Usolwelo wa Yesu Kristu Alwezele Kuli Yoano

17 Umwe wa kuli angelo shimbiali, waze te anakwata malonga shimbiali, yeza yangwamba ngwenyi: “Tweya, mungukusolwela upatwilo wa chikoi munene yoze unatwama helu lia meya anji. 2 Mianangana a hano hashi, alingile nenyi utanji,* ni akwa-hashi azengewele ni vinyu ya utanji* wenyi.”

3 Iye wangutwalile mu puya mu ndundo ja spiritu. Mba namwene umwe pwo kanatwama helu lia ngongo muchila yoze wazalile too ni majina a kushililika, wapwile ni mitwe shimbiali ni kumi lia mbinga. 4 Mwe pwo wazalile mahina a ufungo ni achila, walejimine ni oru, ni mawe alemu ni tukanga, wapwile ni musenge wa oru mu kwoko lienyi unazala ni yuma ya uzelwokeso ni yuma ya luchisa ya utanji* wenyi. 5 Ha huma lienyi hasonewene limwe jina lia chijimbikilo: “Babilonia Yinene, naye ya yikoi ni ya yuma ya uzelwokeso ya hashi.” 6 Namwene pwo kanazengewa ni manyinga ja asandu ni manyinga a yela ja Yesu.

Muze namumwene, nakomokene chinji. 7 Chocho, mungelo yamba kuli yami ngwenyi: “Mumu liaka unakomoka? Mungukulweza chijimbikilo cha pwo ni cha ngongo wa mitwe shimbiali ni kumi lia mbinga, yoze unamumbata: 8 Ngongo yoze hiwamona, chitangu kapwile ko, alioze haliapwila keshiko nawa. Kwasala hakehe matuhuka mu jondo hanga amwonwone. Akwa-hashi—waze chize ku fundamentu ya hashi kakapwile ni majina jo a kusoneka mu chivungo cha mwono—kumakakomoka muze makamona ngongo yoze chitangu wapwileko, alioze keshiko nawa, mba masoloka.

9 “Ha chikuma chino he hakufupiwa kupwa ni mana: Mitwe shimbiali yinalumbunuka milundu shimbiali, haze pwo anatwama. 10 Kuli mianangana shimbiali: Atano halimbuka, umuwika kwali, mukwo kanda achiheta; alioze muze yono maheta, kumakatwama ha shimbu likehe. 11 Ngongo yoze wapwileko, alioze haliapwila keshiko nawa, neye kali mwanangana wamuchinake, alioze kanakatuka kuli mianangana shimbiali. Kashika, kumakamwonwona.

12 “Kumi lia mbinga jize wamwene jinalumbunuka mianangana kumi, waze kanda achitambula wanangana, alioze hatambula chiyulo ngwe mianangana ha ola yimuwika hamwe ni ngongo. 13 Ayo kali ni nyonga limuwika, kashika anahana ndundo jo ni chiyulo cho kuli ngongo. 14 Ayo makasa jita ni Mwana-panga, alioze, amu iye ali Mwene wa ene ni Mwanangana wa mianangana, Mwana-panga kumakaakumba. Waze ali hamwe nenyi, waze hanaatambika, hanaasakula, ashishika, no kumakakumba.”

15 Iye yamba kuli yami ngwenyi: “Meya waze wamwene, haze anatwama chikoi, kanalumbunuka yifuchi, mbunga, mavungu ni malimi. 16 Kumi lia mbinga jize wamwene ni ngongo kumakavwila kole chikoi. Ayo kumakamupwisa wa hululu ni kumuhichika uselesele, kumaakalia musunya wenyi ni kumwocha ha kahia. 17 Mumu Zambi hanase mu mambunge jo nyonga lia kulinga upale wenyi. O eswe kali ni nyonga limuwika, hanji ngwetu, kuhana wanangana wo kuli ngongo ndo muze maliji a Zambi mamanunuka. 18 Pwo yoze wamwene kanalumbunuka mbonge yinene yize yakuyula ngwe mwanangana helu lia mianangana eswe a hashi.”