Mukanda Wamuchiali wa Samuele
1 Muze Saulu te hafwa, ni Ndawichi hafuna kuze ayile ni kwasa jita ni A-Amaleke, Ndawichi yatwama mu Zikalage matangwa aali. 2 Ha tangwa liamuchitatu, mu chilombo cha Saulu yimukatuka umwe lunga, ni mazalo a kusuwa ni mavu mu mutwe. Muze akundamine kuli Ndawichi, yafulamana, yalimbila hashi.
3 Ndawichi yamuhula ngwenyi: “Kulihi unakatuka?” Iye yakumbulula ngwenyi: “Nachina mu chilombo cha A-Izalele.” 4 Ndawichi yamuhula ngwenyi: “Kuchi chapwa? Lisesa, ngulweze.” Iye yakumbulula ngwenyi: “Maswalale kachina ku jita, anji kalemana ni kufwa. Chipwe lume Saulu ni mwanenyi Jonata no kafwa.” 5 Ndawichi yahula kuli lunga yoze wanehene sango ngwenyi: “Kuchi unanyingika ngwe Saulu ni mwanenyi Jonata kafwa?” 6 Lunga yakumbulula ngwenyi: “Yami kwami te ngunalipalikila ku Mulundu wa Ngilboa, yingumona Saulu kanashachila ha kunga lienyi, akwa-kwendesa matemba a jita ni akwa-kwendesa tuvwalu te kanakundama kuli iye. 7 Muze ateulukile, yangumona, yangusanyika. Yami yingwamba ngwami: ‘Yami uno!’ 8 Iye yanguhula ngwenyi: ‘Yena iya?’ Yingumukumbulula ngwami: ‘Nguli Ka-Amaleke.’ 9 Chocho yamba ngwenyi: ‘Tweya hanga ungushihe, mumu yikola yinji ngunevu, alioze nguchili ni mwono.’ 10 Yami yinguya, yingumushiha, mumu te ngunanyingika ngwami, kechi kumona mwono, mumu kamulemekene chikolo. Mba yingumuzula chipangula chenyi ni mukosa ku kwoko, yinguyineha kuli yenu mwene wami.”
11 Muze Ndawichi achivwile, yasuwa mazalo jenyi, ni atu eswe waze apwile hamwe nenyi no yachilinga. 12 Ayo yalinyenga, yalila ni kulitwamina kulia ndo chingoloshi, mumu lia Saulu, mwanenyi Jonata, atu ja Yehova, ni akwa-zuwo lia Izalele, mumu kafwile ku jita.
13 Ndawichi yahula lunga yoze wamunehenene sango ngwenyi: “Uli wa kulihi?” Iye yakumbulula ngwenyi: “Nguli mwana wa umwe ka-njize, Ka-Amaleke.” 14 Ndawichi yamba kuli iye ngwenyi: “Mumu liaka kuwevwile woma wa kwolola kwoko lie hanga ushihe mutu yoze Yehova hanawayisa?” 15 Mba Ndawichi yasanyika umwe wa kuli atu jenyi, yamulweza ngwenyi: “Tweya kuno, mushihe!” Chocho lunga wacho yeza, yamushiha. 16 Ndawichi yamba kuli iye ngwenyi: “Manyinga je apwe ha mutwe we, mumu kanwa lie, lie liakuhisa muze wamba ngwe: ‘Yami nashiha yoze Yehova hanawayisa.’”
17 Chocho Ndawichi yemba mwaso wa malilo, mumu lia Saulu ni mwanenyi Jonata, 18 yamba ngwenyi mwaso wacho katamba kuulongesa A-Yunda. Mwaso wacho yauvuluka ngwo: “Uta wa Manana.” Uli wakusoneka mu mukanda wa Njasha ngwo:
19 “Izalele, upeme we hiwatoka ku milundu.
Tala chize yitakame halimbuka!
20 Kanda nuchambulula mu Ngata;
Kanda nuchambujola mu matapalo ja Asekalone,
Hanga ana-mapwo ja A-Filistea achine kuwahilila,
Hanga ana-mapwo ja yilima achine kutumbwoka ni uwahililo.
21 Yenu milundu ya Ngilboa,
Hali yenu kanda hapwa chipwe mume, chipwe vula,
Chipwe mu minda, kanda mukema yuma yize makahana ngwe milambu yisandu,
Mumu hali yenu he alelesele lukepwe wa yitakame,
Lukepwe wa Saulu keshi nawa wakuwayisa ni maji.
22 Uta wa manana wa Jonata te kuushi kufuna kunyima,
Hiwanwa manyinga ja akwa-kole,
Katana ka Saulu te keshi kuhiluka chakuhona kukumba.
23 Muze Saulu ni Jonata apwile ni mwono atu te kakwazanga chinji,
Chipwe ha kufwa cho kahashile kwahandununa.
Tambu lio te liahiana lia pupa,*
Tachi jo te jahiana ja ndumba.
24 Ana-mapwo ja Izalele, lilenu Saulu,
Yoze wanujikile mazalo achila ni yuma ya ndando,
Yoze wasele yuma ya oru ku mazalo jenu.
25 Yitakame halimbuka ku jita!
Jonata hamushihila ku milundu!
26 Ngunanenganyana chinji mumu lia yena ndumbwami Jonata;
Yena wapwile sepa yoze te nazanga chinji.
Kuli yami, zango lie te liahiana zango lia mapwo.
27 Tala chize yitakame halimbuka,
Yitwa ya jita hiyanonga!”