Mukanda Utangu wa Mianangana
12 Rehoboame kayile ku Shekeme mumu kwe A-Izalele eswe ayile hanga amupwise mwanangana. 2 Jeroboame mwana wa Nebate yanyingika lusango wacho, (ha shimbu liacho iye te uchili ku Engitu, mumu kachinyine Mwanangana Solomone), 3 chocho A-Izalele yatuma kusanyika Jeroboame. Mba Jeroboame ni chikungulwila cheswe cha Izalele yaya kuli Rehoboame, yamba ngwo: 4 “Tatenu katupwishile ndungo, alioze nyi nwatepulula kama milimo yikalu yize tatenu atuhele, mutukulingila.”
5 Chocho iye yaalweza ngwenyi: “Yeenu, muze mukupalika matangwa atatu mba munuhiluka.” Kashika, atu yaya kwo. 6 Chocho mwanangana Rehoboame yahula makulwana waze apwile ni kuhana yiyulo kuli tato Solomone ngwenyi: “Kuchi munguhasa kukumbulula atu wano?” 7 Ayo yamukumbulula ngwo: “Nyi walinga yize atu wano anechi, ayo mapwa tuvumbi twe ku miaka yeswe.”
8 Alioze, iye yalituna chiyulo cha makulwana, yahula masepa jenyi waze akolele nenyi, waze te anamukwasa ha shimbu liacho. 9 Iye yaahula ngwenyi: “Chiyulo chika munungwaha? Yika mutuhasa kulweza atu wano amba ngwo: ‘Tepulula kama milimo yikalu yize tatenu atuhele’?” 10 Masepa jenyi yamukumbulula ngwo: “Hakutwala kuli atu wano akwita ngwo: ‘Tatenu katupwishile ndungo, alioze yenu tepululenu kama milimo yetu,’ yenu nwatamba kwalweza chino: ‘Munwe wami wa songo muupwa unene chinji kuhiana zalilo lia tata. 11 Tata kanuhele milimo yinji, alioze yami mungunwaha milimo yinji kuhiana. Tata kanulambile ni shikote yamokomoko, alioze yami mungunulamba ni shikote ya mbimbo.’”
12 Ha tangwa liamuchitatu, Jeroboame ni atu eswe yaya kuli Rehoboame kulita ni chize mwanangana aalwezele ngwenyi: “Muze mukupalika matangwa atatu mba munuhiluka.” 13 Alioze mwanangana yakumbulula chipi atu, kakawile chiyulo cha makulwana. 14 Iye yakaula chiyulo cha masepa jenyi, yamba ngwenyi: “Tata kanuhele milimo yinji, alioze yami mungunwaha milimo yinji kuhiana yize anuhele tata. Tata kanulambile ni shikote yamokomoko, alioze yami mungunulamba ni shikote ya mbimbo.” 15 Kashika, mwanangana yalituna chiyulo cha mbunga. Uno wapwile upale wa Yehova hanga maliji waze Yehova alwezele Jeroboame mwana wa Nebate, kupalikila muli profeta Ahija Ka-Shilone amanunuke.
16 Muze A-Izalele eswe amwene ngwo mwanangana kazangile kwapanjika, yamba kuli mwanangana ngwo: “Usepa uka tuli nawo ni Ndawichi? Chihinga cha mwana wa Yese chisale kuli iye mwene. Yenu A-Izalele, yeenu kuli tuzambi twenu. Ndawichi afunge zuwo lienyi!” Chocho A-Izalele eswe yaya ku mazuwo jo. 17 Alioze, Rehoboame yanunga ni kuyula A-Izalele waze te atwama mu mambonge ja A-Yunda.
18 Chocho Mwanangana Rehoboame yaatumina Adorame yoze wapwile ni kusongwela mulimo wa upinji, alioze A-Izalele eswe yamwasa mawe, yafwa. Mwanangana Rehoboame yanyina mu temba lienyi lia jita, yachinyina ku Yerusaleme. 19 Chocho A-Izalele yalimika ni akwa-zuwo lia Ndawichi ndo musono.
20 Muze A-Izalele eswe evwile ngwo Jeroboame hahiluka, yatuma kumusanyika, yamupwisa mwanangana hali A-Izalele. Niumwe kakakwashile akwa-zuwo lia Ndawichi, shina wika munyachi wa Yunda.
21 Muze Rehoboame ahetele mu Yerusaleme, yakunga kawashi-washi munyachi weswe wa Yunda ni wa Mbenjamine, tujita ajama 180,000 hanga aye ni kwasa jita ni A-Izalele ni kuhilwisa wanangana kuli Rehoboame mwana wa Solomone. 22 Mba Shemaia mutu wa Zambi wamwenemwene, yatambula lusango yono kuli Zambi wamwenemwene ngwo: 23 “Lweza Rehoboame mwana wa Solomone mwanangana wa Yunda ni munyachi weswe wa Yunda ni A-Mbenjamine ni atu eswe ngwo: 24 ‘Yehova kanambe ngwenyi: “Kanda nuya ni kwasa jita ni mandumbu jenu A-Izalele. Mutu ni mutu ahiluke ku zuwo lienyi mumu chuma chino yami mwe nachineha.”’” Ayo yononokena Yehova, yafuna ku mazuwo jo ngwe chize Yehova alwezele.
25 Chocho Jeroboame yatunga mbonge ya Shekeme mu chifuchi cha milundu cha Eframe, yatwamamo. Mba yakatuka ku Shekeme, yatunga mbonge ya Penwele. 26 Jeroboame yamba mu mbunge yenyi ngwenyi: “Haliapwila wanangana muufuna kuli akwa-zuwo lia Ndawichi. 27 Nyi atu wano manunga ni kukanduka ku Yerusaleme hanga ahane yitapo ku zuwo lia Yehova, mbunge jo mujihiluka kuli mwene wo Rehoboame Mwanangana wa Yunda. Ewa, ayo mangushiha, mahiluka kuli Rehoboame Mwanangana wa Yunda.” 28 Muze iye te hanyonga chocho, yalinga ana ngombe aali a oru, yalweza atu ngwenyi: “Chakupwa chikalu chinji kuli yenu kukanduka ku Yerusaleme. Kashika, yono mwe Zambi yenu wanuchijile ku chifuchi cha Engitu.” 29 Chocho iye yasa mwana ngombe umuwika ku Mbetele, mukwo ku Ndane. 30 Atu yaputuka kuvulumuna mumu te kakuya ku Ndane hanga awayile mwana ngombe wa oru.
31 Yatunga mazuwo ha manangamo, yasakula malunga waze te hi A-Levi ko hanga apwe asasendote. 32 Jeroboame yahana shimbi ya kulinga chiwanyino ha tangwa kumi ni liamuchitano, ha kakweji wamuchinake, chalifwa ni chiwanyino chize te akulinga mu Yunda. Ha chilumbilo chize alingile ku Mbetele, iye te kakulambwilaho yitapo kuli ana ngombe a oru waze alingile. Ku Mbetele yasako asasendote hanga afunge manangamo waze atungile. 33 Ha tangwa kumi ni liamuchitano, ha kakweji wamuchinake, kakweji yoze iye mwene asakwile, yaputuka kuhana yitapo ha chilumbilo chize atungile ku Mbetele. Iye yalingila A-Izalele chiwanyino, yanyina ha chilumbilo hanga ahane milambu ni kwocha insensu.