Shimbi Yamuchiali
21 “Nyi munuwana mufu mu chifuchi chize Yehova Zambi yenu anwaha ngwe chihinga, alioze kunwanyingikine yoze wamushiha, 2 makulwana jenu ni ngaji katamba kuya hanga eseke tando yili hakachi ka mufu ni mambonge waze ali hakamwihi. 3 Kashika, makulwana a mu mbonge yize yili hakamwihi ni mufu, katamba kwanda chimbembe wa chihwo yoze kanda achikalakala nenyi chipwe kumusa kanga, 4 makulwana a mu mbonge yacho katamba kutwala chimbembe mu chikulo muze munapukumuka meya, muze kanda achilimamo chipwe kutumbamo mbuto. Mwenamo atamba kumakwina kota ya chimbembe wacho.
5 “Mba asasendote A-Levi mayako, mumu Yehova Zambi yenu hanaasakula hanga amulingile ni kuwahisa mu jina lia Yehova. Ayo makanulweza chize nwatamba kusopa milonga yeswe yinatale ha ungalwe. 6 Kashika, makulwana eswe a mu mbonge yize yili hakamwihi ni mufu, katamba kusana ku moko helu lia chimbembe yoze amakuna kota mu chikulo. 7 Katamba kwamba ngwo: ‘Moko jetu kamwangine manyinga wano, chipwe meso jetu kamwene chize aamwanganga. 8 Yehova kanda uhisa atu je, A-Izalele, waze walamwinyine, kanda wecha mulonga wa manyinga hanga upwe hali atu je A-Izalele.’ Chocho, ayo kechi kapwa ni mulonga wa manyinga. 9 Nyi nwalinga chino, munuchiza mulonga wa manyinga mukachi kenu ni kulinga yuma yalita kumeso ja Yehova.
10 “Nyi nwaya ni kwasa jita ni akwa-kole jenu, mba Yehova Zambi yenu manukwasa kwakumba ni kumbata amwe ngwe funge, 11 mba umwe wa kuli yenu mamona hakachi ka funge jacho umwe pwo chileza, mamuzanga hanga apwe pwo lienyi, 12 iye mahasa kumutwala ku zuwo lienyi. Pwo wacho katamba kutewula kambu jenyi, kuteta yala, 13 kuzula mazalo waze ezanga no mu ufunge ni kutwama ku zuwo lienyi. Pwo wacho malila tato ni naye ha kakweji wamuundu, mba yena mupomba nenyi. Muupwa lunga lienyi, iye mapwa mukwenu-pwo. 14 Alioze, nyi kuwamuzangile, mweche hanga aye kweswako mazanga. Kuwatambile kumulanjisa ni mbongo chipwe kumumwesa lamba, mumu yena wamukolesa sonyi.
15 “Nyi lunga mapwa ni mapwo aali, mazanga chinji umwe kuhiana mukwo, mba eswe aali mamusemena ana, alioze mwana mutangu mapwa wa yoze keshi kuzanga chinji, 16 ha tangwa lize lunga yono mahana chihinga chenyi kuli ana jenyi a malunga, iye katambile kupwisa mwana wa pwo yoze azanga chinji ngwe mwanenyi mutangu ni kulelesa mwana wa pwo yoze keshi kuzanga chinji, yoze uli lume mwanenyi mutangu. 17 Iye katamba kutayiza mwana wa pwo yoze keshi kuzanga chinji ngwe mwanenyi mutangu ni kumwaha yihanda yaali ya chihinga, ya yuma yeswe yize ali nayo, mumu kali uputukilo wa tachi jenyi ja kusema. Ulite wa mwana mutangu uli niwenyi.
18 “Nyi umwe lunga mapwa ni mwana chihulia, yoze keshi kwononokena yisemi jenyi, mba ayo meseka kumufumba, alioze iye kechi kwapanjika, 19 yisemi jenyi katamba kumutwala kuli makulwana, ku chikolo cha mbonge, 20 malweza makulwana a mu mbonge ngwo: ‘Mwanetu au kali chihulia, keshi kutwononokena. Kakulia chinji, kali nawa chizengi.’ 21 Mba malunga eswe a mu mbonge mamwasa mawe ndo muze mafwa. Chocho munuchiza upi mukachi kenu. Muze A-Izalele eswe machivwa, mevwa woma.
22 “Nyi umwe lunga malinga shili yize atela kufwa, chocho munumushiha mba munumusukika ku mutondo, 23 mujimba wenyi kuwatambile kusala ufuku weswe ha mutondo. Yenu nwatamba kumufunda ha tangwa lizeliene, mumu yoze akusukika ha mutondo kashingiwa kuli Zambi. Yenu kunwatambile kupihisa chifuchi chize Yehova Zambi yenu manwaha ngwe chihinga.