Mukanda Wamuchiali wa Samuele
22 Muze Yehova alamwinyine Ndawichi ku moko ja akwa-kole jenyi eswe ni ku moko ja Saulu, Ndawichi yembila Yehova mwaso uno: 2 Iye yamba ngwenyi:
“Yehova iye liwe liami, kaposhi wami ni chilamwina chami.
3 Zambi yami kali liwe liami kuze nakuchinyina.
Iye kali lukepwe wami, chilamwina chami wa ndundo, uchinyino wami.
Chihela chami kuze nakuchinyina, chilamwina chami wakungulamwina ku upupilo.
4 Mungutambika Yehova, iye katela uhaliso.
Mangulamwina kuli akwa-kole jami.
5 Mikanya ya kufwa yangujingilikile;
Chizavu cha malunga api changuvwishile mwongo.
6 Ngoji ja Fuka jangulimbile;
Miheto ya kufwa yangujingilikile.
7 Mu lamba liami yingutambika Yehova,
Yingutambika Zambi yami hanga angukwase.
Mu tembele yenyi, iye yangupanjika.
Muteto wami yiuheta kuli iye hanga angukwase.
8 Mba hashi yihanyika ni kuchikima.
Fundamentu ya malilu yiyichikima
Yiyichikima mumu lia utenu wenyi.
9 Mu mazulu jenyi yimukakumuka mwishi.
Mu kanwa lienyi yimutuhuka kahia,
Yimutuhuka makala a kahia.
10 Iye yapalumwisa malilu, yasunuka.
Kwishi lia yiliato yenyi yikupwa milima.
11 Iye yeza ni kuhumuka helu lia kerupimi.
Yahumuka kawashi-washi ha mapulwa ja umwe mungelo.*
12 Iye yalifuka milima; Milima yiyimujingilika ngwe chiswamo,
Yikupwa meya alaa ni malelwa alaa pwi.
13 Kupeyima cha ku meso jenyi, chalekwokesele makala a kahia.
14 Chocho Yehova yaputuka kukulunguza mu malilu.
Liji lia mwe Chitunda yalivwa.
15 Iye yasa mivi kuli akwa-kole jenyi, ayo yachina.
Iye yahenyesa mihenyo yenyi, ayo yalumbangana.
16 Iye yasolola mashima a kalunga-lwiji.
Yehova, fundamentu ya hashi yasolokele mumu lia kupajila akwa-kole je,
Muze wafwambwishile mwiku wa mu mazulu je.
17 Chize mu malilu yazoza kwoko lienyi,
Yangukwata, yanguchiza ha mashima a meya.
18 Iye kangupulwile kuli mukwa-kole wami,
Kuli waze te akunguvwila kole, waze apwile ni tachi jinji kuhiana yami.
19 Ayo yangulundumukina ha tangwa lia lamba liami.
Alioze, Yehova yangukwasa.
20 Iye kangutwalile ku chihela chipema.
Iye kangupulwile mumu te kakunguzanga.
21 Yehova kakunguwahisa kulita ni ululi wami.
Kakungusambisa mumu chishi chitela.
22 Nakufunga shimbi ja Yehova.
Chapiangukile kuli Zambi yami.
23 Yiyulo yenyi ni upatwilo yili kumeso jami.
Chalengulwile shimbi jenyi.
24 Mungununga ni kushishika kuli iye.
Mungusa tachi hanga nguhone kuvulumuna.
25 Yehova anguyukise kulita ni ululi wami,
Kulita ni kusamba cha moko jami kumeso jenyi.
26 Kuli akwa-kushishika, wakupwa mukwa-kushishika.
Kuli mukwa-ululi ni kuli chitakame, wakupwa mukwa-ululi.
27 Kuli mukwa-kulinanga, wakulisolola mukwa-kulinanga.
Alioze, wakulimika ni yingulungulu.
28 Wakulamwina akwa-kulikehesa,
Alioze meso je kakulimika ni akwa-kulinangamisa, wakwapalumwisa.
29 Mumu yena Yehova uli ndeya yami;
Yehova mwe wakungutemwina mu milima.
30 Ni ukwaso we munguhasa kukumba chizavu cha tujita.
Ni ndundo ja Zambi munguhasa kutumbuka chipanga.
31 Majila a Zambi wamwenemwene kapwa angunu.
Yize Yehova akuhanjika yapwa yipema.
Iye kakufunga atu eswe waze akujikijila muli iye.
32 Shina kuli Zambi yoze wahiana Yehova?
Zambi muka wapwa ngwe liwe, kuhiana Zambi yetu?
33 Zambi wamwenemwene iye chiswamo chami.
Iye makalulamisa jila yami.
34 Iye kakukolesa molu jami ngwe molu ja ngulungu.
Kakungumanyisa ha milundu.
35 Iye kakungulongesa kwasa jita,
Kashika nakuhasa kukoneka uta wa unengu.
36 Yena wakungwaha lukepwe we wa ulamwino.
Kulikehesa che chakungunangamisa.
37 Wakutohwesa jila hanga ngwendelemo.
Yiliato yami kuyichi kasenena.
38 Mungukaula akwa-kole jami, mungwakuwisa.
Chichi kuhiluka ndo muze mungwanongesa.
39 Mungukaanongesa, kechi kahasa kukatuka.
Ayo makalimbukila ku molu jami.
40 Mukangujikijisa hanga ngukaye mu jita.
Mukalimbwisa akwa-kole jami kumeso jami.
41 Mukachinyisa akwa-kole jami kumeso jami.
Mungukanongesa waze akunguvwila kole.
42 Ayo kakwita ukwaso, alioze niumwe keshi kwalamwina.
Chipwe kuli Yehova ayo kakwita ukwaso, nihindu iye keshi kwakumbulula.
43 Mungwafwenya ngwe fufuta ya mavu;
Mungwafwenya ni kwaliata-liata ngwe malowa mu matapalo.
44 Mukangulamwina muze atu jami makangukatukila.
Mukangufunga hanga ngukapwe mwata wa akwa-mavungu.
Atu waze chanyingikine makangulingila.
45 Muze makevwa hakutwala kuli yami, ayo makanguzeyela.
Yilambala makangwononokena.
46 Yilambala kechi kapwa ni hamu.
Makatuhuka ku yiswamo yo ni kuchikima ni woma.
47 Yehova kwali, iye afumane, kali Liwe liami.
Zambi yami ya ulamwino anangame!
48 Zambi wamwenemwene kakukumba akwa-kole jami.
Kakuzeyesa mavungu kuli yami.
49 Iye kakungulamwina kuli akwa-kole jami waze ali ni ufwatulo.
Yena wakungunangamisa hali waze akulimika ni yami.
Yena wakungulamwina kuli yingulungulu.
50 Yehova, kashika mungukakunangamisa hakachi ka mavungu.
Mungukemba miaso ya uhaliso ha jina lie.
51 Iye kakukwasa mwanangana wenyi kukumba.
Kakusolola zango lize kulishi kuhwa kuli yoze hanatongola,
Kuli Ndawichi ni munyachi wenyi ndo ku miaka ya mutolo.”