Usolwelo wa Yesu Kristu Alwezele Kuli Yoano

12 Chilayi chinene chasolokele mwilu: Pwo kanazala tangwa, kushi lia yiliato yenyi kwapwile kakweji ni chipangula cha tutongonoshi 12 ha mutwe wenyi, 2 iye wapwile kafumba. Watetele ni misongo, ni kupinda hanga aseme.

3 Chilayi chikwo chamonekene mwilu. Umwe ndragau muchila munene, kali ni mitwe shimbiali ni kumi lia mbinga, ha mitwe yenyi hapwile yipangula shimbiali; 4 muchila wenyi wakokele chihanda chimuwika cha ku yihanda yitatu ya tutongonoshi a mwilu ni kwanyasa hashi. Ndragau yamana kumeso ja pwo yoze te kwasala hakehe aseme, hanga muze te masema awumbule mwanenyi.

5 Iye wasemene mwana wa lunga, yoze makayula mavungu eswe ni lukanda wa utale. Hazehene mwe mwana yamupindumuna ni kumutwala kuli Zambi ni ku ngunja yenyi. 6 Mba pwo wachinyinyine mu puya, ku chihela kuze amululiekelele kuli Zambi, kuze te mamulisa ha matangwa 1,260.

7 Mba mwapwile jita mwilu: Mikele* ni angelo jenyi ashile jita ni ndragau, ni ndragau ni angelo jenyi ashile jita 8 alioze kakakumbile,* chipwe kupwa ni chihela mwilu. 9 Chocho ndragau munene amunyashine hashi, kapela wa shakulu avuluka ngwo, Ndiapu kanda Satana, yoze unapiangula akwa-hashi heswe; amunyashine ndo hashi ni angelo jenyi hamwe nenyi. 10 Mba nevwile liji linene mwilu ngwo:

“Haliapwila ulamwino, ni ndundo ni Wanangana wa Zambi hiuneza, ni chiyulo cha Kristu wenyi, mumu hananyase hashi mukwa-kusuma mandumbu jetu yoze wakwasuma mulonga kumeso ja Zambi yetu mwalwa ni ufuku! 11 O amukumbile mumu lia manyinga ja Mwana-panga ni mumu lia liji lia uchela wo, kalemesene mwono* wo chipwe ku kufwa. 12 Kashika, wahililenu yenu malilu ni yenu nwatwamamo! Alioze lamba kuli akwa-hashi ni kalunga-lwiji, mumu Ndiapu hanahulumuka kuli yenu, kali ni ufwatulo unji mumu kananyingika ngwenyi, mashimbu akehe asala no.”

13 Muze ndragau amwene ngwenyi hamunyasa hashi, yaputuka kuhungumiona pwo yoze wasemene mwana wa lunga. 14 Alioze, pwo amuhele mapulwa aali a pupa munene hanga te ahase kuhumuka ndo ku puya ku chihela chenyi, kuze te mamulisa ha shimbu limuwika, ha mashimbu aali ni ha chipinji cha shimbu* kusuku ni kapela.

15 Mba kapela yatuhwisa meya mu kanwa lienyi kunyima lia pwo ngwe lwiji, hanga pwo atoke mu lwiji. 16 Alioze hashi hakwashile pwo, hashi hapakwile kanwa liaho ni kumina lwiji yoze ndragau atuhwishile mu kanwa lienyi. 17 Kashika ndragau watenukine ni pwo, chocho wayile ni kwasa jita ni masalila a munyachi* wenyi waze akwononokena shimbi ja Zambi. Waze ali nawa ni mulimo wa kuhana uchela hakutwala kuli Yesu.