Mukanda Utangu wa Mianangana
18 Hakupalika cha amwe mashimbu ha mwaka wamuchitatu, Yehova yalweza Eliya ngwenyi: “Yako ulisolole kuli Ahabe, yami mungunokesa vula mu chifuchi.” 2 Mba Eliya yaya hanga alisolole kuli Ahabe. Ha mashimbu jacho, mu Samaria mwapwile zala yinji.
3 Chocho, Ahabe yasanyika Obadia, iye mwe te wakusongwela zuwo lia Ahabe. (Obadia te kakuwayila Yehova. 4 Muze Jezebele te anashiha aprofeta ja Yehova, Obadia yasweka aprofeta 100 mu yivwenge. Chizavu ni chizavu chapwile ni aprofeta 50, te kakwaha mbolo ni meya.) 5 Ahabe yalweza Obadia ngwenyi: “Jinga mu chifuchi cheswe, yako ku mashima eswe a meya ni ku yikulo yeswe hanji mutuwana chihela chize chili ni mwambu unji hanga tuvwalu jetu ni mula achine kufwa.” 6 Ayo yateta chifuchi hakachi. Ahabe yaya ukawenyi, Obadia neye yaya ukawenyi.
7 Muze Obadia te ali mu jila, Eliya yamupatwiza. Obadia yamumona, yafulamana hashi, yamuhula ngwenyi: “Yenu nuli mwene wami Eliya nyi?” 8 Yamukumbulula ngwenyi: “Ewa, yami. Yako ulweze mwanangana we ngwe: ‘Eliya kuno ali.’” 9 Alioze Obadia yamukumbulula ngwenyi: “Mulonga uka nalinga mba nungutume yami kavumbi kenu kuli Ahabe hanga angushihe? 10 Ngunalishinga mu jina lia Yehova Zambi ye, Zambi ya mwono ngwami, kukushi vungu chipwe wanangana kuze mwene wami kayile ni kukufupa. Muze mwanangana te akwahula mba ayo makumbulula ngwo: ‘Mu chifuchi chetu keshimo,’ mwanangana te kakwashinjila hanga alishinge ngwo, kutwamumwene. 11 Haliapwila yenu nunambe ngwenu: ‘Yako ulweze mwanangana we ngwe: “Eliya kuno ali.”’ 12 Muze munguya, spiritu ya Yehova muyinutwala ku chihela kuze chanyingikine. Kashika, nyi nalweza Ahabe ngwami kuno nuli, mba iye kanuwanyine, pundu lume mangushiha. Yami kavumbi kenu nakulingila Yehova chize ku wanuke wami. 13 Kakanulwezele yize nalingile muze Jezebele te anashiha aprofeta ja Yehova? Naswekele kulakaji aprofeta ja Yehova mu yizavu yaali, chizavu ni chizavu chapwile ni aprofeta 50, naahele mbolo ni meya. 14 Haliapwila yenu nunambe ngwenu: ‘Yako ulweze mwanangana we ngwe: “Eliya kuno ali.”’ Kwamba pundu, iye mangushiha.” 15 Alioze Eliya yamba ngwenyi: “Ngunalishingi mu jina lia Yehova wa tujita yoze nakuwayila ngwami, musono mungulisolola kuli Ahabe.”
16 Chocho, Obadia yaya kuli Ahabe yamulweza yize amutuma, mba Ahabe yaya kuli Eliya.
17 Muze amwene Eliya, Ahabe yamba ngwenyi: “Kuma yena nyi, yena mwe unapinjisa A-Izalele nyi?”
18 Eliya yamukumbulula ngwenyi: “Hi yami ko ngunapinjisa A-Izalele, kapinda kanakatuka kuli yena ni akwa-zuwo lia tatenu, mumu hinwehuka shimbi ja Yehova, nunawayila Mbale. 19 Haliapwila sanyika A-Izalele eswe eze ku Mulundu wa Karmela, sanyika nawa 450 aprofeta ja Mbale ni 400 aprofeta ja manangamo asandu waze akulia ku mesa ya Jezebele.” 20 Chocho Ahabe yatuma sango kuli A-Izalele eswe, yakungulwila aprofeta ku Mulundu wa Karmela.
21 Eliya yakundama kuli mbunga, yamba ngwenyi: “Ndo tangwa lika munununga ni kuyambashana? Nyi Yehova kali Zambi wamwenemwene muwayilenu, nyi Mbale muwayilenu.” Alioze atu yahola kuluu. 22 Eliya yalweza atu ngwenyi: “Yami wika nasala ngwe profeta wa Yehova. Alioze kuli 450 aprofeta ja Mbale. 23 Ngunazange hanga ayo anehe ngombe aali. Ngombe umuwika mamupatula amuse ha kunyi, alioze kanda asaho kahia. Yami mungululieka ngombe mukwo, mungumusa ha kunyi, alioze chichi kusaho kahia. 24 Muze munuchilinga, munutambika jina lia zambi yenu, mba ni yami mungutambika jina lia Yehova Zambi yami. Zambi yoze makumbulula ha kutuma kahia, mwe Zambi wamwenemwene.” Chocho atu eswe yakumbulula ngwo: “Yize nwamba yili yipema.”
25 Eliya yalweza aprofeta ja Mbale ngwenyi: “Yenu e munulianga kusakula ngombe ni kumululieka mumu nuli anji. Mba munutambika ha jina lia zambi yenu, alioze kanda numusa kahia.” 26 Chocho, ayo yanda ngombe yoze ejile nenyi, yamululieka. Yasanyika Mbale chize chimene ndo tangwa ha muchima ni kwamba ngwo: “Mbale, tukumbulule kama.” Alioze niumwe kakumbulwile. Ayo yanunga ni kukina ku chilumbilo chize atungile. 27 Muze tangwa te hiliapwa ha muchima, Eliya yaputuka kwahepwisa ni kwamba ngwenyi: “Kololokenu chikolo, mumu iye kali zambi. Kota kanashinginyeka hanji mu kumba aya. Hanji kanapombo, ndo umwe amuhindwise.” 28 Ayo yakololoka chikolo, yaputuka kulilenga-lenga ha mijimba ni poko ni kunga kulita ni ndako jo, yachilinga ndo muze mijimba yo yazalile ni manyinga. 29 Ayo yanunga ni kukololoka ndo ha ola ya kuhana mulambu wa mbuto wa ha chingoloshi, alioze kevwile liji nilimwe, niumwe wakumbulwile wakuhi.
30 Chocho Eliya yalweza atu eswe ngwenyi: “Kundamenu kuli yami.” Ayo yakundama kuli iye, iye yalulieka chilumbilo cha Yehova chize apuzwile. 31 Eliya yanda mawe 12 kulita ni minyachi ya ana ja Yakomba, yoze Yehova alwezele ngwenyi: “Haliapwila jina lie mulipwa Izalele.” 32 Mawe jacho, Eliya yatunga no chilumbilo mu jina lia Yehova. Yafula kapila yoze wajingilikile chilumbilo, kapila wacho kapwile munene chinji mumu te mahasa kutumbamo sea* jaali ja mbuto. 33 Eliya yalulieka kunyi, yapatula ngombe ni kumusaho, yamba ngwenyi: “Zalisenu ni meya milondo yinene yiwana, amwanginenu ha mulambu wa kwocha ni ha kunyi.” 34 Iye yaalweza ngwenyi: “Chilingenu nawa ha chisuho chikwo.” Ayo yachilinga. Yamba nawa ngwenyi: “Chilingenu ha chisuho chamuchitatu.” Ayo yachilinga. 35 Chilumbilo cheswe yichiula ni meya. Eliya yazalisa nawa kapila ni meya.
36 Ha ola ya kuhana mulambu wa mbuto wa ha chingoloshi, profeta Eliya yakundama ku chilumbilo, yamba ngwenyi: “Yehova, Zambi ya Apalahama, ya Izake ni ya Izalele, atu katamba kunyingika musono ngwo, uli Zambi mu Izalele, yami nguli kavumbi kenu, yuma yeswe yize nalinga, nayilinga kulita ni liji lienu. 37 Yehova ngukumbulule kama. Ngukumbulule kama hanga atu wano anyingike ngwo, Yehova mwe Zambi wamwenemwene, unakwasa hanga ayo ahiluke kuli yena.”
38 Chocho, Yehova yahulumwisa kahia, yikocha mulambu wa kwocha, kunyi, mawe, mavu ni meya waze apwile mu kapila yoma. 39 Muze atu achimwene, yafulamana hashi, yamba ngwo: “Yehova mwe Zambi wamwenemwene, Yehova mwe Zambi wamwenemwene.” 40 Eliya yalweza atu ngwenyi: “Kwatenu aprofeta ja Mbale. Niumwe kanda achina.” Chocho ayo yakwata aprofeta ja Mbale, Eliya yaapalumwisa ku lwiji Kishone, yaashihila kuzekwene.
41 Chocho, Eliya yalweza Ahabe ngwenyi: “Yako ulie, unwe, mumu ngunevu zungo lia vula munji.” 42 Chocho Ahabe yaya, yalia, yanwa, alioze Eliya yakanduka ku Mulundu wa Karmela, yafulamana hashi. 43 Eliya yalweza chikwashi wenyi ngwenyi: “Lisesa, yako utale kuze kwaya kalunga-lwiji.” Chocho iye yaya, yatala, yamba ngwenyi: “Chamwene chuma nichimwe.” Eliya yamulweza ha yisuho shimbiali ngwenyi: “Yako utale cheka.” 44 Ha chisuho chamuchishimbiali chikwashi wenyi yamba ngwenyi: “Ngunamona lelwa likehe ngwe kwoko lia mutu, linakatuka mu kalunga-lwiji.” Eliya yamba ngwenyi: “Yako ulweze Ahabe ngwe: ‘Lulieka temba lie lia jita. Palumuka hanga vula achine kukukwika.’” 45 Ha shimbu lizeliene kwilu yikulaa pwi, yikupwa fuji ni vula yaputuka kunoka chinji. Mba Ahabe yanyina mu temba lienyi lia jita, yaya ku Yezerele. 46 Kwoko lia Yehova yiliza hali Eliya, chocho iye yatunya mazalo jenyi ndo mu zalilo ni kwakasa, mba yaputuka kuzomboka, yahiana Ahabe ndo muze ahetele ku Yezerele.