Mukanda Utangu wa Samuele

27 Alioze Ndawichi yamba mu mbunge yenyi ngwenyi: “Tangwa limwe Saulu meza kangushiha. Chuma natamba kulinga chili kuchinyina ku chifuchi cha A-Filistea, chocho Saulu kechi kungufupa nawa mu chifuchi cheswe cha Izalele, mba mungutusuka mu moko jenyi.” 2 Kashika, Ndawichi ni malunga 600 waze apwile hamwe nenyi, yaya kuli Akishe, mwana wa Maoke, mwanangana wa Ngata. 3 Ndawichi ni atu jenyi, mutu ni mutu ni usoko wenyi, yatwama ni Akishe ku Ngata. Ndawichi yaya ni mapwo jenyi aali, Ahinoame Ka-Yezerele, ni Abigale Ka-Karmela, yoze wapwile pwo lia Nabale. 4 Muze Saulu evwile ngwo Ndawichi hachinyina ku Ngata, yecha kumukaujola.

5 Ndawichi yamba kuli Akishe ngwenyi: “Nyi munuzanga, ngwehenu kama chihela cha kutwama mukachi ka yihunda yenu. Kuchalitele yami kavumbi kenu kutwama ni yenu mu mbonge ya mwanangana.” 6 Ha tangwa lize, Akishe yamwaha Zikalage. Kashika Zikalage yapwa yambala ya mianangana ja Yunda ndo musono.

7 Ndawichi kalingile mwaka umuwika ni tukweji awana mu chihunda cha A-Filistea. 8 Ndawichi ni atu jenyi kapwile ni kulukukila A-Ngeshure, A-Ngezere ni A-Amaleke, mumu te katwama mu njiza yize yakatuka ku Telama ndo ku Shure, yize yinayi ndo ku chifuchi cha Engitu. 9 Muze Ndawichi apwile ni kulukukila yihunda yacho, te kakushiha atu eswe, malunga ni mapwo. Matambula mapanga, ngombe, yimbulu, tumelu ni mazalo, mba mahiluka kuli Akishe. 10 Mba muze Akishe apwile ni kumuhula ngwenyi: “Chihela chika walukukilanga musono?” Ndawichi te kakumukumbulula ngwenyi: “Ku uto ya Yunda, hanji ku uto ya chifuchi cha A-Jeramila, hanji ku uto ya chifuchi cha A-Kene.” 11 Ndawichi kapwile ni kushiha eswe, malunga ni mapwo, hanga achine kutwala niumwe ku Ngata, mumu te kakwamba ngwenyi: “Ayo matwambulula.” (Yino ye Ndawichi apwile ni kulinga ha mashimbu eswe atwamine mu chihunda cha A-Filistea.) 12 Akishe te kakutayiza yeswe yize Ndawichi apwile ni kwamba, ni kunyonga ngwenyi: ‘Kwamba pundu, atu jenyi A-Izalele keshi kumuzanga nawa, haliapwila mapwa kavumbi kami ku miaka yeswe.’