Mukanda Utangu wa Samuele
10 Samuele yanda mulangi wa maji, yaazujila ha mutwe wa Saulu. Yamwaha mbeju, yamba kuli iye ngwenyi: “Yehova kakuwayisa hanga upwe kasongo ka chihinga chenyi. 2 Musono muze muoya kwe, mulitakana ni malunga aali hakamwihi ni Fuka lia Rakele mu njiza ya Mbenjamine ku Zeleza. Ayo mamba kuli yena ngwo: ‘Yimbulu waze unakaya ni kufupa haawana, haliapwila tatenu havulama chikuma cha yimbulu, kanalipikala ni yenu. Kanambe ngwenyi: “Kuchi mungulinga mba nguwane mwanami?”’ 3 Kukatuka haze, mununga ndo muze muheta ku mutondo unene wa Tabore. Muze muhetako muliwana ni malunga atatu anakanduka ku Mbetele hanga awayile Zambi wamwenemwene, umwe kanambata pembe atatu, mukwo kanambata mbolo jitatu, mukwo kanambata mulondo unene wa vinyu. 4 Ayo makumeneka ni kukwaha mbolo jaali, kashika utambula mbolo jize makwaha. 5 Kulutwe lia chino, muheta ku mulundu wa Zambi wamwenemwene kuze kuli maswalale ja A-Filistea. Muze muheta mu mbonge, muwana chizavu cha aprofeta kanakatuka ku nangamo ni kuprofeteza, kulutwe lio mukukapwa atu waze anembi yisaji ya kusa, tumikupiela, ndembo ni tulialia. 6 Spiritu ya Yehova muyikakwaha ndundo, ni yena mukaprofeteza hamuwika ni ayo, mukapwa mutu mweka. 7 Muze yilayi yino muyikamanunuka, linga yeswayo muhasa kulinga, mumu Zambi wamwenemwene kali hamwe ni yena. 8 Tetekela ku Ngilingali, yami mungukakuwanako hanga nguhane milambu ya kulumba ni milambu ya sambukila. Ukangushimbwile matangwa shimbiali ndo muze munguheta, mba mungukulweza yize watamba kulinga.”
9 Muze Saulu homba nyima Samuele, Zambi yaputuka kwalumuna mbunge ya Saulu. Ha tangwa liacho, yilayi yino yeswe yiyimanunuka. 10 Chocho ayo yaya ku mulundu, chizavu cha aprofeta yichiza ni kulitakana nenyi. Hazehene spiritu ya Zambi yiyimwaha ndundo, neye yaputuka kuprofeteza hakachi ko. 11 Muze atu eswe waze te amunyingika amumwene kanaprofeteza ni aprofeta, yamba kuli umwe ni mukwo ngwo: “Yika yalingiwa kuli mwana wa Kishi? Shina Saulu neye hapwa profeta?” 12 Umwe lunga wa ku chihela chacho yamba ngwenyi: “Mba aprofeta akwo ana jaya?” Kwenako kwakatukile chishima chakwamba ngwo: “Shina Saulu neye hapwa profeta?”
13 Muze iye ahwishile kuprofeteza, yakanduka ku nangamo. 14 Kulutwe, usoko wa tato ya Saulu yahula iye ni chikwashi chenyi ngwenyi: “Kulihi nwayile?” Saulu yakumbulula ngwenyi: “Twayile ni kufupa yimbulu, alioze kutwawanyine. Kashika yituya ni kuhanjika ni Samuele.” 15 Usoko wa tato ya Saulu yahula ngwenyi: “Yika Samuele anulweza? Lisesa, ngulwezenu kama.” 16 Saulu yamukumbulula ngwenyi: “Iye katulweza ngwenyi, yimbulu haawana.” Alioze kamulwezele yize Samuele ambile hakutwala ku wanangana.
17 Chocho, Samuele yakungulula atu kumeso ja Yehova ku Mizepa. 18 Yamba kuli A-Izalele ngwenyi: “Yehova Zambi ya Izalele kanambe ngwenyi: ‘Yami nachijile A-Izalele mu Engitu, ni kwapulula ku moko ja A-Engitu, ni ku moko ja mianangana eswe waze te akwamwesa lamba. 19 Alioze, musono yenu hinwalituna Zambi yenu, yoze wanupulwile mu luyinda wenu mweswe, ni ku lamba lienu lieswe. Hinwamba ngwenu: “Ka, tusakwile umwe mwanangana yoze matuyula.” Kashika, haliapwila manenu kumeso ja Yehova, kulita ni minyachi yenu, ni tununu twenu.’”
20 Chocho, Samuele yakundamisa minyachi yeswe ya Izalele, yasakula vungu lia Mbenjamine. 21 Mba yakundamisa vungu lia Mbenjamine kulutwe kulita ni majimo jo, yasakula jimo lia A-Matri. Mu jimo lia A-Matri, yasakulamo Saulu, mwana wa Kishi. Alioze, muze ayile ni kumufupa, kamuwanyine ku chihela nichimwe. 22 Kashika, yahula Yehova ngwo: “Mwe lunga wacho haheta hano?” Yehova yakumbulula ngwenyi: “Auze uli ahaze, kanaswame hakachi ka yikwata.” 23 Chocho, yazomboka, yamuchizaho. Muze amanyine hakachi ka mbunga, iye kapwile musuku chinji kuhiana atu eswe; akwo eswe kapwile ni kumusulila ha yipaya. 24 Samuele yamba kuli atu eswe ngwenyi: “Talenu yoze Yehova asakula! Kukushi niumwe walifwa nenyi hakachi ka atu.” Mba atu eswe yakololoka ngwo: “Mwanangana afumane!”*
25 Samuele yalweza atu yuma yize mapwa ni kuhana kuli mianangana, yayisoneka mu mukanda, mukanda wacho yausa kumeso ja Yehova. Mba Samuele yalweza atu hanga ahiluke ku mazuwo jo. 26 Saulu neye yaya ku zuwo lienyi, ku Ngibia, hamuwika ni maswalale waze Yehova akwachile ku mbunge. 27 Alioze, amwe atu amokomoko yamba ngwo: “Au mwene kuchi matulamwina?” Chocho ayo yamulelesa, kamuhele chawana nichimwe. Alioze, Saulu kambile nichimwe.*