Akwa-Kuyula
21 Malunga A-Izalele kalishingile ku Mizepa ngwo: “Niumwe wa kuli yetu katambile kuhangisa mwanenyi kuli A-Mbenjamine.” 2 Kashika, atu yaya ku Mbetele, yatwama kumeso ja Zambi wamwenemwene ndo ufuku, yakololoka ni kulila chinji. 3 Ayo yanunga ni kwamba ngwo: “Yehova Zambi ya Izalele, mumu liaka chuma cha mutapu au chalingiwa mu Izalele? Mumu liaka mu Izalele munahono munyachi umuwika?” 4 Muze hikwacha, atu yahinduka chimenemene, yatungako chilumbilo hanga ahane milambu ya kwocha ni milambu ya sambukila.
5 Chocho, A-Izalele yahula ngwo: “Munyachi uka wa Izalele uze kuwasolokele kumeso ja Yehova?” Mumu ayo kalishingile ngwo, nyi mutu kasolokele kumeso ja Yehova ku Mizepa, katamba kumushiha. 6 A-Izalele yevwila keke ndumbwo Mbenjamine. Yamba ngwo: “Musono mu Izalele kakuwisamo munyachi umuwika. 7 Twalishingile kumeso ja Yehova ngwetu, kutuchi kuhangisa ana jetu kuli A-Mbenjamine. Haliapwila yika twatamba kulinga mba tuwane mapwo waze mutuhana kuli malunga waze asala?”
8 Ayo yahula ngwo: “Munyachi uka wa Izalele uze kuwasolokele kumeso ja Yehova ku Mizepa?” Ha tangwa liacho, A-Njabeshe-Ngiliate eswe kakasolokele mu chilombo chize te analikungulwila. 9 Muze alwile atu eswe yamona ngwo, A-Njabeshe-Ngiliate kakapwileho. 10 Kashika, chikungulwila yichitumako malunga a hamu 12,000. Yaalweza ngwo: “Yeenu ni kushiha ni katana A-Njabeshe-Ngiliate, shihenu chipwe mapwo ni twanuke. 11 Yino ye nwatamba kulinga: Shihenu malunga eswe ni mapwo waze hanalipomba ni malunga.” 12 Hakachi ka A-Njabeshe-Ngiliate yawanaho ana-mapwo 400 waze te kanda achilipomba ni malunga. Chocho yaatwala mu chilombo ku Shilo, mu chifuchi cha Kanana.
13 Chikungulwila cheswe yichituma lusango wa sambukila kuli A-Mbenjamine ku luliwe lwa Rimone. 14 Chocho A-Mbenjamine yahiluka. Yaaha mapwo waze ejile no ku Njabeshe-Ngiliate, alioze mapwo jacho te akehe, kakakumbanyine. 15 A-Izalele yevwa chinyengo mumu lia yize yalingiwile kuli A-Mbenjamine, Yehova te hahandununa minyachi ya Izalele. 16 Makulwana a chikungulwila yalihula ngwo: “Mapwo eswe A-Mbenjamine kaashihanga, mba yika twatamba kulinga hanga tuwane mapwo waze mutuhana kuli malunga waze asalaho?” 17 Ayo ene yamba ngwo: “A-Mbenjamine katamba kununga ni chihinga cho hanga mu Izalele muchine kutoka munyachi niumwe. 18 Alioze, kutuchi kwaha ana jetu a mapwo, mumu A-Izalele kalishingile ngwo: ‘Ashingiwe mutu yoze mahana pwo kuli A-Mbenjamine.’”
19 Kashika, ayo yamba ngwo: “Ha miaka yeswe, ku Shilo yize yili ku sango ya Mbetele ni ku chivumbuko cha tapalo linakatuka ku Mbetele ni kukanduka ku Shekeme ni ku uto ya Lebona, kwakupwa chiwanyino cha Yehova.” 20 Chocho, ayo yalweza A-Mbenjamine ngwo: “Yeenu mu minda ya uva hanga nwajikinyine. 21 Muze munumona ana-mapwo a mu Shilo kaneza hanga ahangane, mutu ni mutu katamba kutuhuka mu munda wa uva akwate pwo lienyi hakachi ka ana-pwo a mu Shilo. Mba munuhiluka mu chifuchi cha Mbenjamine. 22 Nyi yisemi jo hanji mandumbu jo meza ni kutulweza ngwo, nwalinga mulonga, mutwalweza ngwetu: ‘Tuvwilenu kama keke, mumu mu jita twayanga kutwahashile kwakwachila mapwo waze makumbana kuli eswe. Chikwo nawa, nyi twanwitangawo, kachi kunwatuhelewo mumu lia shingo.’”
23 A-Mbenjamine yalinga chocho. Mutu ni mutu yakwata pwo hakachi ka ana-pwo waze te anahangana. Mba yahiluka kumahio, yatungulula mambonge jo, yatwamako.
24 Chocho, A-Izalele yaya kwo, mutu ni mutu ku munyachi wenyi ni mu usoko wenyi; mutu ni mutu yaya ku kumahio.
25 Ha matangwa jacho, mu Izalele kumwakapwile mwanangana. Mutu ni mutu te kakulinga yuma yize yinalite ku meso jenyi.