Mukanda Utangu wa Samuele
2 Mba Hana yalemba ngwenyi:
“Mbunge yami yinawahilila muli Yehova.
Muli Yehova tachi jami jakwoka.
Nakukumbulula akwa-kole jami ni hamu,
Mumu nakuwahilila ni yitanga ya ulamwino we.
2 Niumwe musandu ngwe Yehova wakuhi.
Kukushi mukwo, shina wika yena.
Kukushi liwe lialifwa ni Zambi yetu.
3 Kanda nununga ni kuhanjika ni kulizata.
Mu makanwa jenu kanda mutuhuka maliji a kulisuta.
Mumu Yehova kali Zambi yoze unanyingika yuma yeswe.
Iye kakuhengwola kanawa yitanga.
4 Mata a manana ja akwa-ndundo kakwamakwona.
Alioze waze keshi ndundo kakwaha ndundo.
5 Waze apwile ni kulia, kanakalakalila kulia.
Alioze waze apwile ni zala, hapwa ni kulia.
Mumba hasema ana shimbiali.
Alioze yoze wapwile ni ana anji, hasala mokomoko.
6 Yehova kakushiha, kakuhana nawa mwono.
Iye kakupalumwisa atu mu Fuka* ni kwatuhwisamo.
7 Yehova kakupwisa mutu chiswale ni kumupichisa.
Kakupalumwisa ni kunangamisa.
8 Iye kakuchiza mu fufuta mutu yoze keshi ulemu.
Kakuchiza chiswale ha shita lia uto.
Hanga atwame hamuwika ni ana ja mianangana.
Ni kwaha chihela chilemu.
Fundamentu ya hashi yapwa yambala ya Yehova.
Helu liayo he asele mavu.
9 Iye kakufunga kwenda cha waze ashishika kuli iye.
Alioze yingulungulu makaaholesa mu milima.
Mumu mutu keshi kukumba ku tachi jenyi mwene.
10 Yehova makanongesa waze akulimika nenyi.
Makakulunguza mu malilu hanga asolole utenu wenyi.
Yehova makasopesa ndo ku masongo a hashi.
Makahana ndundo kuli mwanangana wenyi.
Ni kuweza tachi ja yoze iye hanawayisa.”
11 Chocho Elekana yahiluka ku zuwo lienyi ku Rama, alioze mwana yapwa kavumbi ka Yehova kumeso ja sasendote Eli.
12 Ana ja Eli kapwile atu api, te keshi kuvumbika Yehova. 13 Yino ye ayo apwile ni kulinga ni yihanda yize asasendote apwile ni ulite wa kutambula kuli atu: Mashimbu eswe umwe te akuhana chitapo, chikwashi wa sasendote kapwile ni kwiza ni nguto ya misako yitatu ku kwoko shimbu machiteleka yifwo. 14 Nguto yacho kapwile ni kuyichoka mu ndoho, mu chikango, mu ndoho ya kwochela yifwo hanji mu ndoho yeswayo. Mba yifwo yeswe te yakukwata ku nguto ya misako, te yakupwa ya sasendote. Yino ye ana ja Eli ni yikwashi jo apwile ni kulinga kuli A-Izalele eswe waze te akuya ku Shilo. 15 Chikwo nawa, shimbu lume mutu yoze wakuhana chitapo kanda achifwinjisa maji, chikwashi wa sasendote te kakwiza mamba kuli iye ngwenyi: “Neha yifwo hanga sasendote oche. Iye kechi kutayiza yifwo ya kuteleka, ndo ya wisu.” 16 Muze mutu wacho apwile ni kumulweza ngwenyi: “Chitangu echa nguchifwinjise maji mba wande yeswayo muzanga,” chikwashi te kakukumbulula ngwenyi: “Ka, ngwehe yifwo haliapwila, nyi ka, munguyanda ku tachi!” 17 Chocho, shili ya yikwashi yiyipwa yinene chinji kumeso ja Yehova, mumu atu jacho kapwile ni kulelesa milambu ya Yehova.
18 Alioze Samuele kapwile ni kuzala efode ya linyu, ni kukalakala kumeso ja Yehova chipwe ngwe te uchili kanuke. 19 Muze naye apwile ni kukanduka mwaka ha mwaka ni lunga lienyi hanga ahane chitapo cha ha mwaka, kapwile ni kumutwalila chikuto cha moko ehi chize te akumutongela. 20 Eli yawahisa Elekana ni pwo lienyi, yamba ngwenyi: “Yehova akwehe mwana mukwo kupalikila muli pwo yono hanga asalakane mwana yoze wahana kuli Yehova.” Mba ayo yafuna ku zuwo. 21 Yehova yewuluka Hana, chocho Hana yaputuka kusema, yasema ana akwo a malunga atatu ni a mapwo aali. Mwe kanuke Samuele yanunga ni kukola kumeso ja Yehova.
22 Eli te hapwa chinji kashinakaji, kevwile yuma yeswe yize ana jenyi apwile ni kulinga kuli A-Izalele eswe, kevwile nawa chize ana jenyi apwile ni kulimona* ni mapwo waze te akalakala ku unjililo wa mbalaka ya kulikungulwila. 23 Iye te kakwalweza ngwenyi: “Mumu liaka nunanungu ni kulinga yuma ya mutapu au? Yuma yize atu anambe hakutwala kuli yenu yili yipi. 24 Hi chocho ko ana jami, sango jize ngunevu jinalimwange hakachi ka atu ja Yehova hi jipema ko. 25 Nyi umwe mutu malinga upi kuli mukwo, umwe mahasa kumulembela kuli Yehova, alioze nyi mutu malinga shili kuli Yehova, iya mahasa kumulembela?” Nihindu ayo kapanjikile tato, mumu Yehova te hatesa kwashiha. 26 Ha shimbu liacho, kanuke Samuele yanunga ni kukola ni kupwa ni utayizo wa Yehova ni wa atu.
27 Umwe mutu wa Zambi yeza kuli Eli, yamba kuli iye ngwenyi: “Yehova kanambe ngwenyi: ‘Shina chakalisolwele kama zwalala ku zuwo lia tatenu shimbu te achili mu Engitu, ku zuwo lia Falau ngwe ndungo? 28 Namusakwile hakachi ka minyachi ya Izalele, hanga akalakale ngwe sasendote wami ni kunyina ha chilumbilo chami hanga alambule yitapo, ahane insensu ni kuzala efode kumeso jami. Milambu yeswe yakwocha yize A-Izalele* apwile ni kuhana nayihanyine ku zuwo lia kalamba ke. 29 Mumu liaka nwakulelesa yitapo ni milambu yami, yize natumine hanga ayihane mu chihela muze natwama? Mumu liaka yena wakununga ni kulemesa ana je kuhiana yami? Mumu liaka yenwene nunatohwa-tohwa ni yihanda yipema yize atu jami A-Izalele akuhana?
30 “‘Kashika, chino che anambe Yehova, Zambi ya Izalele ngwenyi: “Kwamba pundu, nambile ngwami, akwa-zuwo lie ni akwa-zuwo lia kalamba ke, manunga ni kwenda kumeso jami.” Alioze, haliapwila Yehova kanambe ngwenyi: “Chino kuchichi keza kalingiwa, mumu mungulemesa waze mangulemesa, alioze waze mangulelesa ni yami mungwalelesa.” 31 Matangwa kaneza waze mungukahwisa ndundo je ni ndundo ja akwa-zuwo lia tatenu, mutu niumwe wa ku zuwo lie kechi kaheta ku ushinakaji. 32 Muze mungulingila A-Izalele yuma yipema, mukamona mukwa-kole ye mu zuwo liami, ku zuwo lie kukuchi keza kapwa nawa kashinakaji. 33 Mutu umwe wa ku munyachi we yoze chichi kachiza ha mulimo wa chilumbilo chami, makalayisa meso je ni kukuvwisa chinyengo, alioze akwa-zuwo lie anji makafwa ku katana. 34 Yize muyikalingiwa kuli ana je aali a malunga, Hofni ni Finehase, muyikapwa ngwe chilayi kuli yena. Eswe aali makafwa ha tangwa limuwika. 35 Mba mungukalitongwela sasendote yoze washishika. Iye makalinga yuma yize mbunge yami muyizanga, mungukakolesa zuwo* lienyi ku miaka ya mutolo, kumakenda ku miaka yeswe kumeso ja yoze nawayisa. 36 Yoze makasala ku zuwo lia Eli makeza kuli iye ni kuliumba hanga amwehe mbongo ni mbolo, makamba ngwenyi: “Lisesa, ngwehe kama mulimo wa usasendote hanga nguwanyineko kama kachipinji ka lumbolo ngulie.”’”