izalele, manununa kama chilakenyo chize walingile kuli kavumbi ke, Ndawichi.
27 “Shina Zambi makatwama hano hashi? Kama malilu keshi kukumbana kuli iye, mba yika mutwamba ha zuwo lino natunga! 28 Yehova Zambi yami, panjika kama kulemba ni kwita cha yami kavumbi ke, panjika kama miteto ni kulemba chami. 29 Funga kama zuwo lino mwalwa ni ufuku, zuwo lize wambile ngwe: ‘Lienalio mulikapwa ni jina liami.’ Kashika, panjika kama kulemba cha yami kavumbi ke ngunatalikisa ku chihela chino. 30 Panjika kuliumba cha kavumbi ke ni kwita cha atu je A-Izalele muze malemba ni kutalikisa ku chihela chino. Muzemwene mu malilu watwama tupanjike kama, ewa tupanjike ni kutukonekena.
31 “Nyi mutu malinga mulonga kuli mwenyembo wenyi, mwenyembo wenyi mahasa kumushinjila hanga alishinge. Nyi mutu wacho meza ku chilumbilo chili mu zuwo lino mumu lia shingo lize amushinjila kulinga, 32 yenu nuli mu malilu panjikenu hanga nusopese tuvumbi twenu, nuhise yoze walinga upi, upi wenyi wize hali mwene, sambisenu mukwa-ululi ni kumuwahisa kulita ni ululi wenyi.
33 “Nyi atu je A-Izalele maakumba kuli akwa-kole jo, mumu lia kununga ni kuvulumuna kuli yena, mba ayo mahiluka kuli yena ni kuhalisa jina lie, malemba ni kuliumba mu zuwo lino, 34 nyi chino chalingiwa, yenu nuli mu malilu nwapanjike, nwakonekene shili yo ni kwahilwisa cheka mu chifuchi chize nwahanyine kuli tulamba two.
35 “Nyi mwilu mwaliyika, mwecha kunoka vula mumu atu je kanunga ni kuvulumuna kuli yena, mba ayo matalikisa ku chihela chino ni kulemba hanga afumanyise jina lie ni kulitwamina kulinga shili, mumu hiwalongesa kulikehesa, 36 yenu nwatwama mu malilu panjikenu ni kukonekena shili ya atu jenu A-Izalele ni kwalongesa mu jila yize atamba kwenda ni kunokesa vula mu chifuchi chize nwahele ngwe chihinga.
37 “Nyi mu chifuchi mwapwa zala, misongo, chivukuminya, kuunda, makumbi hanji yambi, chikwo nawa, nyi akwa-kole majikinyina mambonge amwe a mu chifuchi hanji mukusoloka chilungo hanji yikola yeswayo, 38 mba mutu umuwika hanji A-Izalele eswe malemba kuli yena ni kwita ukwaso wa chuma cheswacho (mumu mutu ni mutu kananyingika yize yakumupinjisa) ha kwolola moko jo ni kutalikisa ku chihela chino, 39 yenu nuli mu malilu mu chihela chenu, apanjikenu, akonekenenu, awahisenu kulita ni majila jo, mumu nunanyingika mbunge jo, (yenu wika nunanyingika kanawa mbunge ja atu), 40 hanga ayo anulemese matangwa eswe matwama mu chifuchi chize nwahanyine kuli tulamba two.
41 “Hakutwala kuli yilambala waze keshi mukachi ka atu je A-Izalele, waze makatuka kusuku mumu lia jina lie, 42 (mumu ayo makevwa lufuma wa jina lie, wa ndundo ja kwoko lie ni kwoko lie lia kwolola), mba maalemba ni kutalikisa ku zuwo lino, 43 yenu nuli mu malilu mu chihela chize nwatwama, panjikenu, lingenu yeswe yize yilambala manwita hanga atu a hashi heswe anyingike jina lienu ni kunuvumbika ngwe chize A-Izalele akulinga hanga atu anyingike ngwo jina lienu kakulivuluka mu zuwo lino natunga.
44 “Nyi atu je maya ni kwasa jita ni akwa-kole jo ku yihela yeswayo mwatuma, mba ayo malemba kuli Yehova ha kutalikisa ku mbonge yize wasakula, ku zuwo lize natunga hanga limbate jina lie, 45 yenu nuli mu malilu, panjikenu kulemba ni kwita cho, asolwelenu kama ululi.
46 “Nyi ayo mavulumuna kuli yena (mumu atu eswe kakuvulumuna), mba mwevwila uli, mwahana kuli akwa-kole hanga aye no kusuku hanji hakamwihi ngwe funge, 47 chocho ku chifuchi chize maatwala ngwe funge ayo malikonyeka, mahiluka kuli yena, maliumba kuli yena ni kwamba ngwo: ‘Twavulumuna, twalinga yuma yize kuyalitele,’ 48 kuzekwene mahiluka kuli yena ni mbunge jo jeswe ni mwono wo weswe, ayo malemba kuli yena ha kutalikisa ku chifuchi chize wahanyine kuli tulamba two, mbonge yize wasakwile ni zuwo lize natunga hanga limbate jina lie, 49 yenu nuli mu malilu mu chihela chenu, panjikenu kama kulemba ni kuliumba cho hanga nwasolwele ululi, 50 konekena atu je avulumuna kuli yena, akonekene uhenge weswe uze akulinga. Chilinge hanga akwa-kole jo akevwile keke 51 (mumu kali atu je, chihinga che, waze wachijile ku Engitu, mu lutengo wa utale). 52 Meso je alihulikile ha kwita cha tuvumbi twe A-Izalele ni kwapanjika mashimbu eswe muze makololoka kuli yena. 53 Mumu yena waasakwile ngwe chihinga che hakachi ka atu eswe a hashi ngwe chize wambile kuli kavumbi ke Mose, muze yena Yehova Mwene wetu wachijile tulamba twetu ku Engitu.”
54 Muze Solomone te hahwisa kulemba ni kuliumba kuli Yehova, kulutwe lia chilumbilo cha Yehova kuze te analiumbu ni kwolola moko mwilu, yakatuka, yamana. 55 Chocho yawahisa chikungulwila cheswe cha Izalele ni liji mwilu ngwenyi: 56 “Yehova afumane, mumu kahana kuli atu jenyi chihela cha uhwimino ngwe chize alakenyene. Yilakenyo yeswe yipema yize alakenyene kupalikila muli kavumbi kenyi Mose, yamanunuka. 57 Yehova Zambi yetu apwe hamwe ni yetu ngwe chize apwile hamwe ni tulamba twetu. Kanda atwehuka chipwe kutumbila. 58 Atalikise mbunge jetu kuli iye hanga twende mu majila jenyi eswe ni kukaula shimbi jenyi, yiyulo yenyi ni upatwilo wenyi ahanyine kuli tulamba twetu. 59 Yehova Zambi yetu, ewuluka kama maliji waze nahanjika kuli yena. Yehova, ewuluka kama maliji jacho mwalwa ni ufuku hanga usolole ululi kuli kavumbi ke ni atu je A-Izalele kulita ni kuhona cha mutu ni mutu 60 hanga atu eswe hano hashi anyingike ngwo, Yehova mwe Zambi wamwenemwene, kukushi nawa mukwo. 61 Kashika, mbunge jenu jipwe jingunu kumeso ja Yehova Zambi yetu, endenu mu yiyulo yenyi ni kukaula shimbi jenyi ngwe chize nunalingi musono.”
62 Chocho mwanangana Solomone ni A-Izalele eswe yalambula yitapo yinji kuli Yehova. 63 Yino ye milambu ya sambukila yize Solomone alambwile kuli Yehova: Ngombe 22,000 ni mapanga 120,000. Chocho mwanangana ni A-Izalele eswe yazulula zuwo lia Yehova. 64 Ha tangwa liacho, mwanangana yapemesa yiize ya kulutwe lia zuwo lia Yehova hanga alambwilemo milambu ya kwocha, milambu ya mbuto ni maji a milambu ya sambukila, mumu chilumbilo cha unengu chize asele kulutwe lia Yehova chapwile chikehe chinji hanga alambwileho milambu ya kwocha, milambu ya mbuto ni maji a milambu ya sambukila. 65 Ha shimbu liacho, Solomone yalinga chiwanyino hamuwika ni A-Izalele eswe waze akatukile ku Lebo-Hamate ndo ku lwiji wa Engitu. Yalinga chiwanyino kumeso ja Yehova Zambi yetu ha matangwa 14. 66 Mukwachako, iye yalweza atu hanga aye ku mazuwo jo, ayo yawahisa mwanangana, yaya ku mazuwo jo ni chiseke chinji mumu Yehova kasolwele upeme kuli kavumbi kenyi Ndawichi ni kuli atu jenyi A-Izalele.