Akwa-Kuyula
20 A-Izalele eswe yakatuka chize ku Ndane ndo ku Mbia-Shipa ni mu chifuchi cha Ngiliate. Chikungulwila cheswe yichitayiza kulikungulula hamuwika kumeso ja Yehova, ku Mizepa. 2 Chocho, miata ja atu ni minyachi yeswe ya Izalele yasoloka mu chikungulwila cha Zambi. Maswalale waze apwile ni tutana kapwile 400,000.
3 A-Mbenjamine yanyingika ngwo malunga A-Izalele kanalikungulwila ku Mizepa.
Malunga A-Izalele yahula ngwo: “Tulweze, kuchi chapwanga mba chuma chino chilingiwe?” 4 Chocho Ka-Levi, lunga lia pwo yoze anakashiha yakumbulula ngwenyi: “Yami ni konkubina wami tunakaheta mu Ngibia ya Mbenjamine hanga tupombelemo. 5 Mba atu a mu Ngibia yangukatukila, yajingilika zuwo ha ufuku. Ayo te kanazange kungushiha, alioze yalipomba ni konkubina wami ndo muze afwile. 6 Kashika, yingukwata mujimba wa konkubina wami yinguuteta mu yipinji, yingutuma yipinji yacho mu njiza yeswe ya Izalele, mumu ayo kalinga chuma cha sonyi, chuma chipi mu Izalele. 7 Haliapwila, yenu eswe A-Izalele, hanenu chiyulo chenu ha chikuma chino.”
8 Chocho ayo eswe yamba ngwo: “Niumwe wa kuli yetu maya ku mbalaka hanji ku zuwo lienyi wakuhi. 9 Chino che mutulinga kuli A-Ngibia: Mututa chela hanga tuye ni kwasa no jita. 10 Wano e malunga waze mutusakula ku minyachi yeswe ya A-Izalele: Hakachi ka malunga 100 mutusakulaho 10; hakachi ka 1,000 mutusakulaho 100; hakachi ka 10,000 mutusakulaho 1,000. Malunga wano e malulieka kulia chize mambata maswalale waze maya ni kwasa jita ni Ngibia ya Mbenjamine, mumu lia chuma cha sonyi chize alinga mu Izalele.” 11 Chocho malunga eswe A-Izalele yalichinga hanga apupe mbonge yacho.
12 Kashika minyachi yeswe ya Izalele yiyituma malunga kuli A-Mbenjamine hanga aahule ngwo: “Mumu liaka nwalinga chuma chino chipi mukachi kenu? 13 Haliapwila twehenu malunga amokomoko a mu Ngibia waze alinga chuma chino chipi hanga twashihe tuchize upi mu Izalele.” Alioze, A-Mbenjamine katayijile yize mandumbu jo A-Izalele ambile.
14 Mba A-Mbenjamine yakatuka mu mambonge jo, yaya ni kulikungulwila mu Ngibia hanga ase jita ni A-Izalele. 15 Ha tangwa liacho, A-Mbenjamine yakungulula mu mambonge jo malunga 26,000 waze apwile ni tutana, yawezaho nawa maswalale ajama 700 a mu Ngibia. 16 Hakachi ka maswalale jacho hapwile maswalale ajama 700, eswe kapwile yipipa. Ayo te kakuhasa kukonga liwe ku lukambu ni ndundu, te keshi kuhulisa.
17 A-Izalele yakungulula malunga 400,000 waze apwile ni tutana, ayo eswe kapwile tujita ajama. 18 Ayo yakanduka, yaya ku Mbetele hanga ahule Zambi. Muze aheteleko, ayo yahula Zambi ngwo: “Iya wa kuli yetu matusongwela hanga tuye ni kwasa jita ni A-Mbenjamine?” Yehova yakumbulula ngwenyi: “Yunda mwe watamba kunusongwela.”
19 Muze kwachile, A-Izalele yakatuka, yasa chilombo cho ku Ngibia.
20 A-Izalele yaya ni kwasa jita ni A-Mbenjamine, yalilonga hakamwihi ni mbonge ya Ngibia. 21 Ha tangwa liacho, A-Mbenjamine yakatuka ku Ngibia, yashiha malunga A-Izalele 22,000. 22 Alioze, malunga A-Izalele yapwa ni hamu, yalilonga nawa, yaya ni kwasa jita ku chihela chizechene ayile ha tangwa litangu. 23 A-Izalele yakanduka, yaya ni kulila kumeso ja Yehova ndo muze kwatokele, mba ayo yahula Yehova ngwo: “Shina twatamba nawa kwasa jita ni mandumbu jetu A-Mbenjamine?” Yehova yakumbulula ngwenyi: “Kandukenu nwase no jita.”
24 Chocho A-Izalele yakanduka hanga aye ni kwasa jita ni A-Mbenjamine ha tangwa liamuchiali. 25 Mba A-Mbenjamine yakatuka ku Ngibia, yaya ni kwasa no jita ha tangwa liamuchiali, ayo yashiha A-Izalele 18,000, ayo eswe kapwile ni tutana. 26 Chocho malunga eswe A-Izalele yakanduka ku Mbetele. Yalila, yatwama kumeso ja Yehova. Ha tangwa liacho yalitwamina kulia ndo ha chingoloshi, yahana milambu ya kwocha ni milambu ya sambukila kuli Yehova. 27 Mba malunga A-Izalele yeta ukwaso kuli Yehova, mumu ha matangwa jacho Mushete wa Usendo wa Zambi wamwenemwene te kwe uli. 28 (Ha matangwa jacho, Finehase mwana wa Eleazare, mujikulu wa Arone, mwe wapwile sasendote.) Ayo yahula ngwo: “Shina twatamba kuya nawa ni kwasa jita ni mandumbu jetu A-Mbenjamine nyi tulitwamine?” Yehova yakumbulula ngwenyi: “Kandukenu nwase no jita, mumu hamene mungwakunjika mu moko jenu.” 29 Kashika, A-Izalele yasa malunga hanga ajingilike Ngibia.
30 Ha tangwa liamuchitatu, A-Izalele yalilonga, yaya ku Ngibia hanga ase jita ni A-Mbenjamine ngwe chize alingile ha yisuho yikwo. 31 Muze A-Mbenjamine ayile ni kulimika no, A-Izalele yakoka A-Mbenjamine haze lia mbonge, ngwe chize alingile ha yisuho yikwo. A-Mbenjamine yaputuka kulukukila A-Izalele ni kushiha amwe mu tapalo linayi ku Mbetele ni likwo linayi ku Ngibia, ayo kashihile malunga A-Izalele 30. 32 Chocho A-Mbenjamine yamba ngwo: “Tunaakumba nawa ngwe chize twalingile.” Alioze A-Izalele yamba ngwo: “Tuchinenu hanga twakokele ku matapalo, kusuku ni mbonge.” 33 Chocho malunga eswe A-Izalele yakatuka ha yihela yo, yalilonga ku Mbale-Tamare, alioze, A-Izalele waze te anajikinyina hakamwihi ni Ngibia yakatuka ku yihela yo, yeza ni kushiha A-Mbenjamine. 34 Chocho, maswalale ajama A-Izalele 10,000, yaaheta ku Ngibia, jita yiyoka chinji. Alioze, A-Mbenjamine te kanyingikine ngwo kumaanongesa.
35 Yehova yakumba A-Mbenjamine kupalikila muli A-Izalele. Ha tangwa liacho, A-Izalele yashiha malunga A-Mbenjamine 25,100, eswe kapwile tujita ajama.
36 Muze A-Izalele te anachina, A-Mbenjamine yanyonga ngwe makumba, alioze A-Izalele te kanajikijila hali malunga waze apwile ni kujikinyina Ngibia. 37 Chocho malunga waze te anajikinyina mbonge ya Ngibia, yayipupa. Yalimwanga, yashiha atu eswe mu mbonge ni katana.
38 Malunga A-Izalele kalitesele ni waze te anajikinyina mbonge ngwo, mwishi uze muukakumuka mu mbonge muupwa chilayi.
39 Muze A-Izalele te anachina, A-Mbenjamine yaalukukila, yashiha malunga 30 A-Izalele. Ayo yamba ngwo: “Tunakumba ngwe chize twalingile ha yisuho yikwo.” 40 Alioze chilayi cha mwishi yichisoloka mu mbonge. Muze A-Mbenjamine atalile kunyima, yamona mbonge yinawema. 41 Hohene, A-Izalele yalumukina A-Mbenjamine, ayo yevwa mwongo, mumu te hanyingika ngwo, kumaanongesa. 42 Kashika yachina A-Izalele, yatalikisa mu puya, alioze kakahashile kulilamwina, yaashiha kuli malunga waze te anakatuka mu mambonge. 43 A-Izalele yajikinyina A-Mbenjamine, yaahanga. Ayo yaashihila kulutwe lia Ngibia, sali lia chivumbuko cha mbonge. 44 Mba malunga A-Mbenjamine 18,000 yafwa, eswe kapwile tujita ajama.
45 A-Mbenjamine yaakondoloka, yachinyina mu puya ku luliwe lwa Rimone. A-Izalele yashiha amwe a kuli ayo 5,000 mu matapalo, yanunga ni kwakaula ndo ku Ngidome, chocho yashiha nawa malunga 2,000. 46 Malunga eswe A-Mbenjamine waze ashihile ha tangwa liacho, kapwile 25,000, malunga waze apwile ni tutana, eswe te yitakame. 47 Alioze malunga 600 yachinyina mu puya ku luliwe lwa Rimone, yatwama mu liwe liacho tukweji awana.
48 Mba malunga A-Izalele yahiluka, yasa jita ni A-Mbenjamine, yashiha ni katana atu eswe waze apwile mu mbonge, malunga, yimuna ni yuma yeswe yize yasalilemo. Yocha nawa mambonge eswe waze awanyine mu jila.