Mukanda Utangu wa Samuele
21 Kulutwe, Ndawichi yaya ku Nobe, kuli sasendote Ahimeleke. Muze Ahimeleke amwene Ndawichi, yaputuka kuchikima ni woma, yamuhula ngwenyi: “Mumu liaka uli ukawe? Mumu liaka kuwejile ni mutu niumwe?” 2 Ndawichi yakumbulula sasendote Ahimeleke ngwenyi: “Mwanangana kangutuma hanga ngulinge yimwe, alioze kamba ngwenyi: ‘Kanda ulweza mutu niumwe yize nakutuma kulinga, chipwe hakutwala ku usongwelo uze nakwaha.’ Kashika nalitesanga ni atu jami hanga tuliwane ku chimwe chihela. 3 Mwene wami, nyi nuli kama ni mbolo jitano, ngwehenujo, ngwehenu kama chipwe chuma cheswacho.” 4 Alioze, sasendote yamba kuli Ndawichi ngwenyi: “Chishi ni mbolo jeswajo, nguli wika ni mbolo jisandu; munuhasa kujilia nyi atu je kalimwene* ni mapwo.” 5 Ndawichi yamba kuli sasendote ngwenyi: “Pundu lume, kutwalimwene ni mapwo, mumu chipwe ku matangwa akunyima muze twapwile ni kuya mu jita, te kutushi kulimona ni mapwo. Nyi atu jami kakulinanga ha mulimo weswawo, mba yika mutwamba musono?” 6 Chocho sasendote yamwaha mbolo jisandu, mumu kwapwile wika mbolo ja kutumbieka jize achijile kumeso ja Yehova ni kusalakanyisaho mbolo jaha, ha tangwa lize apwile ni kuchiza mbolo.
7 Ha tangwa liacho, hapwile umwe wa kuli tuvumbi twa Saulu, yoze akwachile ni kumutumbika kumeso ja Yehova. Jina lienyi te Doege, Ka-Endome, mwata wa tufunga twa Saulu.
8 Ndawichi yahula Ahimeleke ngwenyi: “Mwene wami, shina kushi kama ni kunga hanji katana? Yami chanehene katana kami, chipwe yitwa yami ya jita, mumu mwanangana kangutumanga fuji-fuji.” 9 Sasendote yamukumbulula ngwenyi: “Nguli ni katana wa Ngoliate, Ka-Filistea yoze yena washihile mu mungulunga wa Ela. Au aha, wakuvunga ha hina, kunyima lia efode. Nyi muzanga kwanda anda kwe, mumu yomwene wika nguli nenyi.” Ndawichi yamba ngwenyi: “Ngweheye, mumu kukushi katana mukwo walifwa ni yono.”
10 Ha tangwa lize, Ndawichi yakatuka, yanunga ni kuchina Saulu, mba yaheta mu chifuchi cha Akishe, mwanangana wa Ngata. 11 Tuvumbi twa Akishe yamba kuli iye ngwo: “Au hi Ndawichi ko mwanangana wa chifuchi cha Izalele? Ngwami mwenau apwile ni kuhanganyina ni kwimbila ngwo:
‘Saulu hashiha tununu,
Ndawichi hashiha tununu a tununu’ nyi?”
12 Muze Ndawichi anyongene ha maliji waze ayo ambile, yevwila woma unji Akishe, mwanangana wa Ngata. 13 Chocho yaputuka kulisolola kumeso jo ngwe kanazaluka, yaputuka kulinga yuma ngwe chizaluke. Yaputuka kufunjeka ku mapito ni kulizulumwina yileji ku wevu. 14 Mba Akishe yamba kuli tuvumbi twenyi ngwenyi: “Kunwamwene ngwenu lunga yono kali chizaluke? Mumu liaka nwangunehenaye? 15 Nguli ni yizaluke anji, mumu liaka nunangunehena chizaluke mukwo? Mutu wa mutapu au te katambile kunjila mu zuwo liami.”