Mukanda Utangu wa Samuele

29 A-Filistea yakungulula maswalale jo eswe ku Afeke, alioze A-Izalele yasa chilombo cho hakamwihi ni fuji lia meya ku Yezerele. 2 Manguvulu ja A-Filistea yatetekela ni yizavu yo ya lukama ni ya kanunu, Ndawichi ni atu jenyi te kanakaula mu nyima ni Akishe. 3 Alioze, miata ja A-Filistea yahula ngwo: “A-Hepreu wano yika akaula kuno?” Akishe yakumbulula ngwenyi: “Au kali Ndawichi, kavumbi ka Saulu, mwanangana wa A-Izalele. Katwama ni yami ha mwaka umuwika hanji kuhiana, chize ha tangwa lize anakachinyina kuli yami ndo musono, kanda nguchimona upi niumwe muli iye.” 4 Alioze, miata ja A-Filistea yapihilila nenyi, yamba ngwo: “Funyisa lunga yono mu mbonge yize wamuhele, kanda wecha hanga aye ni yetu ku jita, hanga achine kutwalumukina muze jita muyiputuka. Makapatula mitwe ya atu jetu hanga mwata wenyi amutayize nawa. 5 Ngwami Ndawichi yono mwe apwile ni kuhanganyina ni kwimbila ngwo:

6 Kashika, Akishe yasanyika Ndawichi, yamulweza ngwenyi: “Ni mwono wa Yehova, yena uli mukwa-ululi, yami te ngunazange hanga uye ni maswalale jami ku jita, mumu chize ha tangwa lize wahetele kuno ndo musono, chamwene upi niumwe muli yena. Alioze manguvulu keshi kukujikijila. 7 Kashika, funa ni sambukila, kanda ulinga chuma nichimwe chize muchivwisa kupiha manguvulu ja A-Filistea.” 8 Alioze, Ndawichi yahula Akishe ngwenyi: “Mumu liaka? Yika nalinga? Chuma chika chipi mwene wami nwamona muli yami kavumbi kenu chize ha tangwa lize nejile kuli yenu ndo musono? Mumu liaka chatambile kuya ni kwasa jita ni akwa-kole jenu mwene wami mwanangana?” 9 Akishe yakumbulula ngwenyi: “Ku nyonga liami, yena uli mutu mupema uli ngwe mungelo wa Zambi. Alioze, miata ja A-Filistea kamba ngwo: ‘Kanda utayiza hanga aye ni yetu ku jita.’ 10 Kashika, yena ni tuvumbi twa mwene we waze wejile no, hamene nukahinduke chimenemene, nuhiluke muze mukucha.”

11 Chocho, Ndawichi ni atu jenyi yahinduka chimenemene, yahiluka ku chifuchi cha A-Filistea. A-Filistea yaya ku Yezerele.