Mukanda Utangu wa Mianangana
15 Ha mwaka kumi ni nake wa kuyula cha Mwanangana Jeroboame mwana wa Nebate mu Izalele, Abijame yaputuka kuyula mu Yunda. 2 Abijame yayula miaka yitatu mu Yerusaleme. Jina lia naye liapwile Maka, mujikulu wa Abishalome. 3 Abijame kalingile shili ngwe yize tato alingile, mbunge yenyi kuyakashishikile kuli Yehova Zambi yenyi ngwe chize ashishikile kalamba kenyi Ndawichi. 4 Mumu lia Ndawichi, Yehova Zambi yenyi yasakula mwanenyi amusalakane hanga mu Yerusaleme mununge ni kupwa mwanangana. 5 Mumu Ndawichi kalingile yuma yipema kumeso ja Yehova ku mwono wenyi weswe, kakapiasukile ku shimbi niyimwe yize amuhele, shina wika ha chikuma cha Uriya, Ka-Hete. 6 Kwapwile jita hakachi ka Rehoboame ni Jeroboame ha matangwa eswe a mwono wenyi.
7 Sango jikwo ja ku mwono wa Abijame ni yeswe yize alingile, yili ya kusoneka mu mukanda wa sango ja mianangana ja A-Yunda a ha matangwa jacho. Kwapwile nawa jita hakachi ka Abijame ni Jeroboame. 8 Chocho, Abijame yafwa, yamufunjila mu Mbonge ya Ndawichi, mba mwanenyi Asa yamusalakana ha wanangana.
9 Ha mwaka makumi aali a kuyula cha Jeroboame mu Izalele, Asa yaputuka kuyula mu Yunda. 10 Asa kayulile mu Yerusaleme miaka 41. Jina lia kako liapwile Maka mujikulu wa Abishalome. 11 Asa yalinga yuma yipema kumeso ja Yehova ngwe chize alingile kalamba kenyi Ndawichi. 12 Iye yahuma mu chifuchi malunga waze te akulipomba ni malunga-ni-akwo mu tembele ni kuchiza tuponya eswe auzelwokeso waze tulamba twenyi alingile. 13 Asa yatambula nawa chiteli cha umwazovu kuli kako Maka, mumu kalingile kaponya wa sonyi wa kuwayila. Asa yapuzula kaponya wacho, yamwochela mu chikulu cha Kendrone. 14 Alioze, iye kakapuzwile manangamo. Asa kashishikile kuli Yehova ku mwono wenyi weswe. 15 Iye yatwala mu zuwo lia Yehova yuma yize tato apwishile yisandu, prata, oru ni yikwachilo yikwo.
16 Matangwa eswe kwapwile jita hakachi ka Asa ni Mbasha mwanangana wa mu Izalele. 17 Mbasha Mwanangana wa mu Izalele yeza hanga ase jita ni A-Yunda. Chocho, Mbasha yaputuka kukolesa mbonge ya Rama hanga akinde atu kunjila chipwe kutuhuka mu njiza ya Asa Mwanangana wa mu Yunda. 18 Mumu lia chino, Asa yanda prata yeswe ni oru yize yasalile mu zuwo lia upite wa Yehova ni mu zuwo lia upite wa mwanangana, yayihana kuli tuvumbi twenyi. Chocho mwanangana Asa yatuma upite wacho kuli Mbene-Hadade mwana wa Tabarimone mwana wa Hezione mwanangana wa mu Seria yoze te watwama ku Ndamaseku, yamulweza ngwenyi: 19 “Kwatwama usendo hakachi ka yami ni yena, tatenu ni tata no kalingile usendo. Ngunakutumina prata ni oru ngwe chawana. Shiha usendo uli hakachi ka yena ni Mbasha Mwanangana wa mu Izalele hanga akatuke mu njiza yami.” 20 Mbene-Hadade yapanjika Mwanangana Asa, chocho yatuma tupitau a maswalale jenyi hanga aye ni kupupa mambonge ja A-Izalele. Ayo yapupa Ijone, Ndane, Abele-Mbete-Maka ni chifuchi cheswe cha Chinerote ni Napatali yeswe. 21 Muze mwanangana Mbasha achivwile, yecha kutungulula mbonge ya Rama, yatwama mu Tiriza. 22 Mwanangana Asa yasanyika A-Yunda eswe, kwasalile mutu niumwe, ayo yambata mawe ni mapaya a ku Rama waze Mbasha te anatunga no, Mwanangana Asa yakolesa no mbonge ya Ngeba mu Mbenjamine ni Mizepa.
23 Sango jikwo ja ku mwono wa Asa, yitanga yenyi ya kukomwesa, yuma yeswe yize alingile ni mambonge waze atungile, yili yakusoneka mu mukanda wa sango ja mianangana ja A-Yunda a ha matangwa jacho. Alioze, muze apwile kashinakaji yaputuka kuyiza molu. 24 Asa yafwa, yamufunda hamwe ni tulamba twenyi mu Mbonge ya Ndawichi kalamba kenyi, mba mwanenyi Yehosofate yamusalakana ha wanangana.
25 Nandambe mwana wa Jeroboame yapwa mwanangana wa mu Izalele ha mwaka wamuchiali wa kuyula cha Asa mu Yunda, iye kayulile mu Izalele ha miaka yaali. 26 Iye te kakulinga yuma yipi kumeso ja Yehova ni kwimbulula yitanga ni shili ya tato yize yavulumwishine A-Izalele. 27 Mbasha mwana wa Ahija wa ku munyachi wa Yisaka yazanga kulinga upi Nandambe. Mbasha yashihila Nandambe ku Ngibetone mbonge ya A-Filistea muze Nandambe ni A-Izalele eswe te anajingilika mbonge ya Ngibetone. 28 Mbasha kashihile Nandambe ha mwaka wamuchitatu wa kuyula cha Asa Mwanangana wa mu Yunda, mba iye yapwa mwanangana mu chihela chenyi. 29 Muze te hapwa mwanangana, yashiha atu eswe a ku zuwo lia Jeroboame, kahichikile mutu niumwe ni mwono. Yashiha eswe kulita ni yize Yehova ambile kupalikila muli kavumbi kenyi Ahija, Ka-Shilone. 30 Chino chalingiwile mumu lia shili yize Jeroboame alingile ni kuvulumwisa A-Izalele, mumu iye katukile chinji Yehova, Zambi ya Izalele. 31 Sango jikwo ja ku mwono wa Nandambe ni yuma yeswe yize alingile, yili yakusoneka mu mukanda wa sango ja mianangana a mu Izalele a ha matangwa jacho. 32 Matangwa eswe kwapwile jita hakachi ka Asa ni Mbasha Mwanangana wa mu Izalele.
33 Ha mwaka wamuchitatu wa kuyula cha Asa Mwanangana wa mu Izalele, Mbasha mwana wa Ahija yaputuka kuyula A-Izalele eswe apwile mu Tiriza, iye kayulile miaka 24. 34 Alioze iye te kakulinga yuma yipi kumeso ja Yehova ni kwimbulula yitanga yipi ni shili ya Jeroboame yize yavulumwishine A-Izalele.