Mukanda Utangu wa Samuele
30 Muze Ndawichi ni atu jenyi ahetele ku Zikalage ha tangwa liamuchitatu, A-Amaleke te hapupa ku uto* ni Zikalage. Kalukukilile Zikalage ni kuyocha. 2 Ayo kambachile mapwo ni atu eswe waze apwile mu mbonge, chize kuli twanuke ndo kuli makulwana. Yaya no, alioze kashihile niumwe. 3 Muze Ndawichi ni atu jenyi ahetele mu mbonge, yawana hayocha. Mapwo jo, ana jo a malunga ni a mapwo, te haambata ngwe funge. 4 Chocho Ndawichi ni atu jenyi yalila chikolo, ndo muze ahongele ni kulila. 5 Kambachile nawa mapwo aali a Ndawichi: Ahinoame Ka-Yezerele, ni Abigale yoze wapwile pwo lia Nabale Ka-Karmela. 6 Ndawichi te kananenganyana chinji, mumu atu eswe te kanevu uli unji ha kutokesa ana jo a malunga ni a mapwo, chikwo nawa te kanazange kumwasa mawe. Alioze Ndawichi yatakama mumu te kakujikijila muli Yehova, Zambi yenyi.
7 Chocho, Ndawichi yamba kuli sasendote Abiatare mwana wa Ahimeleke ngwenyi: “Lisesa, ngunehene kama efode.” Abiatare yatwala efode kuli Ndawichi. 8 Ndawichi yahula Yehova ngwenyi: “Shina natamba kukaula chizavu chino cha eji? Shina mungwawana lume?” Iye yamukumbulula ngwenyi: “Akaule, pundu lume mwawana ni kwatambula yuma yeswe yize ambata.”
9 Hazehene, Ndawichi ni atu jenyi 600 waze te ali nenyi, yaya. Muze ahetele mu mungulunga wa Bezore, amwe a kuli ayo yasalamo. 10 Ndawichi ni malunga 400 yanunga, alioze malunga 200 yasala kunyima, mumu te kanahongo chinji, te kechi kuhasa kuzauka mungulunga wa Bezore.
11 Atu ja Ndawichi yawana umwe Ka-Engitu mu yambu, yamutwala kuli Ndawichi. Yamwaha kulia ni meya, 12 yamwaha nawa kachipinji ka yandanda ya makuyu ni yandanda yiali ya uva yumu. Mba yalia, yapwa nawa ni tachi, mumu te hikwapalika matangwa atatu ni ufuku utatu chakuhona kulia chipwe kunwa. 13 Ndawichi yamuhula ngwenyi: “Uli ndungo waya? Kulihi unakatuka?” Iye yamukumbulula ngwenyi: “Yami nguli Ka-Engitu, ndungo ya umwe Ka-Amaleke, alioze mwene wami kanguhichikanga mumu ngunayiji hikwapalika matangwa atatu. 14 Twalukukilile ku uto* ya chifuchi cha A-Kerete, chifuchi cha A-Yunda, ni ku uto ya chifuchi cha Kalemba, yitwocha Zikalage.” 15 Chocho Ndawichi yamuhula ngwenyi: “Shina muhasa kungutwala ku chizavu cha eji jacho?” Iye yakumbulula ngwenyi: “Nyi munulishinga mu jina lia Zambi ngwenu kunuchi kungushiha chipwe kunguhana kuli mwene wami, yami mungunutwala kuli ayo.”
16 Chocho, iye yatwala Ndawichi ndo kuli ayo. A-Amaleke te halimwanga mu chifuchi cheswe ni kulia ni kunwa ni kuwahilila, mumu lia yuma yinji yize eyile mu chifuchi cha A-Filistea ni mu chifuchi cha Yunda. 17 Chocho Ndawichi yaputuka kwashiha chize ha mandemba ndo chingoloshi. Niumwe wa kuli ayo kachinyine, shina wika malunga 400 waze achinyine ha tumelu. 18 Ndawichi yatambula yuma yeswe yize A-Amaleke eyile, yatambula nawa mapwo jenyi eswe aali. 19 Katokesele chuma nichimwe, chipwe mutu niumwe, chize kuli twanuke ndo kuli makulwana. Yatambula ana jo a malunga ni a mapwo ni upite wo. Ndawichi yatambula yuma yeswe yize A-Amaleke eyile. 20 Ndawichi yanda mapanga eswe ni ngombe, yaahana kuli atu jenyi yaya no kulutwe lia yimuna jo, yamba ngwo: “Au upite wa Ndawichi.”
21 Ndawichi yahiluka ku mungulunga wa Bezore kuze kwasalile malunga 200 waze kakahashile kumukaula mumu lia kuhonga. Ayo yaya hanga alitakane ni Ndawichi ni atu waze te ali nenyi. Muze te anakundama kuli ayo, Ndawichi yaahula hanga anyingike chize te ali. 22 Malunga amwe akwa-mbunge yipi waze ayile ni Ndawichi yamba ngwo: “Amu ayo kayile ni yetu, kutuchi kwaha chuma nichimwe cha ku upite uze twatambula cheka. Mutu ni mutu ande wika pwo lienyi ni ana jenyi aye kwenyi.” 23 Alioze, Ndawichi yamba ngwenyi: “Mandumbu jami, kanda nulinga chuma cha mutapu au ni yuma yize Yehova atwaha. Iye katufunga, katukunjikile mu moko ja eji waze ezanga ni kutulukukila. 24 Iya matayiza yize nunambe? Yetu waze twayanga mu jita, mututeta hakachi-ni-hakachi ni waze asalanga ni kufunga yikwata. Yetu eswe mutulianyina upite hakachi-ni-hakachi.” 25 Chize ha tangwa lize, Ndawichi yachisa ngwe shimbi mu Izalele ndo musono.
26 Muze Ndawichi ahilukile ku Zikalage, yatuma chihanda cha upite kuli makulwana a mu Yunda waze apwile masepa jenyi, ni kwamba ngwenyi: “Chino chili chawana chenu cha upite wa akwa-kole ja Yehova.” 27 Ndawichi yatuma nawa chawana kuli Akwa-Mbetele, ni Akwa-Ramote ya Nengeve ni Akwa-Yatiri, 28 ni Akwa-Aroere, ni Akwa-Sefemote, ni Akwa-Eshetemo, 29 ni Akwa-Rakale, mu yihunda ya A-Jeramila, ni yihunda ya A-Kene, 30 ni Akwa-Horoma, ni Akwa-Korashane, ni Akwa-Atashe, 31 ni Akwa-Heprone, ni ku yihela yeswe kuze Ndawichi ni atu jenyi apalikile.