Mukanda Utangu wa Samuele
9 Kwapwile umwe lunga wa ku vungu lia Mbenjamine, jina lienyi te Kishi, mwana wa Abiele, mwana wa Zerore, mwana wa Mbekorate, mwana wa Afia. Iye te Ka-Mbenjamine, kapwile pichi munene. 2 Kapwile ni mwana wa lunga jina lienyi te Saulu. Saulu kapwile mukweze, chikwo nawa, kapwile mupema chinji, hakachi ka A-Izalele kuhakapwile niumwe lunga mupema kuhiana iye. Iye te musuku chinji kuhiana eswe; atu eswe kapwile ni kumusulila ha yipaya.
3 Muze yimbulu ja Kishi tato ya Saulu atokele, iye yamba kuli mwanenyi Saulu ngwenyi: “Lisesa, yako ni umwe chikwashi hanga nufupe yimbulu.” 4 Ayo yapalika ndusu mu chifuchi cha milundu cha Eframe ni mu chifuchi cha Shalisha, alioze kaawanyine. Yapalika ndusu mu chifuchi cha Shalimi, hindu kaawanyine. Yapalika nawa mu chifuchi cheswe cha A-Mbenjamine, nihindu kaawanyine.
5 Ayo yanjila mu chifuchi cha Zufu, Saulu yamba kuli chikwashi yoze te ali nenyi ngwenyi: “Tuhiluke kwetu, nyi ka, tata malipikala ni yetu, shimbu alipikale ni yimbulu.” 6 Alioze, chikwashi yamulweza ngwenyi: “Mu mbonge yino muli umwe mutu wa Zambi yoze akuvumbika chinji. Yuma yeswe yize akwamba yakumanunuka pundu. Tuyeko haliapwila. Hanji matusolwela kuze mututalikisa.” 7 Saulu yamba kuli chikwashi chenyi ngwenyi: “Nyi twayako, yika mutumutwalila? Kutushi chipwe ni kalumbolo mu tuku jetu, kutushi ni chuma nichimwe chize mutuhasa kuhana kuli mutu wa Zambi wamwenemwene ngwe chawana. Yika tuli nayo yize mutuhasa kumwaha?” 8 Chikwashi yamba kuli Saulu ngwenyi: “Tala, nguli ni chihanda chamuchiwana cha shekele* ya prata mu kwoko; munguchihana kuli mwe mutu wa Zambi wamwenemwene hanga atulweze kuze mututalikisa.” 9 (Ku shakulu mu Izalele, muze mutu te akuya hanga ahule yimwe kuli Zambi te kakwamba ngwenyi: “Tuyenu kuli mukwa-kumona usolwelo.” Mumu waze akuvuluka musono ngwo aprofeta, ku shakulu kapwile ni kwavuluka ngwo akwa-kumona usolwelo.) 10 Saulu yamba kuli chikwashi chenyi ngwenyi: “Yize wamba yinapeme, tuye.” Chocho yaya mu mbonge muze mwapwile mutu wa Zambi wamwenemwene.
11 Muze ayo te anakanduka hanga ahete mu mbonge, yalitakana ni ana-mapwo waze te anayi ni kutaha meya, yaahula ngwo: “Mukwa-kumona usolwelo kali mu mbonge yino?” 12 Ayo yaakumbulula ngwo: “Ewa, mwali, kulutwe ako ali. Tambukenu, musono aheta mu mbonge, mumu atu mahana chitapo musono ha nangamo yisandu. 13 Muze mununjila mu mbonge, munumuwana shimbu kanda achikanduka ku nangamo lisandu hanga alie. Atu kechi kulia ndo muze iye maheta, mumu iye mwe wakuwahisa chitapo. Muze iye maheta mba atu malia. Kandukenu haliapwila, munumuwana.” 14 Chocho ayo yakanduka mu mbonge. Muze anjililemo, yamona Samuele kaneza ni kulitakana no hanga akanduke ku mulundu usandu.
15 Ha tangwa limuwika kunyima, shimbu Saulu te kanda achiheta, Yehova kalwezele Samuele ngwenyi: 16 “Hamene, ha mashimbu ngwe wano, mungukatuma umwe lunga, wa ku chifuchi cha Mbenjamine. Watamba kumuwayisa hanga apwe kasongo ka atu jami A-Izalele, iye mwe makalamwina atu jami ku moko ja A-Filistea. Mumu hinamona lamba lia atu jami, miteto yo hiyaheta kuli yami.” 17 Muze Samuele amwene Saulu, Yehova yamba kuli iye ngwenyi: “Mutu nakulwezanga mwenau: ‘Iye mwe makayula atu jami.’”
18 Saulu yakundama kuli Samuele, ku chikolo cha mbonge, yamuhula ngwenyi: “Lisesa, ngulwezenu kama, ku zuwo lia mukwa-kumona usolwelo kulihi?” 19 Samuele yakumbulula Saulu ngwenyi: “Mukwa-kumona usolwelo yami. Tetekela ndo ku nangamo lisandu. Musono yenu munulia hamwe ni yami. Hamene chimenemene mungukwecha hanga uye, ni kukulweza yeswe yize unazange kunyingika. 20 Kanda ulipikala hakutwala ku yimbulu waze atokanga matangwa atatu kunyima, mumu haawana. Yuma yeswe yipema yize yatwama mu Izalele yaya? Ngwami ya yena ni akwa-zuwo lieswe lia tatenu?” 21 Saulu yakumbulula ngwenyi: “Yami kwami nguli Ka-Mbenjamine, wa ku kavungu kakehe mukachi ka Izalele. Chipwe usoko wami uli ukehe chinji hakachi ka asoko a ku vungu lia Mbenjamine. Mba mumu liaka nunambe yuma yino kuli yami mwene wami?”
22 Samuele yatwala Saulu hamwe ni chikwashi chenyi mu chihela cha kulila, yaaha yitwamo ya kulutwe hakachi ka atu waze asanyikine; mwapwile atu 30. 23 Samuele yamba kuli mukwa-kuteleka ngwenyi: “Neha yifwo yize nakwahanga hanga utulike.” 24 Chocho, mukwa-kuteleka yanda kulu lieswe lia chimuna, yalitumbika kumeso ja Saulu. Samuele yamba ngwenyi: “Yifwo yize twakuselanga ayi. Liako, mumu twakuselangayo hanga uyilie ha mashimbu wano. Mumu naalwezanga ngwami: ‘Mungutambula ngeji.’” Chocho, Saulu yalia ha tangwa lize hamuwika ni Samuele. 25 Muze hakatuka ku nangamo, yanjila mu mbonge, Samuele yanunga ni kuhanjika ni Saulu mu chipatulo cha kwilu. 26 Muze kwachile, ayo yahinduka chimenemene, Samuele yasanyika Saulu yoze te uli mu chipatulo cha kwilu, yamba ngwenyi: “Lilulieke hanga tulishike.” Chocho Saulu yalilulieka, iye ni Samuele, yatuhuka. 27 Muze te anakatuka mu mbonge, Samuele yamba kuli Saulu ngwenyi: “Lweza chikwashi che hanga atetekele,” “alioze yena sala hanga ngukulweze yize Zambi amba.” Chocho chikwashi yatetekela.