Mukanda Utangu wa Samuele
17 A-Filistea yakungulula maswalale jo hanga aye ku jita. Yalikungulwila ku Soko ya ku Yunda, yasa chilombo hakachi ka Soko ni Azeka mu Efesendami. 2 Saulu ni malunga ja A-Izalele yalikungulula, yasa chilombo mu mungulunga wa Ela, yalilulieka hanga ase jita ni A-Filistea. 3 A-Filistea kapwile sali limwe lia mulundu, A-Izalele yapwa sali likwo lia mulundu, mungulunga yiupwa hakachi ko.
4 Chocho mu chilombo cha A-Filistea mwakatukile umwe kajita chitakame, jina lienyi te Ngoliate, wa ku Ngata, iye kapwile ni usuhwe wa metru jitatu.* 5 Kapwile ni kuzala tepa lia unengu ni chikuto cha utale chikwete mahalo a unengu. Chikuto cha unengu chapwile ni kulema shekele* 5,000. 6 Iye te kakuzala yuma ya unengu ha mikono ni kulizezeleka kunga lia unengu ha nyima. 7 Chikundo cha kunga lienyi chapwile ngwe mutondo uze akwa-kutonga akuvunga wanda, kunga liene lia utale liapwile ni kulema shekele 600. Mukwa-kumumbachila lukepwe kapwile ni kumutetekela. 8 Ngoliate yamana, yaputuka kukololoka kuli maswalale ja A-Izalele ngwenyi: “Mumu liaka nunazange kwasa jita ni yetu? Yami ngwami nguli Ka-Filistea, yenu nuli tuvumbi twa Saulu. Sakulenu umwe lunga hanga ase jita ni yami. 9 Nyi iye mahasa kwasa jita ni yami ni kungushiha, yetu mutupwa ndungo jenu. Alioze nyi yami namukumba ni kumushiha, yenu munupwa ndungo jetu ni kutulingila.” 10 Ka-Filistea yamba nawa ngwenyi: “Musono ngunahamwisa tujita twa A-Izalele. Tumenu umwe lunga ase jita ni yami!”
11 Muze Saulu ni maswalale eswe ja A-Izalele evwile maliji wano ja Ka-Filistea, yevwa woma unji, yachikima.
12 Ndawichi kapwile mwana wa Ka-Efrata, wa ku Mbeteleme-Yunda, jina lienyi te Yese, iye kapwile ni ana nake. Ha mashimbu ja Saulu, Yese te hapwa kulu kashinakaji. 13 Ana ja Yese atatu a makulwana kayile ku jita hamuwika ni Saulu. Majina ja ana atatu waze ayile mu jita kali wano: Kapula-jimo Eliape, wamuchiali Abinadambe, wamuchitatu Shama. 14 Ndawichi kapwile kasula-songo, ayayo atatu kayile hamuwika ni Saulu.
15 Ha mashimbu jacho, Ndawichi kapwile ni kukalakalila Saulu, alioze te kakuhiluka hanga afunge mapanga ja tato ku Mbeteleme. 16 Ha matangwa 40, Ka-Filistea kapwile ni kukundama chimene ni chingoloshi hanga asosombe A-Izalele.
17 Tangwa limwe, Yese yamba kuli mwanenyi Ndawichi ngwenyi: “Lisesa, anda efa* ya mbuto ja kukanga ni kumi lia mbolo uyitwale fuji ni matambu kuli ayayenu mu chilombo. 18 Twala nawa kumi lia keju kuli mwata wa kanunu. Chikwo nawa, utala chize ayayenu ali hanga wize ungulweze nyi kali kanawa.” 19 Ayo te kali hamuwika ni Saulu ni malunga akwo ja A-Izalele mu mungulunga wa Ela muze te anase jita ni A-Filistea.
20 Ndawichi yakatuka chimenemene, yahichika mapanga kuli umwe mutu hanga aafunge. Yalulieka kulia, yaya ngwe chize Yese amutumine. Muze ahetele mu chilombo, maswalale te kanakatuka ku jita ni kukololoka. 21 A-Izalele ni A-Filistea yalilulieka hanga ase jita, amwe sali limwe, akwo sali likwo. 22 Hazehene Ndawichi yahichika yikwata kuli mukwa-kufunga yikwata, yazomboka, yaya ndo kuze te anashila jita. Muze aheteleko, yahula ayayo nyi kali kanawa.
23 Muze Ndawichi te machihanjika ni ayayo, Ngoliate, chitakame, Ka-Filistea wa ku Ngata, yakatuka kuze te A-Filistea anashila jita, yamba maliji waze ene te akuhanjika, chocho Ndawichi yamwivwa. 24 Muze A-Izalele amwene lunga wacho, eswe yevwa woma, yachina. 25 A-Izalele yamba ngwo: “Nunamono lunga auze, uneza amuze? Iye kaneza hanga ahamwise A-Izalele. Mutu yoze mamushiha, mwanangana mamwaha upite unji, mamwaha nawa mwanenyi hanga apwe pwo lienyi, matusula akwa-zuwo lia tato, kechi kupwa ni kuhana nichimwe cha ku yuma yize A-Izalele atamba kuhana kuli mwanangana.”
26 Ndawichi yahula maswalale waze apwile hakamwihi nenyi ngwenyi: “Yika mahana kuli mutu yoze mashiha Ka-Filistea yono ni kuhwisa sau mu Izalele? Mumu Ka-Filistea yono chilima, iye iya mba ahamwise* maswalale ja Zambi ya mwono?” 27 Chocho yamulweza maliji waze ene: “Makahana chinganji kuli mutu yoze mamushiha.” 28 Muze yayo Eliape evwile Ndawichi kanahanjika ni maswalale, yatenukina Ndawichi, yamuhula ngwenyi: “Yika wakaula kuno? Neya wahichika ndambu ya mapanga aze mu puya? Ngunanyingika kanawa ngwami wakulizata, chikwo nawa ukwete manyonga api. Weza wika hanga utale jita.” 29 Ndawichi yakumbulula ngwenyi: “Yika nalinga nawa? Nahula wika!” 30 Chocho yaya kuli maswalale akwo, yahula chihula chizechene, no yamwaha kumbululo lizeliene.
31 Atu amwe yevwa maliji a Ndawichi, yaalweza Saulu. Kashika Saulu yamusanyika. 32 Ndawichi yalweza Saulu ngwenyi: “Niumwe kanda ahonga* mumu lia Ka-Filistea yono. Yami kavumbi ke munguya ni kulimika nenyi.” 33 Alioze Saulu yamba kuli Ndawichi ngwenyi: “Yena kuwatambile kwasa jita ni Ka-Filistea yono, mumu uchili kanuke, alioze iye kali swalale* chize ku ukweze wenyi.” 34 Ndawichi yamba kuli Saulu ngwenyi: “Mwene wami, nguli kafunga ka mapanga a tata. Muze kwejile ndumba ni ursu, yakwata panga hakachi ka chendo, 35 yingumukaula, yingumulamba ni kutambula panga ku kanwa lienyi. Muze angukatukilile, yingumukwata ku wevu, yingumulamba ni kumushiha. 36 Yami kavumbi kenu hingunashihi ndumba ni ursu, che mungulinga nawa ni chilima yono Ka-Filistea, mumu hahamwisa atu ja Zambi ya mwono.” 37 Ndawichi yamba nawa ngwenyi: “Yehova yoze unakangupulwila ku yala ya ndumba ni ursu, mangupulwila nawa ku moko ja Ka-Filistea yono.” Chocho Saulu yalweza Ndawichi ngwenyi: “Yako, Yehova apwe hamwe ni yena.”
38 Chocho, Saulu yajika mazalo jenyi a jita kuli Ndawichi. Yamujika tepa lia unengu, ni chikuto cha utale. 39 Ndawichi yapachika katana mu zalilo, yeseka kwenda, alioze kahashile, mumu te kanda achijilila ni yuma yacho. Ndawichi yamba kuli Saulu ngwenyi: “Chiso kuhasa kwenda ni yuma yino, mumu kanda nguchijilila nayo.” Chocho Ndawichi yayizula. 40 Iye yanda mulumbu wenyi, yatongona mawe atano ku lwiji* yaasa mu katuku* kenyi ka kafunga. Chocho, ni chikapa* chenyi ku kwoko cha kukonga nacho liwe, yaputuka kukundama kuli Ka-Filistea.
41 Ka-Filistea yanunga ni kukundama chinji kuli Ndawichi, mukwa-kumumbachila lukepwe te kali kulutwe lienyi. 42 Muze Ka-Filistea atalile ni kumona ngwenyi Ndawichi kali wika kamukweze, kachila, kapema ku meso, yaputuka kumuseha ni kumulelesa. 43 Ka-Filistea yamba kuli Ndawichi ngwenyi: “Te nguli kawa mba wize kuli yami ni kachipinji ka mutondo?” Chocho Ka-Filistea yashinga Ndawichi mu majina ja tuzambi twenyi. 44 Yamba kuli Ndawichi ngwenyi: “Tweya kuli yami, munguhana musunya we kuli tujila a mwilu ni kuli tushitu a mu yambu.”
45 Ndawichi yakumbulula Ka-Filistea ngwenyi: “Yena uneza kuli yami ni katana ni kunga likehe ni kunga linene, alioze yami nguneza kuli yena mu jina lia Yehova wa tujita, Zambi ya maswalale ja A-Izalele waze yena wahamwisa. 46 Musono lume Yehova makukunjika mu moko jami, mungukushiha ni kukupatula mutwe. Musono munguhana mijimba ya tujita ja A-Filistea kuli tujila a mwilu ni kuli tushitu a mu yambu. Atu eswe a hashi makanyingika ngwo, kwatwama umwe Zambi mu Izalele. 47 Eswe waze analikungulula hano manyingika ngwo, Yehova keshi kulamwina ni katana chipwe ni kunga, mumu jita yili ya Yehova, iye makunjika yenu eswe mu moko jetu.”
48 Chocho, Ka-Filistea yanunga lume ni kukundama hanga alimike ni Ndawichi, alioze Ndawichi yazomboka kulutwe lia maswalale hanga alimike ni Ka-Filistea. 49 Ndawichi yanjisa kwoko mu tuku, yandamo liwe limuwika, yalikonga ni chikapa. Liwe yilikwata kuli Ka-Filistea, yilimunjila ha huma, mba iye yalimbuka ni huma hashi. 50 Chocho Ndawichi yakumba Ka-Filistea ni chikapa ni liwe limuwika. Ndawichi yashiha Ka-Filistea chipwe ngwe te keshi ni katana ku kwoko. 51 Ndawichi yazomboka, yamana haze Ka-Filistea te anapombo. Yatomona katana mu chindalo cha Ka-Filistea, yamumanununa ha kumupatula mutwe. Muze A-Filistea amwene ngwo kajita ko chitakame hafwa, eswe yachina.
52 Chocho maswalale ja A-Izalele ni a mu Yunda, yaputuka kukololoka ni kuhanga A-Filistea chize mu mungulunga ndo ku yikolo ya Ekrone. A-Filistea waze afwile yasala mu tapalo lia Sharaime ndo ku Ngata ni Ekrone. 53 Muze A-Izalele ahilukile kuze ayile ni kuhanga A-Filistea, A-Izalele yambata yuma yeswe mu yilombo ya A-Filistea.
54 Ndawichi yanda mutwe wa Ka-Filistea, yaya nawo ku Yerusaleme, alioze yitwa ya jita ya Ka-Filistea yayisa mu mbalaka yenyi.
55 Muze Saulu amwene Ndawichi kanayi ni kulitakana ni Ka-Filistea, yahula Abenere mwata wa tujita ngwenyi: “Abenere, mukweze au tato iya?” Abenere yakumbulula ngwenyi: “Ni mwono wenu mwanangana, chanyingikine!” 56 Mwanangana yamba ngwenyi: “Hula unyingike tato ya mukweze yono.” 57 Muze Ndawichi te hashiha Ka-Filistea, ha kuhiluka, Abenere yamutwala kuli Saulu, Ndawichi te kali ni mutwe wa Ka-Filistea mu moko. 58 Chocho Saulu yamuhula ngwenyi: “Mwanami, tatenu iya?” Ndawichi yakumbulula ngwenyi: “Nguli mwana wa kavumbi ke Yese, wa ku Mbeteleme.”