Mukanda Wamuchiali wa Samuele
12 Yehova yatuma Natane kuli Ndawichi. Natane yaya, yamba kuli iye ngwenyi: “Kwapwile malunga aali waze te atwama mu mbonge yimuwika. Umwe kapwile pichi, mukwo chiswale. 2 Pichi kapwile ni mapanga anji ni ngombe. 3 Alioze, chiswale kapwile wika ni mwana-panga wa chihwo yoze alanjile. Iye te kakumulela kanawa, kashika yakolela ku zuwo lienyi hamwe ni ana jenyi. Kapwile ni kulia ndambu ya kulia yize kako apwile nayo, ni kunwa mu musenge wa kako ni kupomba mu kondo lienyi. Yapwa kuli iye ngwe mwanenyi wa pwo. 4 Tangwa limwe, pichi yatambula ngeji, alioze katayijile kukwata panga hanji ngombe wenyi hanga atelekele ngeji yoze atambwile. Alioze, yakwata mwana-panga wa yoze chiswale yatelekela ngeji.”
5 Chocho, Ndawichi yevwila pichi uli unji, yamba kuli Natane ngwenyi: “Ni mwono wa Yehova, mutu walinga chuma cha mutapu au katamba kufwa! 6 Iye katamba kufweta ndando ya mwana-panga yisuho yiwana mumu kevwile keke ha kulinga chuma chino.”
7 Chocho Natane yamba kuli Ndawichi ngwenyi: “Mutu wacho yenu mwene wami! Yehova, Zambi wa A-Izalele kanambe ngwenyi: ‘Yami mwene nakuwayishile upwe mwanangana wa Izalele ni kukutusula ku moko ja Saulu. 8 Yami te ngunazange kukwaha zuwo lia mwene we ni mapwo ja mwene we. Nakuhele zuwo lia Izalele ni lia Yunda. Chikwo nawa, te ngunazange kukulingila nawa yuma yinji. 9 Mumu liaka walelesa liji lia Yehova ha kulinga yuma yipi kumeso jenyi? Yena washiha Uriya, Ka-Hete ni katana. Muze hiwamushiha ni katana ka A-Amone, yiumbata pwo lienyi. 10 Kashika akwa-zuwo lie anji makafwa ku katana, mumu wangulelesa ha kumbata pwo lia Uriya, Ka-Hete.’ 11 Yehova kanambe ngwenyi: ‘Mungukakunehena lamba lize mulikatuka ku zuwo lie. Mungukatambula mapwo je kumeso je ni kwahana kuli lunga mweka. Iye makalisumbakenya no mwalwa-kachi. 12 Yena wachilinga mu usweke, alioze yami mungukachilinga mwalwa-kachi kumeso ja A-Izalele eswe.’”
13 Ndawichi yamba kuli Natane ngwenyi: “Navulumuna kuli Yehova.” Natane yakumbulula Ndawichi ngwenyi: “Yehova kakonekena shili ye. Yena kuchi kufwa. 14 Alioze, amu wahona vumbi Yehova ha chikuma chino, mwane yoze wasemuka ha shimbu lino kumafwa.”
15 Mba Natane yaya ku zuwo lienyi.
Mwana yoze pwo lia Uriya asemenene Ndawichi, Yehova yamwasa yikola, chocho mwana yayiza. 16 Ndawichi yaliumba kuli Zambi mumu lia mwana wacho, yalitwamina kulia. Ndawichi te kakunjila mu chipatulo chenyi cha kupomba, mapomba hashi ufuku weswe. 17 Makulwana a ku zuwo lienyi te kakukundama kuli iye hanga amukatwise, alioze iye te keshi kutayiza kukatuka hashi chipwe kulia hamwe no. 18 Ha tangwa liamuchishimbiali, mwana yafwa. Alioze, tuvumbi twa Ndawichi yevwa woma wa kumulweza ngwo mwana hafwa. Yamba ngwo: “Muze mwana te machiyiza, te twakuhanjika ni mwanangana alioze keshi kutupanjika, mba kuchi mutumulweza ngwetu mwana hafwa? Mahasa kulinga chimwe chuma chipi chinji.”
19 Muze Ndawichi amwene tuvumbi twenyi kanalinyenyeta, yanyingika ngwenyi, mwanenyi hafwa. Kashika, Ndawichi yahula tuvumbi twenyi ngwenyi: “Mwanami kafwa nyi?” Ayo yamukumbulula ngwo: “Ewa, kafwa.” 20 Chocho Ndawichi yakatuka hashi, yasana, yalikwita maji, yazala mazalo eka. Yaya ku zuwo lia Yehova, yawayila. Mba yahiluka ku zuwo lienyi, yeta hanga amunehene kulia, yalia. 21 Tuvumbi twenyi yamuhula ngwo: “Yika chino chinalumbunuka? Muze mwana te ali ni mwono, nwalilile ni kulitwamina kulia. Alioze, muze mwana hafwa, hinwakatuka, hinwalia.” 22 Iye yakumbulula ngwenyi: “Muze mwanami te uchili ni mwono, nalilile ni kulitwamina kulia mumu nanyongene ngwami: ‘Hanji Yehova manguvwila keke ni kwecha mwanami hanga anunge ni mwono.’ 23 Alioze haliapwila hafwa kulu, mumu liaka mungulitwamina kulia? Shina mungumufunyisa? Yami mungukaya kuze iye ali, alioze iye kechi kuhasa kufuna kuli yami.”
24 Chocho, Ndawichi yalembejeka pwo lienyi Mbate-Shipa. Mwapwa muze yalimona nenyi. Hakupalika cha mashimbu, pwo lienyi yasema mwana wa lunga, yamuluka jina ngwenyi, Solomone. Yehova te kakumuzanga chinji. 25 Iye yatuma profeta Natane hanga aalweze aluke mwe mwana jina ngwo, Jededia,* mumu Yehova te kakumuzanga.*
26 Joabe yanunga ni kwasa jita ni Raba ya A-Amone, yatambula mbonge ya wanangana. 27 Kashika, Joabe yatuma mikeji kuli Ndawichi ngwenyi: “Nasa jita ni Raba, natambula mbonge yo ya meya. 28 Haliapwila, kungulula maswalale nuseleke mbonge nuyitambule, kuchina yami munguyitambula atu manguchichimieka.”*
29 Kashika, Ndawichi yakungulula maswalale eswe, yaya ku mbonge ya Raba yasa no jita, yayitambula. 30 Chocho, iye yachiza chipangula ku mutwe wa Malakame. Chipangula chacho chapwile ni kulema talentu yimuwika ya oru, hamuwika ni mawe a ndando waze apwileko. Yachijika ku mutwe wa Ndawichi. Iye yatambula nawa upite unji mu mbonge yacho. 31 Yakwata atu waze apwilemo, yaasa hanga apwe ni kuteta mawe ni kukalakala ni yikwata ya utale yambuka, ni njimbu ni kulinga tijolu. Iye yalinga chino mu mambonge eswe ja A-Amone. Mwapwa muze, Ndawichi ni maswalale eswe yahiluka ku Yerusaleme.