Mukanda Utangu wa Samuele
8 Muze Samuele te hapwa kashinakaji, yatongola ana jenyi hanga apwe akwa-kuyula A-Izalele. 2 Mwanenyi mutangu jina lienyi te Joele, wamuchiali jina lienyi te Abija, ayo kapwile akwa-kuyula mu Mbia-Shipa. 3 Alioze ana jenyi te keshi kumwimbulula. Ayo te kakuzanga kuzuka yuma mu jila yipi, te kakutayiza mbongo hanga asambise mutu yoze wahia.
4 Ha kupalika cha mashimbu, makulwana eswe mu Izalele yalikungulula, yaya kuli Samuele ku Rama. 5 Yamba ngwo: “Hinwapwa kashinakaji, ana jenu keshi kunwimbulula. Haliapwila, tutongwelenu umwe mwanangana hanga atuyule ngwe chize mavungu akwo akulinga.” 6 Alioze muze ayo ambile ngwo: “Tutongwelenu umwe mwanangana hanga atuyule,” Samuele yevwa kupiha. Chocho yalemba kuli Yehova. 7 Yehova yamba kuli Samuele ngwenyi: “Linga yize ayo akwita, mumu hi yena ko alituna, alioze yami alituna ngwe mwanangana wo. 8 Ayo kanalingi ngwe chizechene alingile chize ha tangwa lize naachijile mu Engitu ndo musono. Kakungwehuka mashimbu eswe ni kulingila tuzambi akwo, yenayi analingi nawa kuli yena. 9 Linga yize ayo amba. Alioze walweze zwalala ni kwalumbunwina yuma yize mwanangana yoze makaayula ali ni ulite wa kwita.”l
10 Chocho Samuele yalweza atu waze te anechi mwanangana maliji eswe a Yehova. 11 Iye yamba ngwenyi: “Mwanangana yoze makanuyula, makapwa ni ulite wa kwita yuma yino: Makanutambula ana jenu a malunga hanga amwendesele matemba jenyi a jita ni kumwendesela tuvwalu, ana jenu akwo makapwa akwa-kuzomboka kulutwe lia matemba jenyi. 12 Makatongola ana jenu amwe hanga apwe miata a kanunu, miata a makumi atano, akwo makalima minda yenyi ni kucha mbuto yenyi, makamufulila mata a jita ni yikwata ya matemba jenyi. 13 Ana jenu a mapwo makamulingila maji a lupembo mupema, kumutelekela ni kumulingila mbolo. 14 Makanutambula minda yenu yipema, minda yenu ya vinyu ni ya olevwe ni kuyihana kuli ndungo jenyi. 15 Makanda chihanda cha kumi cha mu minda yenu ya mbuto ni mu minda yenu ya vinyu, makayihana kuli yilolo jenyi ni tuvumbi twenyi. 16 Makanutambula ndungo jenu a malunga ni a mapwo, ngombe jenu apema ni yimbulu, makakalakala nayo mu mulimo wenyi. 17 Makanda chihanda cha kumi cha mapanga jenu, yenu munukapwa ndungo jenyi. 18 Mukukaheta tangwa lize munukalila mumu lia mwanangana yoze nwalitongwela yenwene, alioze Yehova kechi kanukumbulula.”
19 Chipwe chocho atu kapanjikile Samuele, ayo yamba ngwo: “Kukushi mulonga! Yetu tunazange wika kupwa ni mwanangana hanga atuyule. 20 Chocho mutupwa ngwe akwa-mavungu eswe. Mwanangana wetu makatuyula, kutusongwela ni kutwashila jita.” 21 Muze Samuele evwile yeswe yize A-Izalele ambile, yayilweza Yehova. 22 Yehova yalweza Samuele ngwenyi: “Linga yize ayo amba, atongwele mwanangana hanga aayule.” Mba Samuele yamba kuli A-Izalele ngwenyi: “Mutu ni mutu ahiluke mu mbonge yenyi.”