Mukanda Utangu wa Samuele
3 Ha mashimbu jacho, kanuke Samuele te kakulingila Yehova ni usongwelo wa Eli. Alioze ha matangwa waze chapwile chikalu kwivwa liji lia Yehova. Usolwelo te kuushi kusoloka chinji.
2 Tangwa limwe, Eli te kanapombo ha muhela wenyi, te keshi kuhasa kumona nawa mumu meso jenyi te halaa. 3 Ndeya ya Zambi te kanda achiyijima, Samuele te kanapombo mu tembele* ya Yehova, mu chihela muze mwapwile Mushete wa Zambi. 4 Mba Yehova yasanyika Samuele. Samuele yakumbulula ngwenyi: “Yami uno.” 5 Iye yazomboka ndo kuli Eli, yamba ngwenyi: “Yami uno. Neza mumu nwangusanyika.” Eli yamukumbulula ngwenyi: “Ka, chakusanyikine. Funa upombe.” Chocho, iye yafuna, yapomba. 6 Yehova yamusanyika nawa ngwenyi: “Samuele!” Samuele yahinduka yaya ndo kuli Eli, yamba ngwenyi: “Yami uno. Neza mumu nwangusanyika.” Alioze, Eli yamba ngwenyi: “Chakusanyikine mwanami. Funa upombe.” 7 (Samuele te kanda achinyingika Yehova, Yehova te kanda achihanjika nenyi.) 8 Yehova yasanyika Samuele ha chisuho chamuchitatu ngwenyi: “Samuele!” Chocho, iye yahinduka, yaya kuli Eli yamba ngwenyi: “Yami uno. Neza mumu nwangusanyika.”
Mba Eli yanyingika ngwenyi, Yehova mwe te unasanyika mwe mwana. 9 Chocho, Eli yamba kuli Samuele ngwenyi: “Yako upombe. Nyi makusanyika nawa, kumbulula ngwe: ‘Yehova, hanjikenu mumu yami kavumbi kenu ngunanupanjika.’” Mba Samuele yaya, yapomba ha muhela wenyi.
10 Yehova yeza, yamana ha chihela chacho, yamusanyika nawa ngwe chize amusanyikanga ha yisuho yikwo ngwenyi: “Samuele, Samuele!” Samuele yakumbulula ngwenyi: “Hanjikenu, mumu yami kavumbi kenu ngunanupanjika.” 11 Yehova yamba kuli Samuele ngwenyi: “Mungulinga chuma chimwe mu Izalele, eswe waze machivwa makomoka. 12 Ha tangwa lize, mungukalinga kuli Eli ni kuli akwa-zuwo lienyi yuma yeswe yize nambile hakutwala kuli ayo chize ku uputukilo ndo ku songo. 13 Mulweze ngwe, mungumwesa akwa-zuwo lienyi lamba ku miaka yeswe, mumu lia uhenge uze iye ananyingika kanawa. Mumu ana jenyi kakutuka Zambi, alioze iye keshi kwakanjisa. 14 Kashika nalishingile hakutwala kuli akwa-zuwo lia Eli ngwami, uhenge wa akwa-zuwo lia Eli kechi keza kaufuka ni yitapo hanji ni milambu.”
15 Samuele yapomba ndo chimene, mba yazulula yikolo ya zuwo lia Yehova. Samuele te kanevu woma wa kulweza Eli usolwelo uze amwene. 16 Alioze, Eli yasanyika Samuele ngwenyi: “Mwanami Samuele!” Iye yakumbulula ngwenyi: “Yami uno.” 17 Eli yamuhula ngwenyi: “Yika iye akulwezanga? Lisesa, kanda unguswekela chuma nichimwe. Nyi wanguswekela chipwe liji limuwika ha yuma yeswe yize iye amba, Zambi akumwese lamba linji.” 18 Kashika, Samuele yamulweza yuma yeswe, kamuswekelele nichimwe. Eli yamba ngwenyi: “Iye kali Yehova, alinge yeswayo yize yinamupemena.”
19 Samuele yanunga ni kukola, Yehova mwene wapwile hamwe nenyi. Yuma yeswe yize ambile, yayimanununa. 20 A-Izalele eswe, chize ku Ndane ndo ku Mbia-shipa yanyingika ngwo, Samuele kamutongwele hanga apwe profeta wa Yehova. 21 Yehova yanunga ni kusoloka ku Shilo, mumu kwenako Yehova alisolwele kuli Samuele kupalikila mu liji lia Yehova.