Mukanda Utangu Kuli A-Tesalonika

1 Yami Paulu hamwe ni Silivanu,* ni Timoteu ku chikungulwila cha A-Tesalonika chize chinalinungu ni Zambi mwe Tata, ni Mwene Yesu Kristu:

Chawana cha keke ni sambukila yikapwe hamwe ni yenu.

2 Twakusakwilila matangwa eswe kuli Zambi mumu hali yenu eswe ha kunutongola mu yilemba yetu, 3 mumu kumeso ja Zambi yetu, kanda Tata, twakwiwuluka mashimbu eswe milimo yenu ya ufulielo, ni kukilikita chenu cha zango ni kunyongonona mumu lia kutalatala chenu muli Mwene wetu Yesu Kristu. 4 Se tunanyingika ngwetu, yenu mandumbu jetu waze Zambi azanga, iye hananutongola, 5 mumu sango jipema jize twakwambujola jahetele kuli yenu, hi ni maliji wika ko, alioze nawa ni ndundo, ni spiritu yisandu, ni shindakenyo yinene. Yenu nunanyingika mutapu wa atu waze twapwile mukachi kenu ha kunuyukisa. 6 Yenu hinunembulula chilweza chetu ni cha Mwene, mumu nwatayijile liji ni lamba linji hamwe ni uwahililo uze wakukatuka ku spiritu yisandu. 7 Chocho nwapwile chilweza chipema kuli akwa-kufuliela eswe mu Masendoniya ni mu Akeya.

8 Mumu lia kwambujola chenu, liji lia Yehova* hilinalimwange ku yihela yeswe hi wika ko mu Masendoniya ni mu Akeya. Ni ufulielo wenu kuli Zambi kanawivwu ku yihela yeswe, kashika kutushi nawa ni yize mutwamba. 9 Mumu o kananungu ni kuhanjika hakutwala ku chize twahanjikile ni yenu ha chisuho chitangu ni chize yenu nwatewulukile kuli Zambi, ha kumbila mahamba jenu hanga nukapwe ndungo ja Zambi ya mwono, kanda wamwenemwene, 10 ni kutwaminyina Mwanenyi ku malilu yoze ahindwishile hakachi ka afu, iye Yesu, yoze wakutupulula ku utenu uze muukeza.